އެފްރިކާ ކަޕް އޮފް ނޭޝަންސްގެ ސެމީ ފައިނަލްގައި ނައިޖީރިއާގެ މައްޗަށް 4-2 އިން ޕެނަލްޓީގައި ކުރިހޯދައި މޮރޮކޯ އިން މުބާރާތުގެ ފައިނަލުން ޖާގަ ކަށަވަރުކޮށްފިއެވެ. މި މެޗުގެ ފުރިހަމަ ވަގުތާއި އިތުރު ވަގުތު ކުޅުނުއިރު ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ.

މޮރޮކޯގެ ޕްރިންސް މޫލައި އަބްދުﷲ ސްޓޭޑިއަމްގައި ކުޅުނު މި މެޗު ބަލަން 65,458 ސަޕޯޓަރުން ވަދެ ތިބިއިރު، އޭގެ ތެރޭގައި ގިނައީ މޮރޮކޯގެ ސަޕޯޓަރުންނެވެ. މޮރޮކޯ މޮޅުވުމުގައި އެންމެ ބޮޑު ދައުރެއް އަދާކުރީ ދެ ޕެނަލްޓީ މަތަކުރި ކީޕަރު ޔާސީން ބޯނޯ އެވެ. އަދި މޮރޮކޯ މޮޅުވި ޕެނަލްޓީ ކާމިޔާބުކޮށްދިނީ ޔޫސުފް އެން-ނެސީރީ އެވެ.

Ad by Hajj Corporation

ނައިޖީރިއާގެ ކީޕަރު ސްޓޭންލީ ނުވާބާލީ އެއް ޕެނަލްޓީ މަތަކުރި ނަމަވެސް، ޕެނަލްޓީ ޝޫޓްއައުޓްގައި ބޯނޯގެ ހުށިޔާރުކަން މާ ބޮޑަށް ފާހަގަވެގެންދިޔައެވެ. މިއީ މޮރޮކޯއިން 1976 ވަނަ އަހަރު މި މުބާރާތް ކާމިޔާބުކުރި ފަހުން، އެ ގައުމުން މި ތަށި ހޯދުމަށް ކުރަމުންދާ އުންމީދުތައް އާވެގެންދިޔަ މޮޅެކެވެ. އަމިއްލަ ޤައުމުގައި މޮރޮކޯއިން މިފަހަރުގެ މުބާރާތުގެ ފައިނަލުގައި ނިކުންނައިރު، އެންމެ ފަހުން މޮރޮކޯ ފައިނަލުގައި 2004 ވަނަ އަހަރުގައި ވާދަކޮށްފައިވާއިރު، މިފަހަރު މޮރޮކޯ އިން ފައިނަލަށް ނިކުންނާނީ އެކަމުގެ ހިތްދަތިކަން ފިލުވާލުމަށެވެ. އެފަހަރު މޮރޮކޯ ތޫނިސް އަތުން ބަލިވީ 2-1 އިންނެވެ.

އަންނަ އާދިއްތަ ދުވަހު ކުޅޭ ފައިނަލް މެޗުގައި މޮރޮކޯ ނުކުންނާނީ 2021 ވަނަ އަހަރުގެ ޗެމްޕިއަން ސެނެގާލާ ދެކޮޅަށެވެ. ސެނެގާލް ފައިނަލަށް ދަތުރުކުރީރޭގައި ޓެންޖިއާގައި ކުޅުނު އަނެއް ސެމީ ފައިނަލްގައި މާނޭގެ ގޯލާއެކު މިސްރުގެ މައްޗަށް 1-0 އިން ކުރިހޯދައިގެންނެވެ.