ދިވެހިރާއްޖޭގެ ގައުމީ ޔުނިވަސިޓީ (އެމްއެންޔޫ) އިން ބ. އޭދަފުށީގައި ހަދާ ކެމްޕަހުގެ ބިންގާ އަޅައިފިއެވެ.

މިކަމަށްޓަކާ ބޭއްވި ރަސްމިއްޔާތުގައި އެ އިމާރާތުގެ ބިންގާ އަޅުއްވައިދެއްވީ ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދުއެވެ.

Ad by Hajj Corporation

ޖުމްލަ 80.79 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢުގެ ދަށުން ގިނަ ވަސީލަތްތަކެއް ޤާއިމުކުރެވޭނެއެވެ. އޭގެ ތެރޭގައި 6000 އަކަފޫޓުގެ 2 ފަންގިފިލާގެ ދަރިވަރުންގެ އެކަމަޑޭޝަން ބްލޮކަކާއި، 3200 އަކަފޫޓުގެ މުވައްޒަފުންގެ އެކަމަޑޭޝަން ބްލޮކެއް ހިމެނެއެވެ. މީގެ އިތުރުން އެޑްމިނިސްޓްރޭޓިވް ބްލޮކަކާއި، ކްލާސްރޫމް ބްލޮކެއްގެ އިތުރުން އެކަޑަމިކް ފެސިލިޓީޒް ބްލޮކެއްވެސް އިމާރާތްކުރެވޭނެއެވެ.

މި މަޝްރޫޢުގެ މަސައްކަތް 720 ދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ.

 އޭދަފުށްޓަކީ 3500 މީހުންގެ އާބާދީއެއް އޮންނަ، ތަޢުލީމީ ޒުވާނުން ގިނަ ރަށަކަށް ވުމާއެކު، މި ކެމްޕަސް ޤާއިމުވުމަކީ އެ ރަށަށާއި މުޅި ބ. އަތޮޅުގެ ތަޢުލީމީ ދާއިރާއަށް ލިބިގެންދާނެ ވަރަށް ބޮޑު ކުރިއެރުމެކެވެ.

މި މަޝްރޫޢުގެ ސަބަބުން އަތޮޅުތެރޭގައި މަތީ ތަޢުލީމުގެ ފުރުޞަތުތައް ފުޅާވެ، ދަރިވަރުންނަށް އަމިއްލަ ރަށުގައި ތިބެގެން ކިޔެވުމުގެ މަގު ފަހިވެގެންދާނެ ކަމަށް ސަރުކާރުން އުންމީދު ކުރެއެވެ.

ސަރުކާރުން މި މަޝްރޫޢު މިދިޔަ އަހަރުގެ އޯގަސްޓްމަހުގެ ތެރޭގައި ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާއެވެ.

މިއީ އަތޮޅުތެރޭގައި މަތީ ތަޢުލީމާއި ތަމްރީނުގެ ފުރުޞަތުތައް ފުޅާކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން، ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) ގެ ތެރެއިން ކުރިއަށްގެންދާ މުހިންމު މަޝްރޫޢެކެވެ.