އީރާނުގެ ނިއުކްލިއާ ޕްރޮގްރާމް ހުއްޓުވުމަށް އެއްބަސްވުމަކަށް ނައިސްފިނަމަ، މިދިޔަ ޖޫން މަހު އެ ގައުމުގެ ނިއުކްލިއާ މަރުކަޒުތަކަށް ދިން ހަމަލާތަކަށްވުރެ މާ ނުރައްކާތެރި ހަމަލާއެއް ދީފާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ދެއްވައިފިއެވެ.

ޓްރަމްޕްގެ 'ޓްރޫތް ސޯޝަލް' ޕްލެޓްފޯމްގައި ކުރެއްވި ޕޯސްޓެއްގައި ވިދާޅުވީ، ވަރަށް ބާރުމިނުގައި އަދި ސާފު މަގްސަދަކާއެކު ބޮޑު އަސްކަރީ ފްލީޓެއް އީރާނާ ދިމާލަށް ދަތުރުކުރަމުންދާ ކަމަށެވެ. މިއީ މަތިންދާބޯޓު އުފުލާ މަނަވަރު 'އަބްރަހަމް ލިންކަން' އިސްވެ އޮންނަ ފްލީޓެއް ކަމަށާއި، މިއީ ވެނެޒުއޭލާއަށް ފޮނުވި ފްލީޓަށްވުރެ ވެސް ބޮޑު އަދި ވަރުގަދަ ފްލީޓެއްކަން ޓްރަމްޕް ބޮޑާކަމާއެކު ވިދާޅުވެފަވެއެވެ.

Ad by Hajj Corporation

"އުންމީދަކީ އީރާނުން އަވަހަށް މަޝްވަރާގެ މޭޒަށް އައިސް، އިންސާފުވެރި އަދި ހަމަހަމަ އެއްބަސްވުމަކަށް އައުން - ނިއުކްލިއާ ހަތިޔާރު ނުހިމެނޭ ގޮތަށް - ހުރިހާ ފަރާތްތަކަށްވެސް ފައިދާހުރި އެއްބަސްވުމަކަށް. ވަގުތު މިދަނީ ކުޑަވަމުން، މިއީ ވަރަށް ނާޒުކު ވަގުތެއް!" ޓްރަމްޕް ވިދާޅުވިއެވެ.

އޭނާ އިތުރަށް ވިދާޅުވީ އީރާނުން އެމެރިކާއާއެކު އެއްބަސްވުމަކަށް ނައިސްފިނަމަ، ޖޫން މަހު ބަންކަރުތައް ފުނޑުފުނޑުކޮށްލާ ފަދަ ބޮންތަކުން ދިން ހަމަލާއަށްވުރެ މާ ވަރުގަދަ ހަމަލާއެއް ދޭނެ ކަމަށެވެ.

މީގެ ކުރިން އީރާނަށް ދިން ހަމަލާތަކަށް އިޝާރާތް ކުރައްވަމުން ޓްރަމްޕް ވިދާޅުވީ، އެއްބަސްވުމަކަށް އައުމަށް ކުރިން ދިން ފުރުސަތުގެ ބޭނުން އީރާނުން ނުހިފުމުން 'އޮޕަރޭޝަން މިޑްނައިޓް ހެމަރ' ހިންގައި އެ ގައުމަށް ބޮޑެތި ގެއްލުންތަކެއް ދީފައިވާނެ ކަމަށެވެ. އަދި ދެން ދޭ ހަމަލާ މާ ނުރައްކާތެރިވާނެ ކަމަށާއި، އެފަދަ ހާލަތަކަށް ކަންކަން ދިޔަނުދިނުމަށް އޭނާ ވަނީ ގޮވާލައްވާފައެވެ.

ޔޫ.އެސް.އެސް އަބްރަހަމް ލިންކަން އެއާކްރާފްޓް ކެރިއާ ސްޓްރައިކް ގްރޫޕް މިހާރު ވަނީ އެމެރިކާ އަސްކަރިއްޔާގެ ސެންޓްރަލް ކޮމާންޑްގެ ސަރަހައްދަށް ވަދެފައެވެ. މީގެ ތެރޭގައި މެދުއިރުމައްޗާއި އީރާނުގެ ވަށައިގެންވާ ކަނޑުގެ ސަރަހައްދުތައް ހިމެނެއެވެ. ނަމަވެސް، މި ފްލީޓް އަދި އޭގެ އެންމެ ފަހުގެ މަންޒިލަށް ވާސިލުވިކަން އަދި ކަށަވަރެއް ނުވެއެވެ.

މި ފްލީޓުގައި މަތިންދާބޯޓު އުފުލާ މަނަވަރުގެ އިތުރުން ތިން ޑިސްޓްރޯޔަރު ހިމެނޭއިރު، މިއީ ބޭނުންވެއްޖެ ހިނދެއްގައި ވަރަށް އަވަހަށް އަދި ވަރުގަދަ ހަމަލާތަކަކާއެކު މިޝަން ފުރިހަމަކުރުމުގެ ގާބިލުކަން ލިބިގެންވާ ފްލީޓެއް ކަމަށް އެމެރިކާއިން ބުނެއެވެ.

އެމެރިކާއާއި އިސްރާއީލު ހިމެނޭހެން ހުޅަނގުގެ ބާރުތައް ދެކޭގޮތުގައި ދިފާއުވުމުގެ ހައްގަކީ ހަމައެކަނި އެމީހުންނަށް އޮތް އެއްޗެކެވެ.