ދިވެހިރާއްޖޭގެ އިގްތިސާދު ސިންދަފާތުކޮށް، ބޭރުގެ އިންވެސްޓްމަންޓްތަކަށް މަގުފަހިކުރުމަށްޓަކައި ރައީސް ޑރ. މުޙައްމަދު މުޢިއްޒުގެ ސަރުކާރުގެ ވަރުގަދަ ތަސައްވުރާއެކު ތައާރަފުކުރި ސްޕެޝަލް އިކޮނޮމިކް ޒޯން (އެސް.އީ.ޒެޑް) ގެ ފުރަތަމަ މަޝްރޫއު އަމަލީ ސިފައެއްގައި މިވަނީ ފެންނަން ފަށާފައެވެ. މި ސަރުކާރުން އެސްއީޒެގް ގާނޫނަށް މުހިންމު އިސްލާހްތަކެއް ގެނެސް 2026 ވަނަ އަހަރާ ހަމައަށް އައިއިރު، މި ނިޒާމު ވަނީ ހަރުދަނާ އޮނިގަނޑެއްގެ ދަށުން ދެ ބަޔަކަށް ބަހާލާފައެވެ. އެއީ ގައުމީ އިންފްރާސްޓްރަކްޗަރަށް އަމާޒުކުރާ 'ސްޓްރެޓީޖިކް އިންވެސްޓްމަންޓްތައް' އަދި 2025 ވަނަ އަހަރު އަލަށް ތައާރަފުކުރި 'ސަސްޓެއިނަބަލް ޓައުންޝިޕް' ތަކެވެ.

އިންވެސްޓްމަންޓްގެ ގިންތިތަކާއި މިންގަނޑުތައް

Ad by Hajj Corporation

ރައީސް މުޢިއްޒުގެ ސަރުކާރުން ވަނީ އެސް.އީ.ޒެޑް މަޝްރޫއުތަކަށް ކަނޑައަޅާފައިވާ އެންމެ ދަށް މިންގަނޑުތައް މަތިކޮށް، އިތުބާރު ހުރި ބޮޑެތި އިންވެސްޓްމަންޓްތަކަށް ފުރުސަތު ހުޅުވާލާފައެވެ. ސްޓްރެޓީޖިކް އިންވެސްޓްމަންޓްތަކުގެ ގޮތުގައި ބަލަނީ މަދުވެގެން 100 މިލިއަން ޑޮލަރުގެ މަޝްރޫއުތަކެވެ. މީގެ ތެރޭގައި އުފެއްދުންތެރިކަން، ޓްރާންސްޝިޕްމަންޓް ބަނދަރުތައް، އައި.ސީ.ޓީ ޕާކުތައް، އަދި އިއާދަކުރަނިވި ހަކަތަ ފަދަ 9 ދާއިރާއެއް ހިމެނެއެވެ. އަނެއްކޮޅުން، ސަސްޓެއިނަބަލް ޓައުންޝިޕްތަކަކީ 500 މިލިއަން ޑޮލަރުގެ ބޮޑު އިންވެސްޓްމަންޓެއް ބޭނުންވާ، ފަތުރުވެރިކަމާއި ދިރިއުޅޭ ތަންތަން ހިމެނޭހެން ފަރުމާކުރެވޭ އަމިއްލައަށް ފުދޭ ސިޓީތަކެކެވެ.

ސްޓްރެޓީޖިކް އިންވެސްޓްމަންޓުތަކުގެ ތެރެއިން، އިންވެސްޓްމަންޓެއް ހިމެނޭގޮތުން ޤާއިމުކުރުމަށް ހުށަހަޅާ ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓްގެ ތެރޭގައި ހިމަނާފައިވާ އިންވެސްޓްމަންޓްގެ ވައްތަރުތަކަކީ:

• އެކްސްޕޯޓަށް އިސްކަންދީގެން ހިންގާ މެނުފެކްޗަރިންގގެ އެކި ބާވަތުގެ މަސައްކަތްތައް،
• ޓްރާންސްޝިޕްމަންޓް ޕޯޓް، އިންޓަރނޭޝަނަލް ލޮޖިސްޓިކްސް، ޕޯޓް، އެއަރޕޯޓް،
  ބަލްކް ބްރޭކިންގ، ބަންކަރިންގ، ޑޮކިންގ ސަރވިސަސް.
• ޔުނިވަރސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސަރޗް އެންޑް ޑިވެލޮޕްމަންޓް ފެސިލިޓީތައް.
• ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައި.ސީ.ޓީ) ޕާކް، އައި.ސީ.ޓީއާ ގުޅޭ ފެސިލިޓީތައް.
• އިންޓަރނޭޝަނަލް ފައިނޭންޝަލް ސަރވިސަސް، އިންޓަނޭޝަނަލް ޓްރޭޑް ސެންޓަރުތައް
• އިޢާދަކުރަނިވި ހަކަތައިގެ ދާއިރާ.
• ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް.
• ފުޑް ސެކިއުރިޓީގެ ދާއިރާ.
• ތެލާއި، ގޭހާއި، މިނަރަލް އެކްސްޕްލޮރޭޝަންގެ މަސައްކަތްތައް.

