އިއާދަކުރަނިވި ހަކަތައަށް ބަދަލުވުމަށް ކުރެވޭ މަސައްކަތް ހަރުދަނާކޮށް އެންމެން އެކުގައި މަސައްކަތްކުރުމަށް ރައީސުޖުމްހޫރިއްޔާ ޑރ.މުޙައްމަދު މުޢިއްޒު ގޮވާލައްވައިފިއެވެ.

ރައީސުލްޖުމްހޫރިއްޔާ މިކަމަށް ގޮވާލެއްވީ، ސާފު ހަކަތައިގެ ދުވަހުގެ މުނާޞަބަތުގައި ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

މި ޕޯސްޓުގައި ރައީސް ވިދާޅުވީ ހަކަތައިގެ ރައްކާތެރިކަން ކަށަވަރުކުރުމަކީ، ގައުމުގެ ތަރައްޤީއަށް މުހިންމު ކަމެއް ކަމަށެވެ. އެގޮތުން، މޫސުމަށް އަންނަ ބަދަލުތަކުގެ ސަބަބުންނާއި، ތިމާވެށްޓަށް އަންނަ ބަދަލުތަކުގެ ސަބަބުން ކުރިމަތިވާ ގޮންޖެހުންތަކުން އަރައިގަތުމުގެ އިތުރުން، ތަޢުލީމާއި، ޞިއްޙީ ޚިދުމަތާއި، އިޤްތިޞާދީ ފުރުޞަތުތައް މީގެސަބަބުން އިތުރުވެގެންދާނެކަމަށް ރައީސް ވިދާޅުވިއެވެ.

ރައީސްގެ މެސެޖުގައި، ބައިނަލްއަޤްވާމީ ފެންވަރުގައި ތިމާވެށްޓާއި ރައްޓެހި ހަކަތައިގެ ދައުރުގެ މުހިންމުކަން ހަނދާންކޮށްދެއްވިއެވެ. އަދި 2028 ވަނަ އަހަރު ނިމިގެންދާއިރު، ރާއްޖޭގައި ބޭނުން ކުރާ ކަރަންޓު ހަކަތައިގެ 33 އިންސައްތައަކީ، އިޔާދަކުރަނިވި ހަކަތައަށް ހެދުމަކީ އަދުގެ ސަރުކާރުން ވަރުގަދަ ޢަޒުމެއްގައި ކަނޑައަޅުއްވާފައި އޮތް އަމާޒެއްކަން ރައީސް ފާހަގަކުރެއްވިއެވެ.

Ad by Hajj Corporation

ރައީސުލްޖުމްހޫރިއްޔާގެ މެސެޖު ނިންމަވާލައްވާލެއްވީ، ދުނިޔެ ހިމާޔަތްކުރުމަށްޓަކައި، އިއާދަކުރަނިވި ހަކަތައަށް ބަދަލުވުމަށް ކުރެވޭ މަސައްކަތް ހަރުދަނާކޮށް، އެންމެން އެކުގައި މަސައްކަތްކުރުމަށް ގޮވާލައްވަމުންނެވެ.