ސަރުކާރުން ސިއްޙީ ދާއިރާ ހަރުދަނާކުރުމަށް ކުރަމުންދާ މަސައްކަތްތަކުގެ ތެރެއިން، ހދ. ކުޅުދުއްފުށީ ރީޖަނަލް ހޮސްޕިޓަލްގައި ޕްރައިވެޓް ރޫމްތަކާއި އައިސޮލޭޝަން ފެސިލިޓީއެއް ހިމެނޭ އިމާރާތެއް އެޅުމަށް އަލްޓެކް މޯލްޑިވްސް ޕްރައިވެޓް ލިމިޓެޑާ ހަވާލުކޮށްފިއެވެ.

މި މަޝްރޫޢަކީ ޖުމްލަ 53,560,648.01 (ފަންސާސް ތިން މިލިއަން ފައްސަތޭކަ ފަސްދޮޅަސް ހާސް ހަސަތޭކަ ސާޅީސް އަށް ރުފިޔާ އެއް ލާރި) ރުފިޔާގެ މަޝްރޫޢެކެވެ.

Ad by Hajj Corporation

މިއަދު މިނިސްޓްރީ އޮފް ހެލްތުގައި ބޭއްވި ރަސްމިއްޔާތުގައި މިނިސްޓްރީ އޮފް ހެލްތުގެ ފަރާތުން އެއްބަސްވުމުގައި ސޮއި ކުރެއްވީ މިނިސްޓަރ އޮފް ސްޓޭޓް ފޮރ ހެލްތު ޚަދީޖާ ޢަބްދުއްޞަމަދު ޢަބްދުﷲ އަދި އަލްޓެކް މޯލްޑިވްސްގެ ފަރާތުން ސޮއި ކުރެއްވީ ޖެނެރަލް މެނޭޖަރ، ހުސައިން ތަސްމީން އެވެ.  

މިމަސައްކަތަށް ފަންޑުކޮށްފައިވަނީ އޭޝިއަން އިންފްރާސްޓްޗަރ އިންވެސްޓްމަންޓް ބޭންކް (އޭ.އައި.އައި.ބީ) އިންނެވެ. މިއީ މިބޭންކްއިން ރާއްޖޭގައި ކުރިޔަށްގެންދާ ފުރަތަމަ ސްޓޭންޑް އެލޯން ޕްރޮޖެކްޓްއެވެ.

މި އެއްބަސްވުމުގެ ދަށުން ކުރިއަށްގެންދާ މަސައްކަތްތައް 435 ދުވަހުގެ ތެރޭގައި ނިންމުމަށް ވަނީ ތާވަލުކޮށްފައެވެ. މި އައު ފެސިލިޓީގައި 14 ޕްރައިވެޓް ރޫމް ގާއިމްކުރެވޭނެއެވެ. މި ކޮޓަރިތަކަކީ ބަލިމީހާގެ އިތުރުން އެހީތެރިޔާއަށްވެސް މަޑުކުރެވޭ ގޮތަށް، ފާހަނާއާއެކު ފަރުމާކުރެވިފައިވާ ތަންތަނެވެ. މީގެ ތެރޭގައި މޮޑަރޭޓް ޕޭޝަންޓުންނާއި، ކްރިޓިކަލް ޕޭޝަންޓުންގެ އިތުރުން ހާއްސަ އެހީއަށް ބޭނުންވާ މީހުންނަށް ހާއްސަ ކޮޓަރިތައް ހިމެނެއެވެ.

ކުޅުދުއްފުށީ ރީޖަނަލް ހޮސްޕިޓަލަކީ މާލެ ސަރަހައްދު ފިޔަވައި ރާއްޖޭގައި އެންމެ ގިނަ ބަލިމީހުން ހިދުމަތް ހޯދާ ހޮސްޕިޓަލެވެ. މި ހޮސްޕިޓަލުން ހއ، ހދ، އަދި ށ އަތޮޅުގެ ރައްޔިތުންގެ އިތުރުން އެހެން އަތޮޅުތަކުގެ މީހުންވެސް ހިދުމަތް ހޯދައެވެ. ނަމަވެސް މިހާރު ހޮސްޕިޓަލުގައި ޕްރައިވެޓް ރޫމްތައް ނެތުމުގެ ސަބަބުން، ދިގު މުއްދަތަށް އެޑްމިޓްކުރަންޖެހޭ ބަލިމީހުންނާއި އެހީތެރިންނަށް ބޮޑެތި ދަތިތަކެއް ކުރިމަތިވެއެވެ.

މި އައު އިމާރާތާއެކު، ގައިންގަޔަށް އަރާ ބަލިތައް ފެތުރޭ ހާލަތްތަކުގައި ބަލިމީހުން ވަކިން އައިސޮލޭޓް ކުރެވޭނެ އިންތިޒާމު ހަމަޖެހިގެންދާނެއެވެ. މީގެ އިތުރުން، މި ފެސިލިޓީގައި ޑައިލިސިސް ރޫމް، އެމަރޖެންސީ ރޫމް، މެޑިކަލް އަދި ޖެނެރަލް ސްޓޯރގެ އިތުރުން ނާރސް ސްޓޭޝަންތައްވެސް ގާއިމްކުރެވޭނެއެވެ.

