މަރުކަޒީ ބޭންކް މޯލްޑިވްސް މަނިޓަރީ އޮތޯރިޓީ - އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ ވެރިޔާގެ މަގާމުގައި ހުއްޓާ ސަސްޕެންޑުކުރި އިސްމާއިލް ސާޖިދު، މަގާމުން ވަކިކުރަން ނިންމައިފިއެވެ.

މިދިޔަ އޮގަސްޓު މަހު އެފްއައިޔޫގެ ވެރިޔާގެ މަގާމަށް އައްޔަންކުރި ސާޖިދަށް ވަނީ ޖންސީ ފުރައްސާރައިގެ ތުހުމަތުތަކެއް ކުރެވިފައެވެ.

Ad by Hajj Corporation

މި ތުހުމަތުތަކާއެކު މިދިޔަ ޑިސެންބަރު މަހުގެ ފަހު ހަފުތާގެ ތެރޭގައި އޭނާ ސަސްޕެންޑުކުރިއެވެ.

އެމްއެމްއޭގައި އެ މައްސަލަ ބެލި ކޮމިޓީން ވަނީ ސާޖިދު ޖިންސީ ފުރައްސާރަ ކުރި ކަމަށް ސާބިތުވާ ކަމަށް ނިންމައިފައެވެ. އަދި އެކަމުގެ އަދަބެއްގެ ގޮތުން، އޭނާ މަގާމުން ވަކިކުރަން ފެންނަ ކަމަށް ވެސް އެ ކޮމިޓީން ވަނީ ނިންމައިފައެވެ.

ކޮމިޓީގެ އެ ނިންމުން އެމްއެމްއޭގެ މެނޭޖްމެންޓަށް މިއަދު އެންގުމާއެކު، ވަގުތުން ނިންމުން ތަންފީޒުކޮށް، ސާޖިދު ވަނީ މަގާމުން ވަކިކޮށްފައެވެ.

ސާޖިދު އެފްއައިޔޫގެ ވެރިއަކަށް އައްޔަން ކުރެއްވީ, އެފްއައިޔޫގެ ވެރިއަކަށް ހުންނެވި އަބްދުﷲ އަޝްރަފް, މަގާމުން ދުރުކޮށްފައެވެ.

އެފްއައިޔޫއަކީ ބޭންކްތަކުގެ ތެރޭގައި ހިންގާ މާލީ އެކިއެކި މުއާމަލާތްތަކަށް ފާރަވެރިވެ, ޝައްކު ކުރެވޭ މުއާމަލާތްތަކުގެ މައްސަލަތައް ބަލަން ކަމާ ބެހޭ އިދާރާތަކަށް އަންގާ މުހިންމު އިދާރާއެކެވެ. އޭގެ ތެރޭގައި ކޮރަޕްޝަނާއި މަނީލޯންޑަރިންނާއި އެކިއެކި ކުށްކޮށްގެން ހޯދާ ފައިސާގެ މައްސަލަތައް ބެލުން ހިމެނެއެވެ.