އިންވެސްޓަރުންނަށް ދެވޭ ހާއްސަ އިނާޔަތްތައް

މިފަދަ ބޮޑެތި މަޝްރޫއުތައް ރާއްޖެއަށް ދަމައިގަތުމަށްޓަކައި ސަރުކާރުން ދަނީ ގިނަގުނަ އިނާޔަތްތަކެއް ފޯރުކޮށްދެމުންނެވެ. އޭގެ ތެރޭގައި 10 އަހަރަށްވުރެ ދިގު މުއްދަތަކަށް ކޯޕަރޭޓް އިންކަމް ޓެކްސްއިން އިސްތިސްނާވުމާއި، އިމާރާތްކުރުމަށް ބޭނުންވާ ތަކެތިން އިމްޕޯޓް ޑިއުޓީ ކަނޑާލުން ހިމެނެއެވެ. މީގެ އިތުރުން، 100 އިންސައްތަ ބޭރުގެ މިލްކުވެރިކަން ހުއްދަކުރުމާއި، ފައިދާ އަނބުރާ ގެންދިއުމުގެ ފުރިހަމަ މިނިވަންކަން އިންވެސްޓަރުންނަށް ލިބިގެންދެއެވެ. މިއީ ބައިނަލްއަގުވާމީ މާކެޓުގައި ރާއްޖޭގެ ވާދަވެރިކަން އިތުރުކޮށްދޭ މުހިންމު ސަބަބެކެވެ.

އިގްތިސާދީ އާ ބަދަލު: ޕްރޮޖެކްޓް އައިލާ

ގިނަ އަހަރުތަކެއްގެ އިންތިޒާރަށްފަހު، 2025 އާއި 2026 ވަނަ އަހަރަކީ އެސް.އީ.ޒެޑްގެ ހަގީގީ މޭވާ ފެންނަން ފެށި އަހަރުތަކެވެ. ވަކިން ހާއްސަކޮށް، 2026 ވަނަ އަހަރުގެ ޖެނުއަރީ މަހު ފެށުނު 'ޕްރޮޖެކްޓް އައިލާ' އަކީ މި ދާއިރާއިން އައި ބޮޑު ކުރިއެރުމެކެވެ. މި މަޝްރޫއުތަކުގެ ސަބަބުން ރާއްޖޭގައި މީގެ ކުރިން ނެތް އާ ޓެކްނޮލޮޖީތައް ތައާރަފުވެ، ކާނާގެ ރައްކާތެރިކަން ކަށަވަރުވެ، ދިވެހި ޒުވާނުންނަށް މަތީ ފަންތީގެ ވަޒީފާގެ ފުރުސަތުތައް ތަނަވަސްވެގެންދާނެއެވެ.

2028ވަނަ އަހަރު ނިމުމުގެ ކުރިން ސަސްޓެއިނަބަލް ޓައުންޝިޕް އޮޕަރޭޝަނަށް ގެނައުމަށް އަމާޒު ހިފާފައިވާއިރު، ލަގްޒަރީ ވިލާ އަދި އަލްޓްރާ ލަގްޒަރީ ޓޫރިސްޓް ރިޒޯޓަކާއި މެރީނާއެއް އެތަނުގައި ޤާއިމުކުރެވޭނެއެވެ. މީގެ އިތުރުން ބައިނަލްއަގުވާމީ ފެންވަރުގެ ޞިއްޙީ ޚިދުމަތްދޭ މަރުކަޒަކާއި ބައިނަލްއަގުވާމީ ފެންވަރުގެ ހޮސްޕިޓަލިޓީ ތަމްރީނުދޭ މަރުކަޒެއްވެސް އެތަނުގައި ޤާއިމުކުރެވޭނެއެވެ. ދެމެހެއްޓެނިވި އަދި ޒަމާނީ ދަނޑުވެރިކަމުގެ ވަސީލަތްތަކާއި، އެކުއަކަލްޗަރުގެ ވަސީލަތްތަކާއެކު ތަރައްގީކުރެވޭ މިޓައުންޝިޕްގައި ބޭނުންކުރާ ހަކަތައަކީ މަދުވެގެން 60 ޕަސެންޓް އިއާދަކުރަނިވި ހަކަތައެވެ.

ރާއްޖެ ސަރަހައްދީ ފެންވަރުގައި ފާހަގަކޮށްލެވޭ އިގްތިސާދީ މަރުކަޒަކަށް

ޖުމްލަގޮތެއްގައި ބަލާއިރު، އެސް.އީ.ޒެޑް ހަގީގަތަކަށް ވުމަކީ ރާއްޖޭގެ އިގްތިސާދު ހަމައެކަނި ފަތުރުވެރިކަމަށް ބަރޯސާވެފައި އޮތް އޮތުން ނިމުމަކަށް ގެނައުމަށް އެޅޭ ވަރުގަދަ ފިޔަވަޅެކެވެ. ހަރުދަނާ ގާނޫނީ އޮނިގަނޑެއްގެ ދަށުން ކުރިއަށްދާ މި މަޝްރޫއުތަކުގެ ސަބަބުން، ކުރިއަށް އޮތް ތަނުގައި ރާއްޖެއަކީ ސަރަހައްދީ ފެންވަރުގައި ފާހަގަކޮށްލެވޭ އިގްތިސާދީ މަރުކަޒަކަށް ވެގެންދާނެކަން ކަށަވަރެވެ. މިއީ ރައީސް ޑރ. މުޙައްމަދު މުޢިއްޒުގެ ދުރުވިސްނުންފުޅުގެ ނަތީޖާކަން ކަށަވަރެވެ.

އިތުރަށް ކިޔާލަން: ޕްރޮޖެކްޓް އައިލާ އާއެކު އެސްއީޒެޑް ހަގީގަތަކަށް، މި ސަރުކާރުގެ ކާމިޔާބީގެ ލިސްޓް ރަން އަކުރުން