ދުނިޔޭގެ ހަމަނުޖެހުންތައް ހައްލުކުރުމަށް އަމާޒުކޮށްގެންކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް އުފައްދަވާފައިވާ 'ބޯޑް އޮފް ޕީސް' އިސްނެގުމުގައި ބައިވެރިވުމަށް ކެނެޑާއަށް ދީފައިވާ ދައުވަތު ބުރާސްފަތި ދުވަހު އަނބުރާ ގެންދަވައިފިއެވެ.

ޓްރަމްޕްގެ މި ނިންމެވުން އައިސްފައިވަނީ ދާވޯސްގައި ބޭއްވުނު ވޯލްޑް އިކޮނޮމިކް ފޯރަމްގައި ކެނެޑާގެ ބޮޑުވަޒީރު މާކް ކާނީ ދެއްވި ތަގުރީރެއްގައި، ބާރުގަދަ ގައުމުތަކުން އިގްތިސާދީ ގުޅުންތަކާއި ޓެރިފްތައް ހަތިޔާރެއްގެ ގޮތުގައި ބޭނުންކުރާތީ އެކަން ކުށްވެރިކުރެއްވުމާ ގުޅިގެންނެވެ.

Ad by Hajj Corporation

ކެނެޑާގެ ބޮޑުވަޒީރުގެ ތަގުރީރާއި ޓްރަމްޕްގެ ރައްދު

ކެނެޑާގެ ބޮޑުވަޒީރު މާކް ކާނީ ދާވޯސްގައި ވިދާޅުވީ، ގަވާއިދުތަކުގެ މައްޗަށް ބިނާވެފައިވާ ދުނިޔޭގެ ނިޒާމު ނިމުމަކަށް އައިސްފައިވާކަން ގައުމުތަކުން ގަބޫލުކުރަންޖެހޭ ކަމަށެވެ. އަދި ކެނެޑާއަކީ އެމެރިކާގެ ނުފޫޒުގެ ޝިކާރައަކަށް ނުވެ، "މެދުފަންތީގެ ބާރުތަކަށް" ގުޅިގެން މަސައްކަތް ކުރެވިދާނެ ގޮތުގެ ނަމޫނާއެއް ކަމަށް އޭނާ ފާހަގަކުރެއްވިއެވެ. މީގެ ރައްދުގައި ޓްރަމްޕް ވަނީ ކެނެޑާ ދެމިއޮތީ އެމެރިކާގެ ސަބަބުން ކަމަށް ވިދާޅުވެ، ކާނީ ޝުކުރުވެރިވާންޖެހޭނެ ކަމަށް ވިދާޅުވެފައެވެ.

ޓްރަމްޕްގެ 'ޓްރުތް ސޯޝަލް' ގައި ކުރެއްވި ޕޯސްޓެއްގައި ވިދާޅުވީ، "މި ސިޓީއަކީ، މިހާތަނަށް އެކުލަވާލެވޭ އެންމެ ޝަރަފުވެރި ލީޑަރުންގެ ބޯޑު ކަމަށްވާ 'ބޯޑް އޮފް ޕީސް' ގައި ކެނެޑާ ބައިވެރިވުމަށް ދީފައިވާ ދައުވަތު އަނބުރާ ގެންދާކަން އަންގައިދޭ ލިޔުމެއް ކަމުގައި ބައްލަވާ" ކަމަށެވެ. މިކަމާ ގުޅޭގޮތުން ކާނީގެ އޮފީހުންނާއި ވައިޓް ހައުސްއިން ރަސްމީ ބަހެއް މިހާތަނަށް ދީފައެއް ނުވެއެވެ.

ސްޕޭނުން ދައުވަތު ގަބޫލެއް ނުކުރި

ކެނެޑާގެ ދައުވަތު އަނބުރާ ގެންދިޔަ ދަނޑިވަޅުގައި، ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވަނީ ޓްރަމްޕްގެ މި ބޯޑުގައި އެ ގައުމުން ބައިވެރިނުވާނެކަން އިއުލާން ކުރައްވާފައެވެ. ބްރަސަލްސްގައި ބޭއްވުނު އީޔޫ ސަމިޓަށް ފަހު ސަންޗޭޒް ވިދާޅުވީ، "އަޅުގަނޑުމެން ދައުވަތަށް ޝުކުރު އަދާކުރަން، އެކަމަކު މި ދައުވަތު ގަބޫލެއް ނުކުރަން" ކަމަށެވެ.

