ހަމާސްގެ އަސްކަރީ ގޮފި، އިއްޒުއްދީން އަލްގައްސާމް ބްރިގޭޑްސްގެ ތަރުޖަމާނު މިދިޔަ އޮގަސްޓް މަހު އިޒްރޭލުން ގާޒާއަށް ދިން ހަމަލާއެއްގައި ޝަހީދުވެފައިވާކަން ރަސްމީކޮށް އެ ޖަމާއަތުން އިއުލާންކޮށްފިއެވެ.

މިކަން ޢިއުލާންކުރުމާއެކު ހަމާސްއިން ވަނީ އެ ޖަމާޢަތު އައު ތަރުޖަމާނު ހޯމަ ދުވަހު ތަޢާރަފްކޮށްފައެވެ.

Ad by Hajj Corporation

އަރަބި މީޑިއާތަކުން ދެއްކި ރެކޯޑްކޮށްފައިވާ ހިތާބެއްގައި، އާ ތަރުޖަމާނު ހާމަކުރި ގޮތުގައި 'އަބޫ އުބައިދާ' ގެ ނަމުން މަޝްހޫރުވެފައިވާ އޭނާގެ ކުރިން އެ މަގާމު ފުރުއްވި ބޭފުޅަކީ ހުޒައިފާ ސަމީރު އަލްކަހްލޫތެވެ. އާ ތަރުޖަމާނުވެސް މިހާރު ބޭނުންކުރަމުންދަނީ ހަމަ އެ ނަމެވެ.

އޭނާ ވަނީ ފާއިތުވި ވިހި އަހަރު ދުވަހު މޫނު ނުދައްކައި ގައްސާމް ބްރިގޭޑްސްގެ ތަރުޖަމާނުގެ ގޮތުގައާއި އަސްކަރީ ޔުނިޓުގެ އިސްވެރިއެއްގެ ގޮތުގައި މަސައްކަތް ކުރައްވާފައެވެ.

"ދެ ގަރުނެއްހާ ދުވަހު ދުޝްމަނުން މާޔޫސްކޮށް، މުއުމިނުންގެ ހިތްތަކަށް އުފާވެރިކަން ގެނެސްދިން ގައްސާމްގެ މީޑިއާގެ އިސްވެރިޔާ ހުޒައިފާ ސަމީރު އަލްކަހްލޫތު ވަކިވެދިޔުމަކީ ބޮޑު ހިތާމައެއް" އާ ތަރުޖަމާނު ވިދާޅުވެފަވެއެވެ.

މީގެ އިތުރުން، ގައްސާމް ބްރިގޭޑްސްގެ ކުރީގެ ކޮމާންޑަރު މުހައްމަދު އަލްސިންވާރު މޭ މަހު ޝަހީދުވިކަމާއި، އަދި މި މަހުގެ ކުރީކޮޅު ރާއިދު ސައުދު ހިމެނޭހެން އިތުރު އަސްކަރީ ލީޑަރުންތަކެއް ޝަހީދުވިކަންވެސް އާ ތަރުޖަމާނު ވަނީ ކަށަވަރުކޮށްދީފައެވެ.

ޝަހީދުވި، ކަހްލޫތަކީ އަބަދުވެސް ރަތް ކެފިޔާއަކުން މޫނު ނިވާކޮށްގެން ފެންނަ ބޭފުޅަކަށް ވުމުން، އޭނާގެ އަމިއްލަ ދިރިއުޅުމުގެ މައުލޫމާތު ވަނީ ސިއްރުވެފައެވެ. އޭނާ ބޮޑަށް މަޝްހޫރުވެފައިވަނީ ހަނގުރާމައިގެ މައިދާނުގެ ހަބަރުތައް ގެނެސްދިނުމަށާއި އިޒްރޭލަށް ގޮންޖަހައި ދޭ ބަޔާންތަކުގެ ސަބަބުންނެވެ.