މާލޭގައި 13،000 ޓަނުގެ 2 ފެން ތާނގީ ބެހެއްޓުމުގެ މަސައްކަތް ފަށައިފިއެވެ.

މާލޭ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިޔުއެސްސީގެ ފެން ރައްކާކުރުމުގެ ގާބިލްކަން އިތުރުކުރުމަށްޓަކައި ކުރިއަށް ގެންދާ މިމަޝްރޫއާ ގުޅޭ ގޮތުން އެ ކުންފުނިން ބުނީ، މާލޭގައި ބަހައްޓާ 13،000 ޓަނުގެ 2 ތާނގީ ބެހެއްޓުމުގެ މަސައްކަތުގެ ދަށުން ގްރައުންޑް ތައްޔާރުކޮށް އެކަމަށް ބޭނުންވާ ސާމާނު ގެނެސް ތައްޔާރުވެފައިވާ ކަމަށެވެ. އަދި ފައުންޑޭޝަންގެ މައިގަނޑު މަސައްކަތްތަކަށް ތައްޔާރުވުމުގެ ގޮތުން ޓެސްޓް ޕައިލިންގެ މަސައްކަތްތައް މިހާރު ކުރަމުންދާކަމަށް އެމްޑަބްލިޔުއެސްސީން ބުންޏެވެ.

13،000 ޓަނުގެ މި 2 ތާނގީއާއެކު 26،000 ޓަނުގެ ފެން ރައްކާކުރުމުގެ ގާބިލްކަން ލިބޭނެކަމަށް އެމްޑަބްލިޔުއެސްސީން ބުނެއެވެ. މިއީ މިހާރު މާލޭގައި ފެން ރައްކާކުރުމުގެ ގާބިލްކަން ހުރި ވަރާ އެއްވަރުގެ އަދަދެއްކަން އެމްޑަބްލިއުއެސްސީން ފާހަގަކުރެއެވެ.

Ad by Hajj Corporation

ފެން ރައްކާކުރެވޭނެ ގާބިލްކަން އިތުރުކުރުމަށްޓަކައި އެމްޑަބްލިއުއެސް ވަނީ މިދިޔަ އަހަރު ހުޅުމާލޭގައި 10000 ޓަނުގެ ފެން ރައްކާކުރެވޭ ނިޒާމެއް ގާއިމުކޮށްފައެވެ. މިއީ ރާއްޖޭގައި މިހާތަނަށް ބެހެއްޓި އެންމެ ބޮޑު ފެން ތާނގީއެވެ.

މިއާއެކު ހުޅުމާލޭގައި ފެން ރައްކާކުރެވޭ މިންވަރު 22600 ޓަނަށް ވަނީ އިތުރުވެފައެވެ. އަދި މިދިޔަ އަހަރުގެ ޖޫން މަހުގެ ތެރޭގައި ދުވާލެއްގެ މައްޗަށް 1،000 ޓަނުގެ ފެން އުފެއްދޭވަރުގެ އާރުއޯ ޕްލާންޓެއް މާލޭގައި ބަހައްޓާ ބޭނުން ކުރަންވަނީ ފަށާފައެވެ.

މާލޭގައި ޤާއިމްކުރާ މި 2 ތާނގީގެ އިތުރުން ހުޅުމާލޭގައި ޤާއިމްކުރާ 5000 ޓަނުގެ ފެން އުފެއްދޭ ނިޒާމުގެ މަސައްކަތް ނިންމާ އަންނަ މަހު ބޭނުންކުރަން ފެށޭނެކަމަށް އެމްޑަބްލިޔުއެސްސީން ވަނީ ބުނެފައެވެ.