މަތީ ތަޢުލީމުގެ ދާއިރާއިން ގުޅުން ބަދަހިކުރުމަށާއި އެކި ދާއިރާތަކުން އެއްބާރުލުން ދިނުމާ ގުޅޭގޮތުން ދިވެހިރާއްޖޭގެ ޤައުމީ ޔުނިވަރސިޓީއާއި ބަންގްލަދޭޝް ޔުނިވަރސިޓީ އޮފް ޕްރޮފެޝަނަލްސް އާ ދެމެދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ އެކަމަށްޓަކައި އެމްއެންޔޫގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި، ގައުމީ ޔުނިވަރސިޓީގެ ފަރާތުން އެއްބަސްވުމުގައި ސޮއިކުރެއްވީ، ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމެވެ. އަދި ބަންގްލަދޭޝްގެ ފަރާތުން ސޮއިކުރެއްވީ ހައި ކޮމިޝަނަރ ޑރ. މުޙައްމަދު ނަޒްމުލް އިސްލާމްއެވެ.

މި ރަސްމިއްޔާތުގައި ވާހަކަދައްކަވަމުން ހައި ކޮމިޝަނަރު ޑރ. މުޙައްމަދު ނަޒްމުލް ވަނީ ބަންގްލަދޭޝްގެ މަޝްހޫރު ޔުނިވަރސިޓީތަކާއި އެމްއެންޔޫއާ ދެމެދު ފަހުމުނާމާތަކެއްގައި ސޮއިކުރުމުގެ މުހިންމުކަން ފާހަގަކުރައްވާފައެވެ. އޭގެ ތެރޭގައި ޔުނިވަރސިޓީ އޮފް ޑާކާ، ބަންގްލަދޭޝް ޔުނިވަރސިޓީ އޮފް ޕްރޮފެޝަނަލްސް އަދި ބަންގްލަދޭޝް މެރިޓައިމް ޔުނިވަރސިޓީ ހިމެނެއެވެ. މިފަދަ އެއްބަސްވުންތަކުގެ ސަބަބުން ދިރާސާކުރުމާއި، ތަމްރީނު ދިނުމާއި، ދަރިވަރުންނާއި މުދައްރިސުން ބަދަލުކުރުމުގެ ފުރުސަތުތައް ފަހިވެގެންދާނެކަމަށް ހައި ކޮމިޝަނަރ ވިދާޅުވިއެވެ.

މި ރަސްމިއްޔާތުގައި ވާހަކަދައްކަވަމުން ވައިސް ޗާންސެލަރ ޑރ. ޢާއިޝަތު ޝެހެނާޒް ވަނީ، ބަންގްލަދޭޝްގެ ތަޖުރިބާކާރު މުދައްރިސުން ކުރު މުއްދަތަކަށް ގެނައުމަށާއި، ޚާއްޞަ ތަމްރީނު ޕްރޮގްރާމްތައް ހިންގުމަށް އެމްއެންޔޫއިން ޝައުގުވެރިވާކަން ހާމަކުރައްވާފައެވެ. އަދި ރާއްޖޭގެ އެކި ކަންކޮޅުތަކުގައި އެމްއެންޔޫގެ 21 މަރުކަޒެއް ހުރިއިރު، ދެ ގައުމު ގުޅިގެން ސެމިނާތަކާއި ކޮންފަރެންސްތައް ބޭއްވުމުގެ ފުރުސަތު ބޮޑުކަން ވީސީ ފާހަގަކުރެއްވިއެވެ.

މީގެ އިތުރުން، ރާއްޖޭގެ ފަތުރުވެރިކަމުގެ ދާއިރާއަށް އެހީތެރިވުމުގެ ގޮތުން ބެންގާލީ ބަސް އުނގަންނައިދޭ ކޯހެއް ތައާރަފުކުރުމަށް އެމްއެންޔޫއިން ގަސްދުކުރާކަން ވީސީ ހާމަކުރެއްވިއެވެ. އަދި ރާއްޖޭގައި މަސައްކަތްކުރާ ބިދޭސީންނަށް ހުރި ގޮންޖެހުންތަކާ ގުޅޭގޮތުން ހެދި ދިރާސާތަކަށް އަލިއަޅުއްވާލައްވައި، ހޭލުންތެރިކަން އިތުރުކުރުމުގެ މަސައްކަތުގައި ބަންގްލަދޭޝްގެ އެހީތެރިކަމަށް އެކަމަނާ އެދިވަޑައިގެންނެވިއެވެ.

ދެ ޔުނިވަރސިޓީ ގުޅިގެން ކުރިއަށްގެންދާ ޕްރޮގްރާމްތަކާއި، ދިރާސާތަކުގެ އިތުރުން ފީލްޑް ސްޓަޑީޒްތަކުގެ ސަބަބުން ދެ މުއައްސަސާއަށްވެސް ބޮޑެތި ފައިދާތަކެއް ކުރާނެ ކަން ފާހަގަކުރައްވާ، މިއީ ދަރިވަރުންގެ ތައުލީމީ ފެންވަރު މަތިކުރުމަށް އެޅުނު މުހިންމު ފިޔަވަޅެއްގެ ގޮތުގައި ވީސީ ސިފަކުރެއްވިއެވެ.

Ad by Hajj Corporation

މި އެއްބަސްވުމުގެ ދަށުން ދެ ޔުނިވަރސިޓީގެ ދެމެދުގައި އޮތް ގުޅުން އިތުރަށް ބަދަހިކުރުމަށް އަމާޒުކޮށްގެން ތަފާތު އެކި ޕްރޮގްރާމްތައް ކުރިއަށްގެންދިއުމަށް ނިންމާފައިވާ ކަަމަށް އެމެއެންޔޫ އިން ބުނެއެވެ.

މި އެއްބަސްވުމުގެ ދަށުން އިންޖިނިއަރިންގ ސައިންސާއި އާކިޓެކްޗަރާ ގުޅުންހުރި ދާއިރާތަކުން މަތީ ތަޢުލީމު ނުވަތަ ޕީއެޗްޑީ ހާސިލުކުރުމުގެ ފުރުސަތުތައް ފަހިވެގެންދިއުމުގެ އިތުރުން، ޔުނިވަރސިޓީގެ އެކި ދާއިރާތަކުގައި މަސައްކަތްކުރާ މުވައްޒަފުންގެ ހުނަރާއި ޤާބިލުކަން އިތުރުކުރުމަށްވެސް ތަމްރީނު ޕްރޮގްރާމްތައް ހިންގުމަށް ރޭވިފައިވާ ކަމަށް އެމްއެންޔޫއިން މައުލޫމާތުދެއެވެ. މީގެ އިތުރުން، ސޮއިކުރެވިގެންދިޔަ ފަހުމުނާމާގެ ދަށުން ޔުނިވަރސިޓީތަކުގެ ދެމެދުގައި ތަޢުލީމީ ގޮތުންނާއި އިސްތިރާޖީ ގޮތުން މުހިންމު ދާއިރާތަކުން ގުޅުން ބަދަހިކުރުމަށް ވަނީ ހަމަޖެހިފައެވެ. އޭގެ ތެރޭގައި ބައިނަލްއަޤުވާމީ ގުޅުންތަކާއި، އިންޖިނިއަރިންގ ޓެކްނޮލޮޖީ، ވިޔަފާރި އަދި ތިމާވެށީގެ ދާއިރާ ހިމެނެއެވެ.