އަންނަ އަންގާރަ ދުވަހު ފަށާ، ދިރާސީ އަހަރަށް 1،500 އަށް ވުރެ ގިނަ ދަރިވަރުން މާލެ ސަރަހައްދަށް ބަދަލުކޮށްދީފައިވާ ކަމަށް އެޑިއުކޭޝަން މިނިސްޓްރީން މިއަދު ބުނެފިއެވެ.

އެ މިނިސްޓްރީން މިއަދު އާންމުކުރި ހިސާބުތަކަށް ބަލާއިރު އެންމެ ގިނަ ދަރިވަރުން ބަދަލުކޮށް ދީފައިވަނީ ހުޅުމާލެއަށެވެ. މި ގޮތުން، އަތޮޅުތަކުން 753 ދަރިވަރުން ހުޅުމާލެއަށް ބަދަލުވިއިރު، މާލެއަށް ވަނީ 694 ދަރިވަރުން ބަދަލުކޮށްދީފައެވެ.

Ad by Hajj Corporation

އޭގެ އިތުރަށް، ވިލިމާލެއަށް 83 ދަރިވަރުން، އަތޮޅުތެރެއިން ބަދަލުކޮށްފައި ވެއެވެ.އެއީ، ޖުމުލަ 1،530 ދަރިވަރުންނެވެ.

މާލެ ސަރަހައްދުން ގްރޭޑު އެކަކަށް 1،748 ދަރިވަރުން ވައްދައިދީފައިވާ ކަމަށާއި އަތޮޅުތެރެއިން އެ ގްރޭޑަށް ވައްދައިދޭން އެދުނީ 3،042 ދަރިވަރުން ކަމަށް އެ މިނިސއޓްރީން ބުނެފައިވެއެވެ.

މާލެ ސަރަޙައްދުގެ ސްކޫލްތަކަށް އޮންނަ ޑިމާންޑު އިތުރުވަމުންދާތީ މާލެ ސަރަޙައްދުގައި އިތުރު ސްކޫލްތައް ހުޅުވުމުގެ މަސައްކަތް ސަރުކާރުންދަނީ ކުރަމުންނެވެ. އޭގެތެރޭގައި މިއަހަރުގެ ސްކޫލްގެ ކިޔެވުން ފެށޭއިރު އަލަށް ހުޅުވާ ޝަހީދު ޢަލީ ސްކޫލަށް ވަނުމަށް އެދި މިހަތަނަށް 1900 އެއްހާ ދަރިވަރުން ހުށައަޅާފައިވާކަމަށް ތަޢުލީމީ ވުޒާރާއިން ހާމަކޮށްފައި ވެއެވެ.

ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެފައިވަނީ މިއަހަރުގެ ދިރާސީ އަހަރުގެ ކިޔެވުން ފެށުމަށް ތައްޔާރުވެފައިވާކަމަށާއި ސްކޫލްތައް ހުޅުވޭއިރު ޓީޗަރުންނާއި ފޮތްތައް ހަމަވާނެކަމަށެވެ.