ގައުމީ ފުޓްސަލް ޓީމުން ހޯދި ތާރީޚީ ކާމިޔާބީ ފާހަގަކުރުމަށް ހޯމަދުވަހުގެ ރޭ މާލެ ސިޓީގައި ހަވާއަރުވަން ނިންމައިފިއެވެ.

ކުޅިވަރާއި ހަށިހެޔޮކަމާއި ބެހޭ ވުޒާރާއިން ބުނީ ގައުމީ ފިރިހެން ފުޓްސަލް ޓީމު ހޯރި ކާމިޔާބު ފާހަގަކުރަން މާދަމާ ރޭ އާޓިފިޝަލް ބީޗުގައި ހަވާއަރުވަން ނިންމާފައިވާ ކަމަށާއި، ޤައުމީ ޓީމަށް މަރުހަބާ ކިޔުމުގެ ގޮތުން ޚާއްސަ ހަރަކާތްތަކެއް ކުރިޔަށް ގެންދަން ނިންމާފައިވާ ކަމަށެވެ.

މިއީ ސަރަހައްދީ މުބާރާތަކުން ރާއްޖޭގެ ފުޓްސަލް ޓީމު ހޯދި ފުރަތަމަ ކާމިޔާބީއެވެ.

ކުޅުނު ހުރިހާ މެޗެއް ކާމިޔާބުކޮށް ރާއްޖޭގެ ގައުމީ ޓީމުން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ތަށި އުލުފާލިއިރު ރާއްޖޭގެ ގައުމީ ޓީމަށް މަރުހަބާކިއުމަށް ވިހާވެސް ގިނަ ބަޔަކު އާޓިފިޝަލް ބީޗަށް ދިއުމަށް ސަރުކާރުން އެދެއެވެ.

އެފްއޭއެމާއި ކުޅިވަރު ވުޒާރާއިން ގުޅިގެން ގައުމީ ޓީމަށް މަރުޙަބާ ކިއުމުގެ ހަރަކާތްތައް ރާވާފައިވާއިރު މާދަމާރޭ ހަވާ އެރުވުމުގެ އިތުރުން އާޓިފިޝަލް ބީޗުގައި ބޮޑުބެރުގެ ހަރަކާތްތައްވެސް އޮންނާނެއެވެ. އަދި ގައުމީ ޓީމުގެ ކުޅުންތެރިންނާއެކު ފޮޓޯ ނެގުމާއި، ޓްރޮފީއާއެކު ފޮޓޯޯ ނެގުމުގެ ފުރުސަތުވެސް އާންމުންނަށް އޮންނާނެއެވެ.

ގައުމީ ފުޓްސަލް ޓީމުން މި ސަރަހައްދުގެ އެއްވަނަ ހޯދައިގެން ރާއްޖެ އައުމަށް ހަމަޖެހިފައިވާ ބޯޓު ވެލާނަ އިންޓަނޭޝަނަލް އެއަޕޯޓަށް ޖެއްސުމާއެކު އުފާ ފާޅުކުރުމައި މަރުހަބާ ކިޔުމުގެ ހަރަކާތްތައް ވެލާނާ އިންޓަނޭޝަނަލް އެއާޕޯޓާއި ހަމައިން ފެށޭނެއެވެ.

އެގޮތުން ވީއައިޕީން ޓީމަށް މަރުހަބާ ކިޔުމާއި، އެއަޕޯޓުން ޓީމު މާލެ އައުމަށްފަހު އަމީނީ މަގާއި މަޖީދީ މަގުން ޕިކަޕުގައި އާންމުންނަށް ފެންނަ ގޮތަށް ޓްރޮފީއާއެކު ޓީމުން ދަތުރު ކުރާނެއެވެ. އަދި އާޓިފިޝަލް ބީޗަށް އައިސް ބީޗުގައި އޮންނަ ހަރަކާތްތަކުގައިި އާންމުންނާއެކު ޓީމުގެ އޮފިޝަލުންނާއި ކުޅުންތެރިން ބައިވެރިވާނެއެވެ.

Ad by Hajj Corporation