ސްޓެލްކޯގެ މެނޭޖިންގ ޑިރެކްޓަރުކަމުގެ މަގާމުން އިއްޔެ ވަކިކުރި އަޙްމަދު ޝަމާޙް ރަޝީދުގެ ކޮރަޕްޝަންގެ މައްސަލަތަކެއް އޭސީސީއަށް ހުށަހަޅައިފިއެވެ.

އޭނާގެ ކޮރަޕްޝަންގެ މައްސަލައެއް އޭސީސީއަށް ހުށަހެޅިފައިވާކަން އޭސީސީން ވަނީ ރާއްޖޭގެ ބައެއް މީޑިއާތަކަށް ޔަޤީންކޮށްދެއްވާފައެވެ. ނަމަވެސް އެކަމާގުޅޭ ތަފްސީލެއް ހާމަކޮށްފައެއް ނުވެއެވެ.

Ad by Hajj Corporation

ސްޓެލްކޯގެ ބޯޑު މެންބަރުކަމުންނާއި މެނޭޖިންގ ޑިރެކްޓަރގެ މަގާމުން ސަމާހު ވަކިކޮށްފައިވަނީ ޕްރައިވެޓައިޒޭޝަން ކޯޕްރަޓައިޒޭޝަން ބޯޑުން، އޭނާ އެމަޤާމަށް އައްޔަން ކުރިތާ 4 މަސް ފަހުންނެވެ.

އޭނާ މަގާމުން ވަކިކުރިފަހުން އޭނާގެ އޯޑިއޯއެއް ކަމަށް ތުހުމަތު ކުރެވޭ އޯޑިއޯއެއް މީސް މީޑިއާގައި ދަނީ ދައުރުވަމުންނެވެ. މި އޯޑިއޯގައި ދެމީހެއްގެ އަޑު އިވޭއިރު، އެކަކީ ޝަމާހް ކަމަށް ތުހުމަތުކުރެއެވެ. އެ އޯޑިއޯގައި ކޮރަޕްޝަނަށް މަގުފަހިވާ ގޮތަށް ކަންކަން ކުރަމުންދާ ކަމުގެ ވާހަކަތަކެއް ދައްކާ އަޑުއިވެއެވެ.

ޝަމާހް ވަނީ ބައެއް މީޑިއާތަކަށް މައުލޫމާތު ދެމުން އޯޑިއޯ އަކީ އަސްލެއް ނޫން ކަމަށް ބުނެފައެވެ.

ޝަމާހް މަޤާމުން ވަކިކުރުމާއެކު ސްޓެލްކޯގެ ހިންގުން ވަގުތީ ގޮތުން، ޑެޕިއުޓީ މެނޭޖިންގ ޑިރެކްޓަރު ޑރ. އަލީ އަޒުވަރާ ވަނީ ހަވާލުކޮށްފައެވެ.