ހުޅުމާލޭ ފޭސް އެކެއްގައި އެޕާޓްމެންޓެއްގައި ރޭ ދަންވަރު ހިނގި އަލިފާނުގެ ހާދިސާއެއްގައި އެކެއްގެ ފަޔާއި އަތް ފިހި އިތުރު ބަޔަކަށް ހޮސްޕިޓަލް އިން ފަރުވާދީފި އެވެ.

Ad by Hajj Corporation

މީޑިއާ މައުލޫމާތު ދެމުން ފުލުހުން ބުނީ، މި އަލިފާނުގެ ހާދިސާ ފުލުހުންނަށް ރިޕޯޓްކޮށްފައި ވަނީ ރޭ ދަންވަރު 1:07 ހާއިރު ކަމަށެވެ. ހުޅުމާލޭ ފުލެޓް ނަންބަރު 110 ގައި ހިނގި މި އަލިފާންގަޑު އެމްއެންޑީއެފްގެ ފަޔަ އެންޑް ރެސްކިއު ޓީމުން ނިއްވާލާފައި ވަނީ ގާތްގަނޑަކަށް 1:23 ގަ އެވެ.

ހުޅުމާލޭ ހޮސްޕިޓަލާ ހަވާލާދީ އެމްއެންޑީއެފް އިން ބުނެފައި ވަނީ ފިހުނު ފިރިހެން މީހާގެ އަތާއި ފައިގެ 12 އިންސައްތަ ފިހިފައިވާ ކަމަށެވެ. އަދި ބާކީ ތިބި މީހުންނަށް ފަރުވާ ދީފައި ވަނީ ދުމުގެ އަސަރުކޮށްގެން ކަމަށް ވެސް މައުލޫމާތުލިބެ އެވެ.

ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން އެކްސްގައި ބުނެފައި ވަނީ މި ހާދިސާ ހިނގިއިރު އެ ގޭގައި ހަތް ދިވެއްސަކު ދިރިއުޅުން ކަމަށާއި އޭގެ ތެރެއިން ފަސް މީހަކަށް ހޮސްޕިޓަލްގައި ފަރުވާދީފައިވާ ކަމަށެވެ. އެ އެޕާޓްމަންޓްގައި ދިރިއުޅު މީހުންނަށް ބަލާއިރު 18 އަހަރުން ދަށުގެ ކުޑަ ދެ ކުދިންނާއި 18 އަހަރުން މަތީގެ ފަސް މީހަކު ދިރިއުޅޭ ކަމަށް ވެސް އެންޑީއެމް އިން މައުލޫމާތުދެ އެވެ.

އަލިފާނުގެ ހާދިސާ ހިނގި އެޕާޓްމަންޓް ބޭނުން ނުކުރެވޭ ވަރަށް އަނދާފައިވާއިރު ދުމުގެ އަސަރުކޮށްގެން އެ އިމާރާތުގެ އެއްވަނަ އަދި ތިން ވަނަ ފަންގިފާލާގެ އަށް ފަރާތަކަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް ވެސް އެންޑީއެމްއޭ އިން މައުލޫމާތުދެ އެވެ.

އެ އިމާރާތުގެ އެންމެ ތިރީގައި ހުންނަ މި އެޕާޓްމަންޓްގައި އަލިފާން ރޯވާން ދިމާވި ސަބަބު އަދި ނޭނގޭ ކަމަށާއި މިހާދިސާ އިތުރަށް ތަހުގީގު ކުރަމުން އަންނަ ކަމަށް ފުލުހުން މައުލޫމާތުދެ އެވެ.