ޔޫއެފާ ޗެމްޕިއަންސް ލީގުގައި ރޭ ފްރާންސްގެ މޮނާކޯ އާއި ދެކޮޅަށް ރެއާލް މެޑްރިޑް ކުޅުނު މެޗު 6-1 ގެ ތަފާތު ބޮޑު ނަތީޖާއަކުން ރެއާލް މެޑްރިޑް ކާމިޔާބުކޮށްފިއެވެ. މިއީ ރެއާލް މެޑްރިޑްގެ ކޯޗު ކަމާއި ދާދި ފަހުން ހަވާލުވި އަލްވާރޯ އަބެލޮއާގެ އިރުޝާދުގެ ދަށުން ޗެމްޕިއަންސް ލީގުގައި އެ ޓީމު ކުޅުނު ފުރަތަމަ މެޗެވެ. މިމެޗުގައި ބާސެލޯނާގެ ލޯނުކުޅުންތެރިޔާ ފަޓީ (މެސީ ލައިޓް) ފުރަތަމަ 11 ގައި ހިމެނުނަސް، އޭނާއަށް އެކަށީގެންވާ ކުޅުމެއް ދެއްކިފައެއް ނުވެއެވެ.

މެޑްރިޑްގެ ސެންޓިއާގޯ ބަރނަބިއު ސްޓޭޑިއަމްގައި ކުޅުނު މި މެޗުގައި ރެއާލް މެޑްރިޑުން ވަނީ މޮޅު ކުޅުމެއް ދައްކާ ލަނޑު ޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. މެޗުގެ ފުރަތަމަ ލަނޑު ފަސްވަނަ މިނިޓުގައި ކާމިޔާބުކޮށްދިނީ ކިލިއަން އެމްބާޕޭއެވެ. އަދި އޭނާގެ ކުރީގެ ޓީމާ ދެކޮޅަށް ކުޅުނު މި މެޗުގެ 26 ވަނަ މިނިޓުގައި އެމްބާޕޭ ވަނީ އިތުރު ލަނޑެއް ޖަހާފައެވެ. މި ލަނޑާއެކު މި ސީޒަނުގެ ޗެމްޕިއަންސް ލީގުގައި އޭނާ ޖެހި ލަނޑުގެ އަދަދު ވަނީ 11 އަށް އަރާފައެވެ.

Ad by Hajj Corporation

މެޗުގެ ފުރަތަމަ ހާފު 2-0 އިން ރެއާލް ކުރީގައި އޮވެގެން ނިމުނު ނަމަވެސް، ދެވަނަ ހާފުގެ ކުރީކޮޅު ފްރޭންކޯ މަސްޓަންޓުއޯނޯ ވަނީ ލަނޑެއް ޖަހާ ފަރަގު ބޮޑުކޮށްފައެވެ. ރެއާލްގެ ހަތަރުވަނަ ލަނޑަކީ މޮނާކޯގެ ކެރަރ އަތުން ބައިކޮށް ވަން ލަނޑެކެވެ. އޭގެ ފަހުން 63 ވަނަ މިނިޓުގައި ވިނިޝިއަސް ޖޫނިއަރ ވަނީ ޓީމުގެ ފަސްވަނަ ލަނޑު ކާމިޔާބުކޮށްދީފައެވެ.

މޮނާކޯގެ ހަމައެކަނި ލަނޑު މެޗުގެ 72 ވަނަ މިނިޓުގައި ޖޯޑަން ޓެޒޭ ކާމިޔާބުކޮށްދިން އިރު، ރެއާލް މެޑްރިޑްގެ ފަހު ލަނޑު މެޗު ނިމެން 10 މިނިޓަށް ވެފައިވަނިކޮށް ޖަހައިދިނީ ޖޫޑް ބެލިންހަމްއެވެ. މި މޮޅާއެކު ރެއާލް މެޑްރިޑަށް ވަނީ ހަތް މެޗުން 15 ޕޮއިންޓް ލިބި، ތާވަލުގެ ދެވަނަ މަގާމަާޤ އަރާފައެވެ.