މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ޑެޕިއުޓީ ޗީފް އެގްޒެކެޓިވް އޮފިސަރު (ސީއީއޯ) ގެ މަގާމުގައި ހުންނެވި އިބްރާހިމް ޒިޔަތު އެ މަގާމުން އިސްތިއުފާ ދެއްވައިފިއެވެ.

ޒިޔަތު މަގާމުން އިސްތިއުފާ ދެއްވިކަން ކަށަވަރުވެފައިވީ ނަމަވެސް، އޭނާ މަގާމުން ވަކިވެވަޑައިގަތް ވަކި ސަބަބެއް މިހާތަނަށް ހާމަކޮށްފައެއް ނުވެއެވެ.

Ad by Hajj Corporation

އެމްޕީއެލްގެ ޑެޕިއުޓީ ސީއީއޯގެ މަގާމުގެ އިތުރުން އެ ކުންފުނީގެ ބޯޑު މެންބަރެއްގެ ގޮތުގައި ޒިޔަތު އައްޔަންކުރެއްވީ މިދިޔަ މާޗު މަހުގެ ތެރޭގައެވެ.

ނަމަވެސް، މިދިޔަ މެއި މަހުގެ 1 ވަނަ ދުވަހު އޭނާ ވަނީ އެމްޕީއެލްގެ ބޯޑުން ވަކިކޮށްފައެވެ. ޒިޔަތު ބޯޑުން ވަކިކުރުމަށްފަހު، އެމްޕީއެލްގެ ބޯޑުގެ އެގްޒެކްޓިވް މެންބަރުކަން ދީފައިވަނީ އެމްއޭސީއެލްގެ ޑެޕިއުޓީ ސީއީއޯގެ މަގާމަށް އެންމެ ފަހުން އައްޔަންކުރެއްވި މުހައްމަދު ލަމްއާނަށެވެ.

ޒިޔަތަކީ މީގެ ކުރިން ވެސް ސަރުކާރުގެ ކުންފުނިތަކުގެ އިސް މަގާމުތައް ފުރުއްވާފައިވާ ބޭފުޅެކެވެ. އެގޮތުން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އޭނާ ވަނީ އެމްޓީސީސީގެ ސީއީއޯގެ މަގާމު ފުރުއްވާފައެވެ.

ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ޑިގްރީ ހާސިލްކުރައްވާފައިވާ ޒިޔަތު ވަނީ އެސްޓީއޯގައި ވެސް ގިނަ ދުވަސްތަކެއް ވަންދެން ޚިދުމަތް ކުރައްވާފައެވެ. އެގޮތުން އެ ކުންފުނީގެ އެކި މަގާމުތަކުގައި އޭނާ 15 އަހަރު ދުވަހު މަސައްކަތް ކުރެއްވިއެވެ.