ޞިއްޙީ ދާއިރާގެ ޢުމްރާނީ ވަސީލަތްތައް ޤާއިމުކުރުމަށް އެކި މަރުހަލާތަކުގައި 5 ބިލިއަން ރުފިޔާގެ މަސައްކަތް މިވަގުތުވެސް ކުރިއަށްދާކަމަށް ޞިއްޙަތާބެހޭ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ.

"ތަރުޖަމާނާއެކު" ޕޮޑްކާސްޓްގައި، ޞިއްޙީ ދާއިރާގެ ވަސީލަތްތައް ޤާއިމުކުރުމުގެ މަސައްކަތްތަކާ ގުޅޭގޮތުން ވާހަކަދައްކަވަމުން ވަޒީރު ނާޡިމް ވިދާޅުވީ، ޞިއްޙީ މަރުކަޒުތަކާއި، އަތޮޅު ހޮސްޕިޓަލްތަކާއި އަރބަން ސެންޓަރުތަކުގެ ގޮތުގައި ކަނޑައަޅާފައިވާ 7 ސަރަޙައްދުގެ މައި ހޮސްޕިޓަލްތަކުގެ އިތުުރުން ރީޖަނަލް ހޮސްޕިޓަލްތައް ހިމެނޭހެން ގިނަ މަސައްކަތްތަކެއް ކުރިއަށްދާކަމަށެވެ.

Ad by Hajj Corporation

ޞިއްޙީ ޚިދުމަތްތަކަށް މާލެއަށް ބަރޯސާވުން ކުޑަކުރުމަށް ގިނަ މަޝްރޫޢުތަކެއް އަތޮޅުތަކަށް ޚާއްސަކޮށް ކުރިއަށްދާކަމަށް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ ސަރުކާރު ހަވާލުވެ، އަތޮޅުތަކުގެ ޞިއްޙީ ޚިދުމަތްތައް ފުޅާކުރަން ބެލިއިރު އޮތް އެންމެ ބޮޑު އެއް ގޮންޖެހުމަކީ އެކަމަށް ބޭނުންވާ އިމާރާތުގެ ދަތިކަންކަމަށެވެ. އެހެންކަމުން ޖާގަ ހުރި މިންވަރުން ޚިދުމަތްތައް ފުޅާކުރަމުންދާއިރު، އިތުރު ޚިދުމަތްތަކަށް ބޭނުންވާ ޢުމްރާނީ ވަސީލަތްތައް ޤާއިމުކުރުމުގެ މަސައްކަތްތައް ބާރު ދުވެލީގައި ކުރިއަށްދާކަމަށް ވަޒީރު ވިދާޅުވިއެވެ. އެގޮތުން ޞިއްޙީ ޚިދުމަތްދޭ 160 އަށްވުރެ ގިނަ ފެސިލިޓީގެ ޢުމްރާނީ ތަރައްޤީއާއި ގުޅޭ މަސައްކަތްތައް ކުރަމުންދާކަމަށް ވަޒީރު ނާޡިމް ވިދާޅުވިއެވެ.

ވަޒީރު ވިދާޅުވީ މިތަންތަނަށް ބޭނުންވާ ވަސީލަތްތައް ހޯދުމުގެ މަސައްކަތުގެ އިތުރުން، ހޮސްޕިޓަލްތަކަށް ބޭނުންވާ އިންސާނީ ވަސީލަތްތައް ހޯދުމުގެ މަސައްކަތްތައްވެސް، ވޭތުވެދިޔަ ކައިރި މާޒީއެއްގައި ނާންނަހާ ބޮޑެތި ކުރިއެރުންތަކެއް ގެނެސްފަވާކަމަށެވެ.

ޓަރޝަރީ ފެންވަރަށް ތަރައްޤީކުރަމުންދަނީ ހދ. ކުޅުދުއްފުށީ ރީޖަނަލް ހޮސްޕިޓަލް، ރ. އުނގޫފާރު ރީޖަނަލް ހޮސްޕިޓަލް، ލ. ގަން ރީޖަނަލް ހޮސްޕިޓަލް، ޑރ. ޢަބްދުއް ޞަމަދު މެމޯރިއަލް ހޮސްޕިޓަލް އަދި ޏ.ފުވައްމުލަކު ހޮސްޕިޓަލެވެ.

މި ހޮސްޕިޓަލްތަކުގައި ސަބް-ސްޕެޝަލިޓީސްގެ ޚިދުމަތް، އެމް.އާރް.އައިގެ ޚިދުމަތް، ސީޓީ ސްކޭންގެ ޚިދުމަތް، ބްލަޑް ބޭންކުގެ ޚިދުމަތް، ލެބޯޓަރީގެ ޚިދުމަތްތައް ފުޅާކުރުން، ބަލިތައް ދެނެގަތުމުގެ ޚާއްސަ ޓެސްޓުތަކުގެ އިތުރުން ހޮސްޕިޓަލުގެ އެނދުގެ ކެޕޭސިޓީ 100 އަށް އިތުރުކުރުމުގެ މަސައްކަތް ހިމެނެއެވެ.

ޞިއްޙީ ދާއިރާގެ ޢުމްރާނީ ވަސީލަތްތަކާއި ޚިދުމަތް ފުޅާކުރުމަށް މިއަހަރަށްވެސް 8.8 ބިިލިއަން ރުފިޔާގެ ބަޖެޓެއް ވަނީ ކަނޑައަޅާފައެވެ.