ޔޫއެފާ ޗެމްޕިއަންސް ލީގުގެ ޕްލޭ-އޮފްގެ ދެވަނަ ލެގުގައި ބެންފީކާގެ މައްޗަށް 2-1 އިން ކުރިހޯދައި، މުބާރާތުގެ ގަދަ 16 އިން ރެއާލް މެޑްރިޑް ޖާގަ ކަށަވަރުކޮށްފިއެވެ. އަލްވާރޯ އަރްބެލޯއާގެ އިރުޝާދުގެ ދަށުން ކުޅެމުން އަންނަ ރެއާލް މެޑްރިޑް މި މެޗުން މޮޅުވުމާއެކު، އެގްރިގޭޓް 3-1 ގެ ނަތީޖާއަކުން ވަނީ ކުރިހޯދާފައެވެ.

މެޗުގެ 14 ވަނަ މިނެޓުގައި ބެންފީކާއިން ވަނީ ލަނޑެއް ޖަހައި ސެންޓިއާގޯ ބާނަބިއު ހިމޭންކޮށްލާފައެވެ. ރަފާ މި ލަނޑު ކާމިޔާބުކުރީ ރެއާލްގެ ރައުލް އަސެންސިއޯ އަތުން ބައިކޮޅަށް ވަންނަން ދިޔަ ބޯޅައެއް ކީޕަރު ކޯޓުއާ ދިފާއުކުރުމުން، ރިބައުންސްގައި ލިބުނު ފުރުސަތުގައެވެ. ނަމަވެސް، އޭގެ ދެ މިނެޓު ފަހުން ފެޑެރީކޯ ވަލްވާޑޭ ތަނަވަސްކޮށްދިން ފުރުސަތަކުން އައުރެލިއަން ޗުއަމެނީ ވަނީ ލަނޑެއް ޖަހައި މެޗުގެ ނަތީޖާ ހަމަހަމަކޮށްފައެވެ.

Ad by Hajj Corporation

މެޗުގެ ފުރަތަމަ ހާފުގައި އާރްދާ ގުލާ ލަނޑެއް ޖެހި ނަމަވެސް، އެ ލަނޑު ޖެހި ވަގުތު ގޮންޒާލޯ ގާސިއާ އޮފްސައިޑްގައި ހުރުމުން އެ ލަނޑުވަނީ ބާތިލް ކޮށްފައެވެ. ރެއާލް މޮޅުވި ލަނޑު މެޗުގެ 80 ވަނަ މިނެޓުގައި ކާމިޔާބުކޮށްދިނީ ވިނީޝިއަސް ޖޫނިއާއެވެ.

ވިނީޝިއަސް މިހާރު ވަނީ ރެއާލް މެޑްރިޑަށް ކުޅުނު އެންމެ ފަހު ފަސް މެޗުގައި ޖުމްލަ ހަ ލަނޑު ޖަހާފައެވެ. މިއީ އޭނާގެ ކެރިއަރުގައި ޖެހިޖެހިގެން އެންމެ ގިނަ މެޗުގައި ލަނޑު ޖެހި ރެކޯޑާ އެއްވަރުވުމެކެވެ. މީގެ އިތުރުން، މިއީ ޗެމްޕިއަންސް ލީގުގެ ނޮކްއައުޓް ބުރެއްގެ ދެ ލެގުގައި ވެސް އޭނާ ލަނޑު ޖެހި ފުރަތަމަ ފަހަރެވެ.

މިމޮޅާއެކު ރެއާލް ގަދަ 16 ގައި ވާދަ ކުރަންޖެހޭނީ މެންޗެސްޓަރ ސިޓީ ނުވަތަ ސްޕޯޓިންގ އާއެވެ. ގަދަ 16 ގެ ގުރުއަތުލުން އޮންނާނީ މާދަމާއެވެ.