ޔޫޒަރުންގެ ވާހަކަތައް ސިއްރުން އަޑުއެހިކަމަށް ބުނެ ކުރި ދައުވާތަކާ ގުޅިގެން، ސުލްހަވުމުގެ ބަދަލެއްގެ ގޮތުގައި 68 މިލިއަން ޑޮލަރު ދެއްކުމަށް ގޫގުލް އިން އެއްބަސްވެއްޖެއެވެ.

ގޫގުލްގެ އަޑުގެ އެހީތެރިޔާ "ގޫގުލް އެސިސްޓަންޓް" މެދުވެރިކޮށް މީހުންގެ އަމިއްލަ ވާހަކަތައް ސިއްރުން އަޑުއަހާފައިވާ ކަމަށް ބުނެ ކެލިފޯނިއާގެ ފެޑަރަލް ކޯޓަކަށް ހުށަހެޅި ދައުވާއަކާ ގުޅިގެން، މައްސަލަ ކޯޓުން ބޭރުގައި ނިންމުމަށް 68 މިލިއަން ޑޮލަރު ދެއްކުމަށް ގޫގުލް އިން މިހާރު ވަނީ އެއްބަސްވެފައެވެ.

Ad by Hajj Corporation

ޖެނުއަރީ 23 ގައި ހުށަހެޅި މި ދައުވާގައި ބުނެފައިވަނީ، ޔޫޒަރުންގެ ހުއްދައަކާ ނުލައި ގޫގުލް އެސިސްޓަންޓް އަމިއްލައަށް މަސައްކަތްކޮށް، އަމިއްލަ ވާހަކަތައް ރެކޯޑުކުރުމަށްފަހު ގޫގުލްގެ ސާވަރުތަކަށް ފޮނުވާފައިވާ ކަމަށެވެ.

މި ޝަކުވާގައިވާ ގޮތުން، ގޫގުލް އެސިސްޓަންޓް ބޭނުންކުރާ އެންޑްރޮއިޑް ފޯނުތައް ފަރުމާކޮށްފައިވަނީ "ހޭ ގޫގުލް" ނުވަތަ "އޯކޭ ގޫގުލް" ފަދަ ބަސްތަކެއް ބޭނުންކުރުމުން ނޫނީ މަސައްކަތް ނުކުރާ ގޮތަށެވެ. ނަމަވެސް، ބައެއް ފަހަރު ގަސްތަކާ ނުލައި މި އެސިސްޓަންޓް މަސައްކަތްކުރަން ފަށާފައިވެއެވެ.

ގޫގުލް އިން އަޑުގެ އަމުރުތައް ޕްރޮސެސް ކުރަނީ އެ ރެކޯޑިންތައް ސާވަރުތަކަށް ފޮނުވައިގެން ކަމަށްވީ ނަމަވެސް، މިގޮތަށް އަމިއްލައަށް އެކްޓިވޭޓްވުމުގެ ސަބަބުން ޔޫޒަރުންނަށް ނޭނގި އެމީހުންގެ އަމިއްލަ ވާހަކަތައް އެއްކޮށް، ފޮނުވާފައިވާ ކަމަށް ދައުވާގައި ބުނެފައިވެއެވެ.

މި އެސިސްޓަންޓް ފީޗާ އަކީ ގޫގުލް ފޯނުތަކާއި، ސްމާޓް ސްޕީކަރުތަކާއި، ލެޕްޓޮޕްތަކާއި، ޓެބްލެޓްތަކުގެ އިތުރުން ވަޔަރލެސް ހެޑްފޯނު ފަދަ ގިނަ އާލާތްތަކެއްގައި ބޭނުންކުރެވޭ ފީޗާ އެކެވެ.

ގޫގުލް އިން ބުނީ 68 މިލިއަން ޑޮލަރު ދައްކަން އެއްބަސްވީ ޝަރީއަތް ދިގުދެމިގެން ދިޔަ ނުދިނުމަށްޓަކައި ކަމަށެވެ.

މި އެއްބަސްވުމަށް އަމަލުކުރަން ފަށާނީ އެމެރިކާގެ ޑިސްޓްރިކްޓް ޖަޖް ބެތު ލެބްސަން ފްރީމަން އެކަން ފާސްކުރުމުންނެވެ.

މީގެ އިތުރުން، އެޕަލްގެ އަޑުގެ އެހީތެރިޔާ "ސިރީ" މެދުވެރިކޮށް އަމިއްލަ ވާހަކަތައް އަޑުއަހައި، ޔޫޒަރުންގެ ޕްރައިވެސީއާ ހިލާފުވި ކަމަށް ބުނެ ކުރި ދައުވާއެއް ނިންމުމަށް، 95 މިލިއަން ޑޮލަރު ދެއްކުމަށް މިދިޔަ ޖެނުއަރީ 3 ގައި އެޕަލް އިން ވެސް ވަނީ އެއްބަސްވެފައެވެ.