އެމެރިކާއިން އީރާނަށް އަސްކަރީ ހަމަލާއެއް ދީފިނަމަ، އުރުދުން އާއި ޔުނައިޓެޑް އަރަބް އެމިރޭޓްސް (ޔޫއޭއީ) އިން އެމެރިކާއަށް ބޭނުންވާ މުހިންމު ލޮޖިސްޓިކް އަދި އިންޓެލިޖެންސް އެހީތެރިކަން ފޯރުކޮށްދޭނެ ކަމަށް "އިސްރާއީލް ހަޔޯމް" ނޫހުން ރިޕޯޓްކޮށްފިއެވެ. 

އިއްޔެ ޝާއިއުކުރި މި ރިޕޯޓުގައިވާ ގޮތުން، މި ދެ ގައުމުގެ އިތުރުން އިނގިރޭސިވިލާތުން ވެސް މިފަދަ އޮޕަރޭޝަނެއްގައި ބައިވެރިވާނެ ކަމަށް ވަނީ ބުނެފައެވެ.

Ad by Hajj Corporation

އިންޓެލިޖެންސް ހިއްސާކުރުމާއި މިސައިލް ދިފާއު

މި ގައުމުތަކުން ފޯރުކޮށްދޭނެ އެހީތެރިކަމުގެ ތެރޭގައި އީރާނުގެ އަމާޒުތައް ދެނެގަތުމަށާއި އެތަންތަނަށް ފާރަވެރިވުމަށް ބޭނުންވާ އޮޕަރޭޝަނަލް މައުލޫމާތު ވަގުތުން ވަގުތަށް ވޮޝިންގޓަނާ ހިއްސާކުރުން ހިމެނެއެވެ. މީގެ އިތުރުން، ބަދަލުހިފުމުގެ ގޮތުން އީރާނުން ފޮނުވާލާ ޑްރޯން ނުވަތަ މިސައިލްތައް ހުއްޓުވުމުގައި އުރުދުން އާއި ޔޫއޭއީ އިން މުހިންމު ދައުރެއް އަދާކުރާނެކަމަށް މި ރިޕޯޓުގައި ބުނެފަވެއެވެ. މީގެ ކުރިން 2024 އަދި 2025 ގައި ހިނގި ހަމަނުޖެހުންތަކުގައި ވެސް އުރުދުން އިން ވަނީ އެގައުމުގެ ވައިގެ ސަރަހައްދުން ދަތުރުކުރި މިސައިލްތައް ވައްޓާލާފައެވެ.

ސަރަހައްދީ މަސްލަހަތާއި ސިއްރު އެއްބާރުލުން

މި ގައުމުތަކުން ފާޅުގައި އަސްކަރީ ކުރިމަތިލުންތަކާ ދެކޮޅަށް ވާހަކަދެއްކި ނަމަވެސް، މި ރިޕޯޓްކުރެވޭ އެއްބާރުލުމަކީ "ދިފާއީ ސިޔާދަތު" ހިމާޔަތްކުރުމުގެ އުސޫލުގެ ދަށުން ކުރިއަށްދާ ކަމެއް ކަމަށް ވަނީ ބުނެފައެވެ. މި ރިޕޯޓް އައިސްފައިވަނީ އެމެރިކާގެ އަސްކަރީ ބާރުތައް ސަރަހައްދުގައި ވަރުގަދަކުރަމުންދާ ދަނޑިވަޅެއްގައެވެ. އެގޮތުން މަތިންދާބޯޓު އުފުލާ މަނަވަރު "އަބްރަހަމް ލިންކަން" ސަރަހައްދުގައި އޮތްއިރު، އެމެރިކާގެ ފައިޓަރު ޖެޓްތައް ވަނީ އުރުދުންގައި ގާއިމުކޮށްފައެވެ.

އީރާނުގެ ދާޚިލީ ހާލަތާއި ބައިނަލްއަގުވާމީ ފިއްތުންތައް

މި ރިޕޯޓް އާންމުވެފައިވަނީ 2025 ޑިސެމްބަރުން ފެށިގެން އީރާނުގައި ސަރުކާރާ ދެކޮޅަށް ބޮޑެތި މުޒާހަރާތަކެއް ކުރިއަށް ގެންގޮސްފައިވަނިކޮށެވެ. އެމެރިކާގެ ޓްރަމްޕް ސަރުކާރުން އީރާނުގެ ނިޒާމު ބަދަލުކުރުމުގެ އިޝާރާތްތަކެއް ދެމުންދާއިރު، ސަރަހައްދީ ގައުމުތަކަށް ވަނީ ވަކި ފަރާތެއް އިޚްތިޔާރުކުރުމަށް ނުވަތަ ސިއްރުން ތާއީދުކުރުމަށް މަޖުބޫރުވެފައެވެ.

ސަރަހައްދީ ގައުމުތަކުގެ މެދުގައި އޮތް ބައިބައިވުން

އީރާނުގެ މައްސަލައިގައި އަރަބި ގައުމުތަކުގެ މެދުގައި ޚިޔާލު ތަފާތުވުންތަކެއް އެބަހުއްޓެވެ. ޔޫއޭއީ އިން އީރާނަށް ވަރުގަދަ ހަމަލާއަކަށް ތާއީދުކުރާކަމަށް ބުނެވޭއިރު، ސައުދީ އަރަބިއްޔާ، ގަތަރު އަދި އޮމާން އިން ބޭނުންވަނީ ސުލްހަވެރި ހައްލެކެވެ. މި ގައުމުތަކުން ބާރުއަޅަނީ ތެޔޮ އެކްސްޕޯޓް ކުރުމަށާއި ސަރަހައްދީ ހަމަޖެހުމަށް ބުރޫއަރާފާނެ ފަދަ ހަނގުރާމައަކުން ދުރުހެލިވުމަށެވެ.

އުރުދުން އާއި ޔޫއޭއީ އިން އެމެރިކާއަށް ލޮޖިސްޓިކަލް އެހީތެރިކަން ފޯރުކޮށްދިން ނަމަވެސް، އީރާނުން ދީފާނެ ބަދަލުހިފުމުގެ ހަމަލާތަކުގެ ނުރައްކާ އެންމެ ބޮޑަށް އޮތީ ވެސް ހަމަ އެ ގައުމުތަކަށް ކަމަށް މަސްރަހު ދިރާސާކުރާ ފަރާތްތަކުން ފާހަގަކުރެއެވެ.