ސަންޗޭޒް ވިދާޅުވި ގޮތުގައި މި ނިންމުން ނިންމި މައިގަނޑު ސަބަބަކީ ބައިނަލްއަގުވާމީ ގާނޫނުތަކާއި، އދ. އަދި މަލްޓިލޭޓަރަލިޒަމްއަށް މެޑްރިޑުން ދޭ އަހައްމިއްޔަތުކަމެވެ. މީގެ އިތުރުން، 'ބޯޑް އޮފް ޕީސް' ގައި ފަލަސްތީނުގެ އޮތޯރިޓީ ހިމެނިފައި ނުވާކަން ވެސް ސަންޗޭޒް ފާހަގަކުރެއްވިއެވެ.

އިޒްރޭލުގެ އިތުރުން މެދުއިރުމަތީގެ ގައުމުތައް ކަމަށްވާ ގަތަރު، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް އިން ވަނީ މި ބޯޑުގައި ބައިވެރިވެފައެވެ.

ޓްރަމްޕް ވިދާޅުވި ގޮތުގައި މި ބޯޑުގެ ދާއިމީ މެންބަރުން ކޮންމެ ގައުމަކުން 1 ބިލިއަން ޑޮލަރުގެ ފައިސާގެ އެހީއެއް ދޭންޖެހޭނެއެވެ.
"މި ބޯޑު ފުރިހަމައަށް އެކުލަވާލެވުމުން، އަޅުގަނޑުމެން ބޭނުން ކޮންމެ ކަމެއް ކުރެވޭނެ," ބުރާސްފަތި ދުވަހު ސްވިޒަލޭންޑްގައި ހުންނަވައި ޓްރަމްޕް ވިދާޅުވިއެވެ. "އަދި އަޅުގަނޑުމެން އެކަން ކުރާނީ އދ. އާ ގުޅިގެން."

މި ބޯޑު އުފެއްދުމަށް އދ. ގެ ސަލާމަތީ މަޖިލީހުގެ ގަރާރަކުން ތާއީދުކޮށްފައިވަނީ ޓްރަމްޕްގެ ގާޒާ ސުލްހައިގެ ރޭވުމުގެ ބައެއްގެ ގޮތުގައެވެ. އދ. ގެ ތަރުޖަމާނު ރޮލާންޑޯ ގޯމޭޒް ބުރާސްފަތި ދުވަހު ވިދާޅުވީ، އދ. އިން މި ބޯޑާ އެކު މަސައްކަތް ކުރާނީ ހަމައެކަނި އެ އޮނިގަނޑުގެ ތެރެއިން ކަމަށެވެ.

މި ބޯޑުގައި ހިމެނޭ އެހެން ގައުމުތަކުގެ ތެރޭގައި އާޖެންޓީނާ، ބަހްރޭން، މޮރޮކޯ، ޕާކިސްތާން އަދި ތުރުކީ ހިމެނެއެވެ. އެމެރިކާގެ އެހެން...އިނގިރޭސިވިލާތާއި، ފަރަންސޭސިވިލާތް އަދި އިޓަލީ ފަދަ އެމެރިކާގެ އެހެން ބައިވެރިން، މިވަގުތަށް މީގައި ބައިވެރިނުވާނެކަމުގެ އިޝާރާތެއް ވަނީ ދީފައެވެ.

'ބޯޑް އޮފް ޕީސް' އަކީ ގާޒާގެ ހަނގުރާމަ ހުއްޓާލުމުގެ އެއްބަސްވުން ވަރުގަދަކުރުމަށް އުފެއްދި ބޯޑެކެވެ. ނަމަވެސް ސްޕޭނުން ވަނީ މިފަދަ ނިޒާމުތަކަށްވުރެ ބައިނަލްއަގުވާމީ މުއައްސަސާތަކަށް އިސްކަންދޭނެކަން ހާމަކޮށްފައެވެ.