ކުޅުދުއްފުށީ ރީޖަނަލް ހޮސްޕިޓަލަކީ ސިއްޙީ ދާއިރާގެ ގިނަ ތަމްރީންތަކެއް ހިންގާ މަރުކަޒަކަށް ވީނަމަވެސް، އެކަށީގެންވާ ވަސީލަތްތައް ނެތުމުގެ ސަބަބުން މިހާރު ތަމްރީންތައް ކުރިއަށްގެންދަނީ ބޭރުގެ ތަންތަން ކުއްޔަށް ހިފައިގެންނެވެ. މި މަޝްރޫޢުގެ ދަށުން މި ދަތިތަކަށް ހައްލެއް ލިބި، ހޮސްޕިޓަލުގެ 700 އަށްވުރެ ގިނަ މުވައްޒަފުންނަށާއި މެޑިސިން ކިޔަވާ ކުދިންނަށް ބޭނުންވާ ތަމްރީންތައް ހިންގުމަށް މަގުފަހިވެގެންދާނެއެވެ.

މިއަދު މި ސޮއިކުރެވުނު އެއްބަސްވުމުގެ ދަށުން ގާއިމްކުރެވޭ މި ފެސިލިޓީގައި 14 ޕްރައިވެޓް ރޫމް ހުންނާނެއެވެ. މި 14 ކޮޓަރި ހުންނާނީ ބަލިމިހާގެ އިތުރަށް ބަލިމީހާގެ އެހީތެރިއާއިއެކު ހުރެވޭގޮތަށެވެ. އަދި ކޮންމެ ކޮޓަރިއެއްގައި ފާހަނާ ހަރުކުރެވިފައި ހުންނާނެއެވެ. މިކޮޓަރިތަކުގެ ތެރޭގައި މޮޑަރޭޓް ޕޭޝަންޓް، ކްރިޓިކަލް ޕޭޝަންޓް އަދި ޕޭޝަންޓް ވިތް ސްޕެޝިއަލް ނީޑްއަށް ހާއްސަކުރެވިގައިވާ ކޮޓަރި ހުންނާނެއެވެ. އަދި މިފެސިލިޓީގައި ޕްރައިވެޓް ރޫމްގެ އިތުރަށް މި އިމާރާތުގައި ޑައިލިސިސް ރޫމް، އެމަރޖެންސީ ރޫމް، މެޑިކަލް ސްޓޯރ، ޖެނެރަލް ސްޓޯރ، ނާރސް ސްޓޭޝަންސް، އޮޓޯކްލޭވް ރޫމްސް، އެޑްމިން ރޫމް، ބްރީފިންގ ރޫމް، ޔުޓިލިޓީ ރޫމްސް، ޓީރޫމް، ޑޮނިންގް، ޑޮފިންގ އަދި ވަކިން ނަމާދު ކުރެވޭ ގޮތަށް ނަމާދު ކޮޓަރިއެއްވެސް ހުންނާނެއެވެ. މީގެ އިތުރަށް މިއިމާރާތުގެ ފުރަތަމަ ފަންގިފިލާގައި، މަލްޓިޕާރޕޯސްހޯލެއްވެސް ހުންނާނެއެވެ.

ޕްރައިވެޓް ރޫމްތައް ގާއިމްކުރެވުމުން، ރަށުންނާއި، އަތޮޅުތަކުގެ ރައްރަށުން ހިދުމަތް ހޯދުމަށް އަންނަ ފަރާތްތަކުން ގިނަ ދުވަހު ހިދުމަތް ހޯދުމަށް މަޑުކުރަން ޖެހިއްޖެ ހާލަތެއްގައި އެހިދުމަތް ފަސޭހަކަމާއިއެކު މިތަނުން ލިބިގެންދާނެއެވެ. އަދި ގައިންގަޔަށްއަރާ ބަލީގެ ޕޭޝަންޓުން ވަކިން އައިސޮލޭޓްކޮށް ހޮސްޕިޓަލުގެ އާންމު ހިދުމަތަށް ބުރުނާރާ ހިދުމަތް ދެވޭނެއެވެ. މީގެ އިތުރަށް މި ފެސިލިޓީއިން މެޑިސިން ކިޔާވާކުދިންގެ ސެޝަންތައް ކުރިޔަށްގެންދިޔުމަށް އިތުރަށް ފަސޭހަވުމާއި، ސިއްޙީ ހިދުމަތްތެރިން ތަމްރީން ކުރުމަށް އިތުރަށް ފަސޭހަވެ، އަދި ރަށުގެ އަތޮޅުގެ ކޮމިއުނިޓީތަކަށް ހާއްސަކޮށްގެން ކުރިޔަށްގެންދެވޭ ބޮޑެތި ވޯރކްޝޮޕްތައްވެސް ކުރިޔަށްގެންދިޔުމަށް ނުހަނު ފަސޭހަވެގެންދާނެއެވެ.

ހެލްތް މިނިސްޓްރީން ބުނީ ސަރުކާރުގެ އަމާޒަކީ ރައްޔިރުންނަށް ވީހާވެސްފަސޭހައިން ސިއްޙިދުމަތް ލިބެންހުރުމާއި، އަދި މާލެއަށް ބަރޯސާވުން ކުޑަކޮށް އަތޮޅުތަކުގައި ގާއިމްކުރެވިފައިވާ ސިއްޙީ ޙިދުމަތްދޭ ތަންތަނުގެ ހިދުމަތް އިތުރަށް ފުޅާކޮށް ފެންވަރު ރަނގަޅުކުރުމެވެ.