ހުޅުމާލޭގައި ރޭ ފަތިހު ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު އާއިލާއަށް އެންޑީއެމްއޭ ވަގުތީ ބޯހިޔާވަހިކަން ހަމަޖައްސައިދީފިއެވެ.

އެމްއެންޑީއެފްއިން ބުނިގޮތުގައި މި ހާދިސާ ހިނގާފައިވަނީ ފޭސް އެކެއްގެ 141 ވަނަ ފުލެޓްގެ ގްރައުންޑް ފްލޯގައި ހުރި އެޕާޓްމަންޓެއްގެ ބަދިގޭގައެވެ. މި ހާދިސާ ހިނގަން މެދުވެރިވީ ބަދިގޭގައި ބޭނުންކުރި ފެންހޫނުކުރާ ޕޮޓެއްގައި ރޯވުމުގެ ސަބަބުންނެވެ. މި ހާދިސާގެ ރިޕޯޓް އެމްއެންޑީއެފް މާލޭ އޭރިއާ ކޮމާންޑް، ހުޅުމާލެ ފަޔާ ސްޓޭޝަނަށް ލިބިފައިވަނީ ރޭ ފަތިހު 4:32 ހާއިރުއެވެ. ރިޕޯޓް ލިބުމާއެކު ފަޔާ ފައިޓަރުން އެ ސަރަހައްދަށް ގޮސް ކުރި މަސައްކަތުން، އަލިފާންގަނޑު އެއްކޮށް ނިއްވާލެވިފައިވަނީ ފަތިހު 4:58 ހާއިރުއެވެ.

Ad by Hajj Corporation

މި ހާދިސާގެ ސަބަބުން 6 މީހަކަށް ދުމުގެ އަސަރުކޮށްގެން ހުޅުމާލެ ހޮސްޕިޓަލަށް ގެންގޮސް ފަރުވާދީފައިވެއެވެ.

ހާދިސާއާއި ގުޅިގެން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނީ ދުމުގެ އަސަރުކުރި 6 މީހުންގެ އާއިލާއަށް ބޭނުންވާ އިންސާނީ އެހީތެރިކަމާއި ވަގުތީ ބޯހިޔާވަހިކަން ފޯރުކޮށްދިނުމުގެ މަސައްކަތް އެ އޮތޯރިޓީން ވަނީ ކޮށްފައި ކަމަށެވެ.

މި ހާދިސާގައި އެޕާޓްމަންޓްގެ ބަދިގެއަށް އެކިވަރުގެ ގެއްލުންތައް ލިބިފައިވާއިރު، މިހާދިސާ އާއި ގުޅިގެން މީހަކަށް އަނިޔާވެފައި ނުވެއެވެ.