އިނގިރޭސި ޕްރިމިއާ ލީގުގައި ރޭ އެސްޓަން ވިލާ އާއި ދެކޮޅަށް ކުޅުނު މެޗު 4-1 ގެ ތަފާތު ބޮޑު ނަތީޖާއަކުން ކާމިޔާބުކޮށް، އާސެނަލް އިން ތާވަލުގެ އެއްވަނައިގައި އޮވެ އަހަރު ނިންމާލައިފިއެވެ. މި މޮޅާއެކު އާސެނަލް އަށް ވަނީ ލީގުގައި މިހާތަނަށް ކުޅުނު 19 މެޗުން ޖުމްލަ 45 ޕޮއިންޓް ލިބިފައެވެ. މެޗުން ބަލިވި އެސްޓަން ވިލާ 19 މެޗުން ލިބުނު 39 ޕޮއިންޓާއެކު އޮތީ ތާވަލުގެ ތިންވަނައިގައެވެ.

ލަންޑަނުގެ އެމިރޭޓްސް ސްޓޭޑިއަމްގައި ކުޅުނު މި މެޗަށް އާސެނަލް ނިކުތީ އެ ޓީމުގެ މުހިންމު މިޑްފީލްޑަރު ޑެކްލަން ރައިސް ނުލައެވެ. އޭނާ އަށް އަނިޔާވެފައިވާތީ މި މެޗުގައި ބައިވެރިވެފައެއް ނުވެއެވެ. މެޗުގެ ފުރަތަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ނަމަވެސް، އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ.

Ad by Hajj Corporation

މެޗުގެ ނަތީޖާ ބަދަލުވެގެންދިޔައީ ދެވަނަ ހާފު ފެށިގެން ތިންވަނަ މިނިޓުގައެވެ. އާސެނަލް އަށް ލިބުނު ކޯނަރަކުން ގެބްރިއެލް މަގަލާއެސް ޖަހައިދިން ލަނޑުން މުޅިމެޗު އާސެނަލް ކޮޅަށް އެނބުރިގެންދިޔައެވެ. އޭގެ ކުޑައިރުކޮޅެއް ފަހުން، މެޗުގެ 52 ވަނަ މިނިޓުގައި މާޓިން ޒުބިމެންޑީ ވަނީ ލަނޑެއް ޖަހައި ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ. އާސެނަލްގެ ތިންވަނަ ލަނޑު 69 ވަނަ މިނިޓުގައި ކާމިޔާބުކޮށްދިނީ ލިއަންދްރޯ ޓްރޮސާޑް އެވެ.

އާސެނަލްގެ ފަހު ލަނޑު މެޗުގެ 78 ވަނަ މިނިޓުގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ގެބްރިއެލް ޖިސޫސް އެވެ. އެސްޓަން ވިލާގެ ހަމައެކަނި ލަނޑު މެޗުގެ އިތުރު ވަގުތުގެ ތެރޭގައި ޖަހައިދިނީ އޮލީ ވޮޓްކިންސް އެވެ.

މި ސީޒަނުގައި އާސެނަލް އިން ދައްކަމުން އަންނަނީ ވަރުގަދަ ކުޅުމެކެވެ. ޖެހިޖެހިގެން އެންމެ ފަހުން ކުޅުނު 11 މެޗުން މޮޅުވަމުން އައި އެސްޓަންވިލާ ކޮޅަށް މިހާވަރުގަދަ ނަތީޖާއެއް ނެރެ، ދެވަނައިގައި އޮތް ސިޓީއާއި ފަރަގު މިހާރުވަނީ ފަސް ޕޮއިންޓް އަށް ފަރަޤުބޮޑުވެފައެވެ.