ސްޕެނިޝް ލަލީގާގައި ރޭ އަމިއްލަ ދަނޑުގައި ގެޓާފޭއާ ދެކޮޅަށް ކުޅުނު މެޗުން 1-0 އިން ބަލިވެ، ތާވަލުގެ އެއްވަނައިގައި އޮތް ބާސެލޯނާއާ ފަރަގު ކުޑަކުރުމަށް ލިބުނު ރަނގަޅު ފުރުސަތެއް ރެއާލް މެޑްރިޑުން ނަގާލައިފިއެވެ. މި ނަތީޖާއާއެކު ބާސެލޯނާ މިހާރު އޮތީ ހަތަރު ޕޮއިންޓުގެ ކުރީގައެވެ. މިސީޒަނުގައި ގިނަ ޕެނަލްޓީތަކެއްގެ އެހީގައި މޮޅުވަމުން އަންނަ ރެއާޅް މެޑްރިޑް މިމެޗުގައިވެސް ޕެނަލްޓީއެއް ހޯދަން މަސައްކަތް ކުރިނަމަވެސް އެކަން ކާމިޔާބުވާގޮތް ވަނީ ނުވެފައެވެ.

ކީލިއަން އެމްބާޕޭ އާއި ޖޫޑް ބެލިންހަމް ފަދަ މުހިންމު ކުޅުންތެރިން އަނިޔާގެ ސަބަބުން ނުލައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު، ފުރަތަމަ ހާފު ނިމެން ހަ މިނެޓަށް ވެފައި ވަނިކޮށް ކާމިޔާބުކޮށްދިނީ ގެޓާފޭގެ މާޓިން ސަޓްރިއާނޯއެވެ. އޭނާ މި ލަނޑު ޖެހީ އޭރިއާ ބޭރުން ފޮނުވާލި ހިތްގައިމު ވޮލީއަކުންނެވެ.

Ad by Hajj Corporation

މެޗުގެ ކުރީކޮޅު ރެއާލް މެޑްރިޑުން ގިނަ ހަމަލާތަކެއް އުފެއްދި ނަމަވެސް، ގެޓާފޭގެ ގޯލްކީޕަރު ޑޭވިޑް ސޯރިއާ ވަނީ ވިނީޝިއަސް ޖޫނިއާ އާއި އާާދާ ގުލާ ފޮނުވާލި ނުރައްކާތެރި ހަމަލާތައް ހުއްޓުވާފައެވެ. ދެވަނަ ހާފުގައި ރެއާލްއިން މެޗު ޑޮމިނޭޓްކޮށް ގިނަ ފުރުސަތުތަކެއް ތަނަވަސްކުރި ނަމަވެސް، އެންޓޯނިއޯ ރޫޑިގާ އާއި ރޮޑްރީގޯއަށް ލިބުނު ރަން ފުރުސަތުތަކުގެ ބޭނުން ހިފޭގޮތެއް ނުވިއެވެ.

މެޗުގެ ފަހު ވަގުތުކޮޅު ދެ ޓީމުންވެސް ކުޅުންތެރިއަކު ރަތް ކާޑު ފެނިގެން ދަނޑުން ފޮނުވާލާފައިވެއެވެ. ރެއާލްގެ ފްރެންކޯ މަސްޓަންޓުއޯނޯއަށް ރެފްރީއާ ދިމާލަށް ބުނި ބަހެއްގެ ސަބަބުން ސީދާ ރަތް ކާޑެއް ދެއްކިއިރު، ގެޓާފޭގެ އެޑްރިއަން ލީސޯއަށް ދެވަނަ ރީނދޫ ކާޑާއެކު ރަތް ކާޑު ދެއްކީ ވަގުތު ބޭކާރު ކުރުމުގެ ސަބަބުންނެވެ.

މިއީ ލަލީގާގައި ރެއާލް މެޑްރިޑް އަމިއްލަ ދަނޑުގައި ގެޓާފޭ އަތުން ބަލިވި ފުރަތަމަ ފަހަރެވެ. މީގެ ކުރިން ކުޅުނު 16 މެޗުންވެސް ރެއާލް ވަނީ މޮޅުވެފައެވެ. އަދި މިއީ ގެޓާފޭގެ ކޯޗު ހޯސޭ ބޯޑަލަސްގެ ކެރިއަރުގައި ރެއާލް މެޑްރިޑް އަތުން މޮޅުވި ފުރަތަމަ ފަހަރުކަން ފާހަގަކޮށްލެވެއެވެ.

މި މޮޅާއެކު ގެޓާފޭ ވަނީ ތާވަލުގެ 11 ވަނައަށް ޖެހިލާފައެވެ. ރެއާލް މެޑްރިޑަށް މިހާރު އޮތީ ބާސެލޯނާއާ އެއްވަރަށް މެޗު ކުޅެފައިވާއިރު، ކުރިއަށް އޮތް މެޗުތަކުގައި ބާސެލޯނާއަށް ޕޮއިންޓް ގެއްލޭނެ ކަމުގެ އުންމީދުގައެވެ.