އެފްރިކަން ކަޕް އޮން ނޭޝަންސް (އެފްކޮން) 2025 ގެ ސެމީ ފައިނަލްގައި މިރޭ މިސްރާއި ސެނެގާލް ބައްދަލުކުރާނެއެވެ. ޓެންޖިއާގައި ކުޅޭ މި މެޗަކީ މުބާރާތުގެ ފައިނަލުން ޖާގައެއް ހޯދުމަށް ދެ ޓީމަށްވެސް އޮތް ވަރަށް މުހިންމު ފުރުސަތެކެވެ.

މި މެޗަކީ އެފްރިކާގެ އެންމެ ވަރުގަދަ ދެ ޓީމުގެ ކުރިމަތިލުމެއްގެ އިތުރުން، ލިވަޕޫލަށް ކުރިން ކުޅުނު ދެ ތަރިން ކަމަށްވާ މުޙައްމަދު ސަލާޙް އާއި ސާޑިއޯ މާނޭގެ ކުރިމަތިލުމެއްގެ ގޮތުގައިވެސް ފާހަގަކުރެވެއެވެ. މިހާތަނަށް މި ދެ ޓީމު 15 ފަހަރު ބައްދަލުކޮށްފައިވާއިރު، މިސްރުން ވަނީ ހަތް މެޗު ކާމިޔާބުކޮށްފައެވެ. ނަމަވެސް އެފްކޮން މުބާރާތްތަކުގައި ދެ ޓީމު ބައްދަލުކުރި މެޗުތަކުގެ ތަފާސްހިސާބު އުޅެނީ ދެ ޓީމު އެއްވަރުކޮށެވެ.

Ad by Hajj Corporation

ދެ ޓީމު އެންމެ ފަހުން ބައްދަލުކުރީ 2021 ވަނަ އަހަރުގެ އެފްކޮން ފައިނަލުގައެވެ. އެ ފަހަރު ޕެނަލްޓީ ޖަހައިގެން މިސްރު ބަލިކޮށް ސެނެގާލުން ވަނީ އެމީހުންގެ ފުރަތަމަ ތަށި އުފުލާލާފައެވެ. މިސްރުން މިރޭ ނުކުންނާނީ 2010 ވަނަ އަހަރަށްފަހު އެމީހުން ހޯދަން މަސައްކަތްކުރާ އަށްވަނަ ތަށީގެ އުންމީދުގައި ބަދަލުހިފުމުގެ ރޫހެއްގައެވެ.

މިސްރު ސެމީ ފައިނަލަށް ދަތުރުކުރީ ކުއާޓާ ފައިނަލުގައި އައިވަރީ ކޯސްޓާ ބައްދަލުކޮށް 3-2 އިން މޮޅުވެގެންނެވެ. މި މުބާރާތުގައި މިހާތަނަށް ސަލާޙް ވަނީ ހަތަރު ލަނޑު ޖަހައި އެއް އެސިސްޓް ފޯރުކޮށްދީފައެވެ. އަނެއްކޮޅުން ސެނެގާލް މި މުބާރާތުގައި އަދި ބަލިވެފައެއް ނުވެއެވެ. އެ ޓީމުން ބަރޯސާވަނީ މާނޭގެ ލީޑަޝިޕާއި ޓީމުގެ އެއްބައިވަންތަކަމުގެ މައްޗަށެވެ.

ތާރީޚާއި، ފަޚުރާއި، އަދި ބަދަލުހިފުމުގެ ރޫހު އެކުލެވިގެންވާ މި ފޯރިގަދަ ސެމީ ފައިނަލް މެޗު މިރޭ ކުޅޭއިރު، ގިނަ ބަޔަކު އިންތިޒާރު ކުރަނީ މި ދެ ބާރުގެ ތެރެއިން ފައިނަލަށް ދާނީ ކޮން ޓީމެއްތޯ ބެލުމަށެވެ. މިމެޗު ކުޅޭނީ މިރޭ ރާއްޖެގަޑިން 10:00 ގައި މޮރޮކޯގައެވެ.

ސެމީގެ ދެވަނަ މެޗުގައި މިރޭ މުބާރާތް ބާއްވާ ޤައުމުކަމަށްވާ މޮރޮކޯ އާއި ދެކޮޅަށް ނައިޖީރިއާ ނިކުންނާނެއެވެ. މިމެޗު ކުޅޭނީ ރާއްޖެގަޑިން މިރޭ ދަންވަރު 01:00 ގައެވެ.