ހުޅުމާލޭ ސިނާއީ ސަރަހައްދުގައި އާންމުންނަށް އުނދަގޫވާ ގޮތަށް ހުރި އުޅަނދުތައް ނަގައި، ތަން ސާފުކުރުމުގެ މަސައްކަތް ކުރަން ނިންމައިފައިވާކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ބުނެފިއެވެ.

ގިނަ އަދަދެއްގެ ގަރާޖާއި، ގުދަންތަކާއި، ފެކްޓްރީތައް ހުންނަ އެ ސަރަހައްދުގައި ބޮޑެތި ލޮރީތަކާއި، ހަލާކުވެފައި ހުރި ބާ ކާރާއި ޕިކަޕު ވެސް އެކި ހިސާބުތަކުގައި ހުރެއެެވެ.

Ad by Hajj Corporation

އެޗްޑީސީން ކުރި އިއުލާނެއްގައި ބުނީ އެ ސަރަހައްދުގައި ޕާކިން ޒޯނުގެ ބޭރުން ގަވައިދާ ޚިލާފަށް ޕާކުކޮށްފައި ހުރި އުޅަނދުތައް މި ފެށޭ ޖެނުއަރީ މަހުގެ އަށްވަނަ ދުވަހުގެ ކުރިން ނަގަން ވާނެ ކަމަށެވެ.

ނުނަގާ އުޅަނދުތައް، ކަމާ ގުޅޭ އިދާރާތަކާ ގުޅިގެން ނަގާނެ ކަމަށް ވެސް ބުންޏެވެ.

އަދި އެ ކަމުގައި އުޅަނދަކަށް ނުވަތަ އޭގެ ވެރިފަރާތަށް ލިބޭ ގެއްލުމަށް އެޗްޑީސީން ޒިންމާ ނުވާނެ ކަމަށް ވެސް ބުންޏެވެ.

ފާހަގަކޮށްލަން ޖެހޭ ގޮތުގައި، މިފަހުން ފަހުން ހުޅުމާލޭގެ ދެ ފިޔަވަހީގައި ވެސް ޕާކިންއަށް ޚާއްސަ ވަގުތީ ބިންތަކެއް އެޗްޑީސީން ވަނީ ހަތަރުފުރޮޅުލީ އުޅަނދު ޕާކުކުރަން ދީފައެވެ. އެޗްޑީސީން މީގެ ކުރިން ބުނި ގޮތުގައި އެ ބިންތައް ތަރައްގީކުރާނީ ޕާކިން ބިލްޑިންގުގެ ގޮތުގައެވެ.

އެކި ފްލޯތަކަށް އުސްކޮށް ހުންނަ ޕާކިން ބިލްޑިންއެއް ހެދުމުން، އެއް ބިމެއްގައި މަދު ވެހިކަލްތަކެއް ޕާކު ކުރުމުގެ ބަދަލުގައި ގިނަ ވެހިކަލްތަކެއް ޕާކުކުރަން ފަހިވާނެއެވެ. އަދި ބިމުގެ ބޭނުން ވެސް ފުރިހަމައަށް ހިފޭނެއެވެ.