މާލެ ސިޓީ ޒީނަތްތެރިކޮށް ރީތިކުރުމަށްޓަކައި ހަދަންޖެހޭ ޕާކުތަކާއި، މައިޒާންތަކާއި، އަދި ބަސް ސްޓޭންޑްތަކުގެ މަސައްކަތްތައް މާލެ ސިޓީ ކައުންސިލްގެ 4 ވަނަ ދައުރުގައި ނިންމާފައިވާނެ ކަމަށް ކުރީގެ ޑެޕިއުޓީ މޭޔަރު މުހައްމަދު އަރީޝް ވިދާޅުވެއްޖެއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި އަރީޝް ވިދާޅުވީ، މާލެ ޒީނަތްތެރިކުރުމުގެ އިތުރުން މާލެއަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ ފެންބޮޑުވުމުގެ މައްސަލަ ހައްލުކުރުމުގެ މަސައްކަތްތައް ވެސް 4 ވަނަ ދައުރުގެ ތެރޭގައި ނިންމާފައިވާ ކަމަށެވެ. އަދި ކުރިއަށް އޮތް 5 ވަނަ ދައުރުގައި އަލަށް ކުރަންޖެހޭނެ މާ ބޮޑު ކަމެއް އޮންނާނެ ކަމަށް ގަބޫލުފުޅު ނުކުރައްވާ ކަމަށްވެސް އޭނާ ވިދާޅުވިއެވެ.

Ad by Hajj Corporation

އަރީޝް ވިދާޅުވީ ޕީއެންސީގެ ކައުންސިލުން ނިންމާފައިވާ މި މަސައްކަތްތައް 5 ވަނަ ދައުރުގައި އަންނަ ކައުންސިލުން ރަނގަޅަށް ބަލަހައްޓައި މެއިންޓެއިން ކުރާނެ ކަމަށް އުންމީދު ކުރައްވާ ކަމަށެވެ. 

"ތިބޭފުޅުންނަށް އޮތީ މެއިންޓެނަންސް. އަޅުގަނޑުމެން މިހަވާލުކުރީ މާލެއަށް އަޅުގަނޑުމެން ގެނައީ ތަރައްގީ ބަލަހައްޓަން،" އަރީޝް ވިދާޅުވިއެވެ.

މީގެ އިތުރުން، އިދިކޮޅު އެމްޑީޕީއަށް ފާޑުވިދާޅުވަމުން އަރީޝް ވިދާޅުވީ، އެމްޑީޕީއަކީ ގައުމަށްޓަކައި މިހާތަނަށް އެއްވެސް އުންމީދީ މަސައްކަތެއް ކުރި ބައެއް ނޫން ކަމަށެވެ. އަދި 4 ވަނަ ދައުރުގައި ސިޓީ ކައުންސިލުން ކުރި މަސައްކަތްތަކަކީ މާލެއަށް ގެނެވުނު ބޮޑު ތަރައްގީއެއްގެ ގޮތުގައި އޭނާ ފާހަގަކުރެއްވިއެވެ.

ކައުންސިލްގެ 4 ވަނަ ދައުރުގައި މާލެ އަށް ބޮޑު ބަދަލެއް ގެނެސްދެއްވައި ރައްޔިތުންނަށް ހިތްފަސޭހަ އަރާމް ސިޓީއަކަށް ހަދައިދިނުމުގެ މަސައްކަތުގެ މޭސްތިރިއަކީ އެއިރުގެ މޭޔަރު، މިހާރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުކަން ފާހަގަކޮށްލެވެއެވެ.