ދިވެހިރާއްޖޭގައި ސްޕެޝަލް އިކޮނޮމިކް ޒޯން (އެސް.އީ.ޒެޑް) ގެ ގާނޫނެއް ފުރަތަމަ ވުޖޫދު ކުރެވުނީ 2014 ވަނަ އަހަރުއެވެ. މި ގާނޫނާއިއެކު ރާއްޖޭގެ އެންމެ އުތުރުން އިހަވަންދިއްޕޮޅުގައި އެސްއީޒެޑް އެއް ގާއިމުކުރެވި ބިޔަ ޕްރޮޖެކްޓެއް ހިންގާނެކަމަށް ޢިއުލާން ކުރެވުނެވެ. ނަމަވެސް އެއިރު އޮތް ޕީޕީއެމްގެ ސަރުކާރު ނިމިގެން ދިޔައީ އެކަމުގައި ހަގީގީކުލަ ނުޖެއްސިއެވެ. ދެން އައީ އެމްޑީޕީ ސަރުކާރެވެ. އެމްޑީޕީ އަކީ އެއް އިރެއްގައިވެސް މިފަދަ އިގްތިސޯދީ ތަސައްވުރެއް ގެންގުޅެން ނޭނގޭ ބަޔެއްކަމުން އެ ވެރިކަން ވެސް ނިމިދިޔައީއެވެ. އެއަށްފަހު 2023 ވަނަ އަހަރު ނޮވެމްބަރު 17 އިން ފެށިގެން ފެށިގެން އައި ރައީސް ޑރ. މުޙައްމަދު މުޢިއްޒުގެ ޕީއެންސީގެ ވެރިކަމުގައި މިސްރާބު ހިފީ މުޅި ރާއްޖެ އިގްތިސާދީ އަދި ޑިޖިޓަލް ބަދަލަކާ ދިމާއަށެވެ. މުޅި ގައުމުގެ އިގްތިސޯދު އާރޯޝަންކޮށްލާނެ ފަދަ ޕްލޭންތަކާއި ތަސައްވުރު ރައީސް މުޢިއްޒުގެ ސަރުކާރުން ކުރިއަށް ނެރުއްވިއެވެ. އެކަމުގެ ނަތީޖާ ހޯދުމަށް 2014 ވަނަ އަހަރު ވުޖޫދު ކުރެވުނު ސްޕެޝަލް އިކޮނޮމިކް ޒޯންގެ ގާނޫނު (ގާނޫނު ނަންބަރު 24/2014) ގާނޫނަށް 2025 ވަނަ އަހަރުގެ ފަހުކޮޅު ބޮޑެތި އިސްލާހުތަކެއް ގެނެސް، ރައީސުލްޖުމްހޫރިއްޔާގެ ގަރާރު ނަންބަރު 1/2026 އިން ވަނީ އަލުން ކަނޑައަޅުއްވިއެވެ. މި ޕްރޮގްރާމް ފަރުމާކޮށްފައިވަނީ ރާއްޖޭގެ އިގްތިސާދު ހަމައެކަނި ފަތުރުވެރިކަމަށް ބަރޯސާވުން ހުއްޓާލައި، ބޭރުގެ އަދި ދާޚިލީ ބޮޑެތި އިންވެސްޓްމަންޓްތައް މެދުވެރިކޮށް އިގްތިސާދު ސިންދަފާތު ކުރުމަށެވެ.

