ތަޢުލީމަކީ، ދެމެހެއްޓެނިވި ތަރައްގީއާއި ކުރިއެރުމުގެ ބިންގާކަމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދުނިޔޭގެ ނިސްބަތުން ފާހަގަކުރާ ތައުލީމުގެ ދުވަހުގެ މުނާސަބަތުގައި ކުރެއްވި ޕޯސްޓެއްގައި ރައީސް ވަނީ، ތައުލީމު ކުރިއެރުވުމުގެ މަސައްކަތުގައި ޒުވާނުންގެ ދައުރު ފުޅާކޮށް، އެދާއިރާގައި ޒުވާނުން ބާރުވެރިކުރުމަށް ސަރުކާރުން މަސައްކަތްކުރާނެ ކަމުގެ ޔަގީންކަން ދެއްވާފައެވެ. މިކަމުގެ ސަބަބުން، ރާއްޖޭގެ ތައުލީމީ ނިޒާމު ވެގެންދާނީ ހުރިހާ ކުދިންވެސް ބައިވެރިކުރުވަނިވި، އެންމެނާވެސް ގުޅޭ އަދި ކުރިއަރުވަނިވި ދާއިރާއަކަށް ކަމަށް ރައީސް ވިދާޅުވިއެވެ.

Ad by Hajj Corporation

މިސަރުކާރުން ތައުލީމަށް ދީފައިވާ އަހަންމިއްޔަތުކަން ހާމަކުރައްވާ، ރައީސް ވިދާޅުވީ މި ސަރުކާރުން ގައުމީ ތަރައްގީގެ ދާއިރާގައިވެސް އެންމެ އިސްކަމެއް ދީފައިވާނީ ތައުލީމަށް ކަމަށެވެ. އެގޮތުން، މިދިޔަ ދެ އަހަރު ތެރޭ 6000 އަށް ވުރެ ގިނަ ދަރިވަރުން، ފުރަތަމަ ޑިގްރީ ސްކީމްގެ ދަށުން ދަސްވެނިވެފައިވާ ކަމަށާއި މި މުއްދަތުގެ ތެރޭގައި ސްޓޫޑެންޓް ލޯނުގެ ގޮތުގައި ބިލިއަނަކަށްވުރެ ގިނަ ރުފިޔާ ދޫކުރެވިފައިވާ ކަމަށެވެ.

ރައީސް ވިދާޅުވީ، ތައުލީމަށް ފުރުސަތުތައް ފަހިކޮށްދިނުމުން މަންފާކުރާނީ އެންމެ ދަރިވަރަކަށް އެކަނި ނޫންކަމަށާއި އެކަމުގެ ސަބަބުން މުޅި ގައުމުގެ މުސްތަގުބަލުވެސް ފާގަތިވެގެންދާނެ ކަމަށެވެ. އެހެންކަމުން، ކޮންމެ ދަރިވަރަކަށްވެސް އެދަރިވަރެއްގެ ދާއިރާއިން ކުރިއަރާ، މުޅި ގައުމުގެ ތަރައްގީއަށް މަސައްކަތްކުރުމުގެ ފުރުސަތު، އެންމެން އެކުވެގެން ތަނަވަސްކޮށްދިނުމަކީ މުހިންމު ކަމެއްކަން ރައީސް ފާހަގަކުރެއްވިއެވެ.

ކޮންމެ އަހަރެއްގެ ޖަނަވަރީ މަހުގެ 24 ވަނަ ދުވަސް، ދުނިޔޭގެ ތައުލީމުގެ ދުވަހުގެ ގޮތުގައި ފާހަގަކުރަން އދ އިން ނިންމާފައިވަނީ، ސުލްހަވެރިކަމަށާއި ތަރައްގީގެ މިސްރާބަށް ވާސިލުވުމަށް ތައުލީމު އަދާކުރާ ދައުރު ފާހަގަކުރުމުގެ ގޮތުންނެވެ.