ވެސްޓް ބެންގޯލްއަށް ސަރަހައްދުގައި ނިޕާ ވައިރަސް ފެތުރޭތީ، މިސަރަހައްދަށް ދަތުރުކުރާ ފަރާތްތަކުން ސަމާލުވުމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ޢިލްތިމާސްކޮށްފިއެވެ.

އެޗްޕީއޭއިން މިގޮތަށް ޢިލްތިމާސްކުރީ، ވެސްޓް ބެންގޯލްއިން މި މަހުގެ ތެރޭގައި ނިޕާ ވައިރަސްގެ 3 ކޭހެއް ފެނުމާ ގުޅިގެން ނެރުނު ބަޔާނެއްގައެވެ. އެޗްޕީއޭއިން ބުނީ މިވަގުތު ރާއްޖެއަށް ނިޕާ ވައިރަސްގެ ނުރައްކާ އޮތް މިންވަރު ކުޑަ ކަމަށެވެ. ނަމަވެސް އިންޑިއާގެ ހާލަތު މޮނިޓަރ ކުރަމުންދާ ކަމަށާއި ވެސްޓް ބެންގޯލަށް ދަތުރުކުރާ ފަރާތްތަކުން އެކަމަށް ސަމާލުވުން މުހިންމު ކަމަށެވެ.

Ad by Hajj Corporation

މި ޖެނުއަރީ މަހުގެ ތެރޭގައި އިންޑިއާއިން ނިޕާ ވައިރަސްގެ ކޭސްތަކެއް ފެނިފައިވާ ކަމަށް ވެސް ވަނީ ބުނެފައެވެ. މިއީ ޓެރޯޕަސް އާއިލާގެ ވާލުންނާއި، އޫރުން އިންސާނުންނަށް ފެތުރޭ ބައްޔެއް ކަމަށާއި އަދި ވެސްޓް ބެންގޯލްއިން ބައްޔަށް ޕޮޒިޓިވްވި މީހުންނާ ގުޅިގެން 180 އަށްވުރެ ގިނަ މީހުން ކޮންޓެކްޓުންގެ ގޮތުގައި ކަރަންޓީނުކޮށްފައިވާ ކަމަށް އެޗްޕީއޭ އިން ބުނެއެވެ.

މި ކޭސްތަކާ ގުޅިގެން އިންޑިއާގެ އެހެން އެއްވެސް ސަރަޙައްދަކުން އަދި އެހެން ޤައުމަކުންވެސް ބަލި ފެނިފައިވާކަމުގެ ރިޕޯޓް މިހާތަނަށް ކޮށްފައިނުވާ ކަމަށާއި ބައްޔާ ގުޅޭގޮތުން އެއްވެސް ކޭސްއެއް ނުވަތަ ކޮންޓެކްޓެއް އެ އެޖެންސީއަށް ރިޕޯޓްކޮށްފައިނުވާ ކަމަށްވެސް އެޗްޕީއޭއިން ބުންޏެވެ.

ނިޕާ ވައިރަސް ޖެހޭ މީހުންގެ ފަރާތުން އާންމުކޮށް ފެންނަ އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ކެއްސުމާއި، ކަރުގައި ރިއްސުމާއި، ނޭވާލާން އުނދަގޫވުން ހިމެނެއެވެ. އަދި ބަލި ބޮޑުވަމުންދާ ވަރަކަށް ސިކުނޑިއަށް އަސަރުކޮށް ވާނުވާ ނޭނގުމާއި، ފިޓިޖެހުން ފަދަ ކަންކަން ދިމާވާ ކަމަށްވެސް އެޗްޕީއޭއިން ހާމަކުރެއެވެ.

މި ބަލި ޖެހުމުން އެއްވެސް އަލާމާތެއް ނުފެނިވެސް ހިނގައިދާނެ ކަމަށާއި ބައްޔަށް ވަކި ޚާއްޞަ ފަރުވާއެއްނެތް ނަމަވެސް އަލާމާތްތަކަށް ފަރުވާ ކުރެވޭކަންވެސް އެޗްޕީއޭއިން ފާހަގަކުރެއެވެ.