ދިވެހިރާއްޖޭގެ އިޤްތިޞާދު އާ އުސްމިންތަކަކަށް ގެންދިއުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ހަރުދަނާ ސިޔާސަތުތަކުގެ ދަށުން، ސްޕެޝަލް އިކޮނޮމިކް ޒޯން (އެސް.އީ.ޒެޑް) ގެ ފުރަތަމަ މަޝްރޫޢު ކަމަށްވާ "ޕްރޮޖެކްޓް އައިލާ" (Project AYLA) ގެ ބިންގާ ވަނީ ބުރާސްފަތި ދުވަހުއަޅާފައެވެ. މިއާއެކު 2014 ވަނަ އަހަރުން ފެށިގެން ދިވެހިން ދެކެމުން އައި އެސްއީޒެޑް ހަގީގަތަކަށްވީއެވެ. އެކަން ހަގީގަތަކަށް ހައްދަވައިދެއްވި މޭސްތިރިއަކީ ޝައްކެތްވެސް ނެތްގޮތުގައި އަދުގެ ރައީސް ޑރ. މުޢިއްޒެވެ. މި ބިންގާ ރާއްޖޭގެ ތަރައްޤީގެ ތާރީޚުގައި ލިޔެވިގެންދާނީ ރަން އަކުރުންނެވެ. ނ. އަތޮޅުގައި ފެށިގެންދިޔަ މި ބިޔަ މަޝްރޫޢަކީ މި ސަރުކާރުން އިޤްތިޞާދީ ސިންދަފާތުކުރުމަށް ކުރާ މަސައްކަތުގެ އެންމެ ވަރުގަދަ އެއް ހެއްކެވެ.

Ad by Hajj Corporation

ބިޔަ އިންވެސްޓްމަންޓަކާއި އާ މޮޑެލްއެއް

ޖުމްލަ 790 މިލިއަން ޑޮލަރަށްވުރެ ބޮޑު އިންވެސްޓްމަންޓަކާއެކު ފެށުނު މި މަޝްރޫޢަކީ ރާއްޖޭގެ އަމިއްލަ ފަރާތަކުން މިހާތަނަށް ކުރާ އެންމެ ބޮޑު އެއް އިންވެސްޓްމަންޓެވެ. ކްރިސްޓަލް ހޯލްޑިންގްސް އާއި ބްލޫރޮކް ގްރޫޕް ގުޅިގެން ކުރިއަށްގެންދާ މި މަޝްރޫޢަކީ ހަމައެކަނި ފަތުރުވެރިކަމަށް ބިނާވެފައިވާ މަޝްރޫޢެއް ނޫނެވެ. މީގެ ތެރޭގައި ލަގްޒަރީ ރެޒިޑެންޝަލް ޑިވެލޮޕްމަންޓާއި، ދުނިޔޭގެ ފެންވަރުގެ ޞިއްޙީ ޚިދުމަތްތަކާއި، ތަޢުލީމީ މަރުކަޒުތަކުގެ އިތުރުން ޒަމާނީ ދަނޑުވެރިކަންވެސް ހިމެނެއެވެ. މިއީ ރާއްޖޭގެ އިޤްތިޞާދު ހަމައެކަނި ފަތުރުވެރިކަމަށް ބަރޯސާވެފައި އޮތް އޮތުން ބަދަލުކޮށް، ގިނަ ދާއިރާތަކަކުން އާމްދަނީ ހޯދުމަށް ހުޅުވިގެންދިޔަ ދޮރެކެވެ.

ތިމާވެށްޓާ ރައްޓެހި ދެމެހެއްޓެނިވި ތަރައްޤީ

"ޕްރޮޖެކްޓް އައިލާ" ފާހަގަކުރެވެނީ ތިމާވެށްޓާ ރައްޓެހި، ދެމެހެއްޓެނިވި ތަރައްޤީގެ ނަމޫނާއެއްގެ ގޮތުގައެވެ. މި މަޝްރޫޢުގެ ދަށުން އުފައްދާ ޓައުންޝިޕަށް ބޭނުންވާ ހަކަތައިގެ 60 އިންސައްތަ އުފެއްދުމަށް ހަމަޖެހިފައިވަނީ އިއާދަކުރަނިވި ވަސީލަތްތައް ބޭނުންކޮށްގެންނެވެ. މީގެ އިތުރުން، ކުނި މެނޭޖްކުރުމުގެ ޒަމާނީ ނިޒާމުތަކާއި، ފެނުގެ ރައްކާތެރި ނިޒާމުތައް ޤާއިމުކުރުމަށް ވަނީ ރޭވިފައެވެ. މިއީ ދުނިޔޭގެ މޫސުމަށް އަންނަ ބަދަލުތަކާ ދެކޮޅަށް ރާއްޖެއިން ކުރާ މަސައްކަތުގައި ބައިނަލްއަޤްވާމީ މިންގަނޑުތަކަށް ފެތޭ ގޮތަށް ފަރުމާކުރެވިފައިވާ މަޝްރޫޢެކެވެ.

