ޗޮކްލެޓް ސިރަޕް ފުޅިތަކެއްގައި ބަންދު ކޮށްގެން ރާއްޖެ އަށް ކަނޑުމަގުން މަސްތުވާތަކެތި އެތެރެކުރި މައްސަލާގައި ހިމެނޭ ދެ މީހުންގެ ތެރެއިން އެ ތަކެތި އެތެރެކުރި ކުންފުނީގެ ވެރިޔާގެ ބަންދަށް 15 ދުވަހަސް އިތުރުކޮށްފައިވާ ކަމަށް ފުލުހުން މިއަދު ބުނެފިއެވެ.

ރާސް މޯލްޑިވްސް ކިޔާ ކުންފުންޏެއްގެ ނަމުގައި ރާއްޖެ ގެނައި މުދާތަކެއް ކަސްޓަމްސް އިން މިދިޔަ ޑިސެމްބަރު 25 ވަނަ ދުވަހުގެ ރޭ ބަލައި ފާސްކުރިއިރު ޗޮކްލެޓް ސިރަޕްފުޅިތަކެއްގެ ތެރޭގައި މަސްތުވާތަކެތީގެ ބާވަތެއް ކަމަށްވާ ހަޝިޝް އޮއިލް އެތެރެކުރިކަން ފަޅާއަރައިގެން ހައްޔަރުކުރި އެކަކީ އެ ކުންފުނީގެ މެނޭޖިންގ ޑިރެކްޓަރު ގދ. ތިނަދޫ، ގޯލްޑަން ހައުސް، މުހައްމަދު އާދިލް، 57 އެވެ.

Ad by Hajj Corporation

އޭނާއަކީ ރާއްޖެއަށް އެކި ބާވަތުގެ މުދާ އެތެރެކޮށް، ވިޔަފާރި ހިންގުމަށް މީގެ 16 އަހަރު ކުރިން ރަޖިސްޓްރީ ކޮށްފައިވާ ރާސް މޯލްޑިވްސްގެ އެއް ޑިރެކްޓަރެވެ.

ފުލުހުން މިއަދު ބުނިގޮތުގައި ތަހުގީގުގެ ބޭނުމަށް އާދިލް ބަންދުގައި ބަހައްޓަން ކްރިމިނަލް ކޯޓުން ފުރަތަމަ ދިން ފަސް ދުވަހުގެ މުއްދަތު ހަމަވާތީ ކޯޓަށް ހާޒިރު ކުރުމުން އިތުރު 15 ދުވަހަށް ބަންދުކުރަން ވަނީ އަމުރުކޮށްފައެވެ. އޭނާ ހައްޔަރުކުރީ މިދިޔަ ޑިސެމްބަރު 27 ގަ އެވެ.

އެ މައްސަލާގައި ދެން ހައްޔަރު ކޮށްފައި ވަނީ ރާސް މޯލްޑިވްސްގެ މުދާ ކްލިއަރ ކުރުމަށް އެކުންފުނީގެ ފަރާތުން ދާނެ ކަމަށް އީމެއިލުން ކަސްޓަމްސްގެ ސީ ކާގޯ އެގްޒަމިނޭޝަނަށް އެންގި، ހއ. ހޯރަފުށީ އާފިޔާ، އަހުމަދު އަލީ، 47، އެވެ.

ފުލުހުން މިއަދު ބުނީ، އަހުމަދު އަލީ މިދިޔަ ޑިސެމްބަރު 26 ވަނަ ދުވަހު ހައްޔަރުކޮށް، ބަންދާ މެދު ގޮތެއް ނިންމަން ކޯޓަށް ހާޒިރު ކުރުމުން ތަހުގީގުގެ ބޭނުމަށް 10 ދުވަހަށް ބަންދުކުރަން އަމުރު ކޮށްފައިވާ ކަމަށެވެ. އޭނާގެ ބަންދަށް ކޯޓުން ދިނީ ފަސް ދުވަސް ކަމަށް ކުރިން ބުނެފައިވީ ނަމަވެސް ފަސް ދުވަސް ކަމަށް ބުނެވުނީ އޮޅުމަކުން ކަަމަށް ފުލުހުންގެ މީޑިއާ އޮފިޝަލް މިއަދު ވިދާޅުވި އެވެ.

ހަޝިޝް އޮއިލް އަތުލައިގަނެ، ކަސްޓަމްސް އިން ބުނެފައިވާ ގޮތުގައި އެ ތަކެތީގެ ބަރުދަން 40 ކިލޯ އަށް ވުރެ މަތިވާނެ އެވެ. އޭގެ މަގުމަތީގެ އަގު ވެސް 30 މިލިއަނަށް ވުރެ އިތުރު ކަމަށް ކަސްޓަމްސް އިން ބުނެފައިވެ އެވެ. އެ ފުޅިތައް ރާއްޖެ އެތެރެކުރަން މަސައްކަތް ކުރީ 10 ފޮށިގަނޑެއްގައި ބަންދުކޮށްގެންނެވެ.