ރާއްޖޭގެ ސައްތައިން ސައްތަ އިސްލާމްވަންތަކަމާއި، ދިވެހިންގެ ފުރިހަމަ މިނިވަންކަމާއި، އަމިއްލަވަންތަކަން ފަދަ ގައުމީ އެއްވެސް ރުކުނަކަށް ކުޑަވެސް އުނިކަމެއް އަންނާނެ ގޮތަކަށް އެއްވެސް ކަމެއް ނުކުރައްވާނެ ކަމުގެ ފުރިހަމަ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފި އެވެ.
އެ ޔަގީންކަން ރައީސް ދެއްވީ މިއަހަރުގެ ނަސްރުގެ ދުވަހުގެ މުނާސަބަތުގައި މާލޭގެ ޖުމްހޫރީ މައިދާން ސަރަހައްދުގައި ބޭއްވެވި ހާއްސަ ޖަލްސާގައި ވާހަކަފުޅުދައްކަވަމުންނެވެ.

އެމަނިކުފާނު ވިދާޅުވިގޮތުގައި، އަޅުއްވާ ކޮންމެ ފިޔަވަޅަކާއި ނިންމަވާ ކޮންމެ ނިންމުމެއްވެސް ނިންމަވާނީ ދިވެހި ގައުމީ އެންމެހައި ބަހާތަކަށް ފުރިހަމަ ދިރުމާއި، އާރޯކަމާއި، ހިމާޔަތާއި ރައްކާތެރިކަން ކަށަވަރުކޮށްދިނުމަށްޓަކައެވެ. އަދި ރައްޔިތުންނަށް މާ ތަރައްގީ އާ ހަޔާތެއް ހޯދައިދިނުމުގެ މަތިވެރި އުފަލާ އެކު، ގައުމިއްޔަތުގެ ރުކުންތައް ފުނޑުފުނޑުކޮށްނުލައްވާނެ ކަމަށްވެސް އެމަނިކުފާނު ވިދާޅުވިއެވެ.

Ad by Hajj Corporation

މި ޖަލްސާގައި ވާހަކަދައްކަވަމުން ރައީސް ވަނީ 1988 ނޮވެމްބަރު 3 ގެ އުދުވާނީ ހަމަލާގައި ޝަހީދުވި ބޭފުޅުންގެ މަތިވެރި ގުރުބާނީ ހަނދާން އާކުރައްވާފައެވެ. އެގޮތުން އެ ހުރިހާ ބޭފުޅުންވެސް އިސްކުރެއްވީ ގައުމާއި ވަތަނުގެ މިނިވަންކަމާއި، ހަމަޖެހުމާއި އަމާންކަން ކަމަށް އެމަނިކުފާނު ފާހަގަކުރެއްވިއެވެ.
ރައީސްގެ ވާހަކަފުޅު ނިންމަވާލައްވަމުން ވިދާޅުވީ، ގައުމަށް ވަފާތެރիވުމުގެ ނަތީޖާއަކީ އަބަދުވެސް ބާއްޖަވެރިކަން ކަމަށާއި، ގައުމަށް ޣައްދާރުވުމުގެ ނަތީޖާއަކީ އަބަދުވެސް އަބާއްޖަވެރިކަން ކަމަށެވެ. އަދި ޖުމްހޫރީ މައިދާނަކީ މި ސާފު ހަގީގަތް ދިވެހި އުންމަތަށް އަބަދުވެސް ހަނދާންކޮށްދޭ މައިދާން ކަމަށް އެމަނިކުފާނު ވިދާޅުވިއެވެ.