މާލޭގައި ރޭ ހިނގި އަލިފާނުގެ ހާދިސާއާއި ގުޅިގެން، އާއިލާއަކަށް ވަގުތީ އެހީ ފޯރުކޮށްދީފައިވާކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އެންޑީއެމްއޭއިން ބުނިގޮތުގައި އެހީތެރިކަން ފޯރުކޮށްދީފަވަނީ އަލިފާން ރޯވި އިމާރާތާ އިންވެގެން ހުރި ގޭގެ އެޕާޓްމަންޓެއްގެ ފެން ހޮޅިއަކަށް ގެއްލުންވެގެން އެގެއިން ފެނުގެ ޚިދުމަތް ކެނޑިފައިވާތީއެވެ. އެގޮތުން އެ އެޕަރޓްމަންޓްގައި ދިރިއުޅެމުންދިޔަ ދެ މީހުންނަށް ރެއިން ފެށިގެން ވަގުތީ ބޯހިޔާވަހިކަން ފޯރުކޮށްދީފަވާކަމަށާއި، ފެނުގެ ނިޒާމަށް ލިބުނު ގެއްލުން ދެނެގަނެ، އެކަން ޙައްލުކުރުމަށް ކުރަންޖެހޭ މަސައްކަތްތައް ކުރަމުންދާކަމަށް އެންޑީއެމްއޭއިން ބުންޏެވެ.

ރޭ 23:22 ހާއިރު، އަލިފާން ރޯވެފައިވަނީ ސައިރިކްސް ކޮލެޖު ކައިރިން ހަދަމުންދިޔަ އިމާރާތެއްގައެވެ. އެ އަލިފާންގަނޑު ނިއްވާލާފައިވަނީ ސިފައިންހަރަކާތްތެރިވެ، ގާތްގަޑަކަށް ބައި ގަޑިއެއްހާއިރުތެރޭގައެވެ.

މި ހާދިސާއާ ގުޅިގެން އެއްވެސް މީހަކަށް ގެއްލުންވިކަމެއް ނުވަތަ ބޮޑު ގެއްލުމެއްވެސް ނުވާކަމަށް އެންޑީއެމްއޭއިން ބުނެފައިވެއެވެ.