raw

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދިވެހި ގައުމީ ފުޓްސަލް ޓީމަށް 1 މިލިއަން ރުފިޔާ ދެއްވުމަށް ނިންމަވައިފިއެވެ.

Ad by Hajj Corporation

މިކަން ހާމަކުރެއްވީ ސްޕޯޓްސް މިނިސްޓަރ ޢަބްދުﷲ ރާފިޢު އެވެ.

މިނިސްޓަރ ވިދާޅުވީ މިއީ ރާއްޖޭގެ ގައުމީ ފުޓްސަލް ޓީމުން ސާފް ފުޓްސަލް ޗެމްޕިއަންޝިޕް ކާމިޔާބުކުރުމުގެ އިތުރުން ގައުމީ ފުޓްބޯޅަ ޓީމުން މިދިޔަ އަހަރު ބޭއްވި ސުޕަރ ކަޕްގެ ޗެންޕިއަންކަން ހޯދުމާ ގުޅިގެން ބޯނަހެއްގެ ގޮތުގައި ދެއްވުމަށް ނިންމެވި ފައިސާ ކަމަށެވެ. ބޯނަސް ދިނުމަށް ހަމަޖެހިފައިވަނީ ހުރިހާ ކުޅުންތެރިންނާއި އޮފިޝަލުން ހިމެނޭ ގޮތަށް މުޅި ޓީމަށް ކަމަށް ވެސް މިނިސްޓަރ ވިދާޅުވިއެވެ. އަދި ފައިސާ ހަވާލުކުރާނީ ފުޓުބޯލް އެސޯސިއޭޝަން މެދުވެރިކޮށް ކަމަށް ވެސް ވަނީ ވިދާޅުވެފައެވެ.

ސްރީލަންކާ ފުޓްބޯޅަ ފެޑެރޭޝަން އިން އިންތިޒާމްކޮށްގެން ކުރިޔަށް ގެންދިޔަ ސައުތު އޭޝިއަން ސުޕަރ ކަޕް ކުރިއަށްގެންގޮސްފައި ވަނީ މިދިޔަ ސެޕްޓެމްބަރު މަހުއެވެ. ސުޕަރ ކަޕްގެ ޗެމްޕިއަންކަން ރާއްޖެއިން ހޯދީ ސްރީލަންކާއާ ދެކޮޅަށް އެގައުމުގައި ކުޅުނު ދެ މެޗުގެ ތެރެއިން އެއް މެޗު ކާމިޔާބުކޮށް، އަނެއް މެޗު އެއްވަރުކޮށްގެންނެވެ. ރާއްޖޭން ފުރަތަމަ މެޗު 3-0 އިން މޮޅުވިއިރު، ދެ ވަނަ މެޗު ނިމުނީ 1-1 އިން އެއްވަރުވެގެންނެވެ. އަދި އެފަަހަރު ޗެމްޕިއަން ކަން ކަނޑައެޅީ އެގްރިގޭޓުންނެވެ.

ހަމަ އެހެންމެ ތައިލެންޑްގައި މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕްގެ ފިރިހެނުންގެ މުބާރާތުގެ ޗެމްޕިއަންކަން ދިވެހިރާއްޖެ ވަނީ ހޯދާފަ އެވެ. ފަހުރުވެރި އެ ކާމިޔާބީ ގައުމީ ޓީމުން ހޯދީ އެއްވެސް މެޗަކުން ބަލިނުވެ އަދި ބާކީ އެއް މެޗު ވެސް އޮއްވައެވެ.

ކުޅުންތެރިންގެ ފެންވަރު މަތިކޮށް ބައިނަލްއަގްވާމީ މައިދާނުގައި ދިވެހި ކުޅުންތެރިން ހޯދާ ކާމިޔާބީތައް އިތުރު ކުރުމަށް އެސޯސިއޭޝަންތަކާ ގުޅިގެން ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.