އިޤްތިޞާދީ ފުރުޞަތުތަކާއި ވަޒީފާ

މި މަޝްރޫޢުގެ ސަބަބުން ދިވެހި ޒުވާނުންނަށް ގިނަގުނަ ވަޒީފާގެ ފުރުޞަތުތަކެއް ހުޅުވިގެންދާނެއެވެ. ހަމައެކަނި އިމާރާތްކުރުމުގެ ދާއިރާއަކުން ނޫނެވެ. ޞިއްޙީ، ތަޢުލީމީ އަދި ޓެކްނޮލޮޖީގެ ދާއިރާއިން ދިވެހި ހުނަރުވެރިން ބިނާކުރުމަށް މި މަޝްރޫޢުގެ ތެރެއިން މަގުފަހިވެގެންދާނެއެވެ. އިކޮނޮމިކް މިނިސްޓަރ މުޙައްމަދު ސަޢީދު ފާހަގަކުރެއްވި ފަދައިން، މިއީ ރައީސްގެ "ވިޝަން 2040" ހާސިލުކުރުމަށް އެޅުނު މުހިންމު ފިޔަވަޅެކެވެ. ރާއްޖެއަކީ އިންވެސްޓްކުރުމަށް އަމާން އަދި ފަހި މަންޒިލެއްކަން ބައިނަލްއަޤްވާމީ ދުނިޔެއަށް މި މަޝްރޫޢުން ސާބިތުކޮށްދެއެވެ.

ރިއަލް އެސްޓޭޓް އަދި ރެޒިޑެންސީ އިންވެސްޓްމަންޓް

ޕްރޮޖެކްޓް އައިލާ އަކީ ސަރުކާރުގެ ރެޒިޑަންސީ އިންވެސްޓްމަންޓް ޕްރޮގްރާމާ ގުޅިފައިވާ މަޝްރޫޢެކެވެ. މީގެ ސަބަބުން ދުނިޔޭގެ މުއްސަނދި އިންވެސްޓަރުންނަށް ރާއްޖޭގައި ދިގު މުއްދަތަކަށް ދިރިއުޅުމާއި އިންވެސްޓްކުރުމުގެ ފުރުޞަތު ލިބިގެންދާނެއެވެ. މިއީ ރާއްޖޭގެ ރިއަލް އެސްޓޭޓް ސިނާޢަތް އާ ހަރުފަތަކަށް ގެންގޮސް، ބޭރު ފައިސާ ރާއްޖެއަށް ވަންނާނެ ދާއިމީ މަގުތަކެއް ތަނަވަސްކޮށްދޭނެ ކަމެކެވެ.

ދިވެހިރާއްޖޭގެ އިޤްތިޞާދީ މިނިވަންކަމާއި ތަނަވަސްކަމަށް އެޅުނު ވަރުގަދަ ބިންގަލެއް

ނ. އަތޮޅުގެ ދެކެނަންފަރާއި، ދިގުފަރު އަދި ކުރަމާދޫ ހިމެނޭ ގޮތަށް ފެށުނު މި ބިޔަ މަޝްރޫޢަކީ ދިވެހިރާއްޖޭގެ އިޤްތިޞާދީ މިނިވަންކަމާއި ތަނަވަސްކަމަށް އެޅުނު ވަރުގަދަ ބިންގަލެކެވެ. ރައީސް ޑރ. މުޢިއްޒުގެ ސަރުކާރުން އެސް.އީ.ޒެޑް ގާނޫނުގެ ބޭނުން ހިފާ، އަމަލީ ސިފަ ގެނެސްދިނުމަކީ ރައްޔިތުންނަށް ލިބުނު ބޮޑު އުންމީދެކެވެ. ޕްރޮޖެކްޓް އައިލާ ނިމިގެންދާއިރު، އެއީ ހަމައެކަނި ރަށެއް ނޫން ކަމަށާއި، އެއީ ރާއްޖޭގެ މުސްތަޤްބަލުގެ އިޤްތިޞާދީ މަރުކަޒު ކަމުގައި ވެގެންދާނެއެވެ.