ސްޕެނިޝް ލަލީގާގައި ރޭ އެސްޕަނިއޯލް އާއި ދެކޮޅަށް ބާސެލޯނާ ކުޅުނު ފޯރިގަދަ ކެޓަލޯނިއާ ޑާބީ މެޗު އުނދަގޫކާމާއެކު 2-0 ގެ ނަތީޖާއަކުން ބާސެލޯނާ ކާމިޔާބުކޮށް، ތާވަލުގެ ކުރީގައި ހަތް ޕޮއިންޓުގެ ލީޑެއް ނަގައިފިއެވެ. މި މޮޅާއެކު ބާސެލޯނާ ވަނީ މިހާތަނަށް ކުޅުނު 19 މެޗުން 49 ޕޮއިންޓް ހޯދާފައެވެ. ދެވަނައިގައި އޮތް ރެއާލް މެޑްރިޑަށް އެއް މެޗު މަދުން ކުޅެގެން ލިބިފައިވަނީ 42 ޕޮއިންޓެވެ. މި މެޗުން ބަލިވި އެސްޕަނިއޯލް 33 ޕޮއިންޓާއެކު އޮތީ ތާވަލުގެ ފަސްވަނައިގައެވެ.

އެސްޕަނިއޯލްގެ ދަނޑުގައި ކުޅުނު މި މެޗުގައި ބާސެލޯނާއިން ގިނައިރު ބޯޅަ ހިފަހައްޓައިގެން ކުޅުނު ނަމަވެސް، ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބިފައިވެއެވެ. މެޗުގެ ނަތީޖާ ބަދަލުކުރުމަށް ބާސެލޯނާގެ ކޯޗު ހެންސީ ފްލިކް ވަނީ ދެވަނަ ހާފުގައި މުހިންމު ބަދަލުތަކެއް ގެނެސްފައެވެ. އެގޮތުން ރަފީނިއާ އާއި މާކަސް ރަޝްފޯޑްގެ ބަދަލުގައި ޑެނީ އޮލްމޯ އާއި ފަރމިން ލޮޕޭޒް ކުޅެން އެރުވިއިރު، މެޗުގެ 64 ވަނަ މިނިޓުގައި ފެރާން ޓޮރޭޒްގެ ބަދަލުގައި ރޮބަޓް ލެވަންޑޯސްކީ ވަނީ ކުޅެން ނިކުމެފައެވެ.

Ad by Hajj Corporation

ބާސެލޯނާއިން މެޗުގެ ލީޑު ނެގީ މެޗުގެ ފުރިހަމަ ވަގުތު ހަމަވާން އެންމެ ހަތަރު މިނިޓަށް ވެފައި ވަނިކޮށެވެ. މި ލަނޑު ފަރމިން ލޮޕޭޒް ތަނަވަސްކޮށްދިން ފުރުސަތަކުން ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޑެނީ އޮލްމޯއެވެ. މެޗުގެ ފަހު މިނިޓުގައި ބާސެލޯނާގެ ދެވަނަ ލަނޑު ޖަހައިދިނީ ތަޖުރިބާކާރު ފޯވާޑް ރޮބަޓް ލެވަންޑޯސްކީއެވެ. މި ލަނޑު ޖެހުމަށްވެސް މަގުފަހިކޮށްދިނީ ފަރމިން ލޮޕޭޒްއެވެ.

މި މޮޅާއެކު ބާސެލޯނާއިން ވަނީ ލީގު ތާވަލުގެ އެއްވަނައިގައި ހަމަޖެހިލާފައެވެ. އަދި ބަދަލު ކުޅުންތެރިންގެ ގޮތުގައި ނިކުތް ކުޅުންތެރިންގެ ފަރާތުން ފެނުނު މޮޅު ކުޅުމަކީ ކޯޗު ހެންސީ ފްލިކަށް ލިބުނު ބޮޑު ހިތްހަމަޖެހުމަކަށް ވާނެއެވެ.