އައިލާ މަޝްރޫޢަކީ ރާއްޖޭގެ އިޤްތިޞާދީ ކުރިއެރުމާއި ފަތުރުވެރިކަމާ މެދު އަލުން ވިސްނާލަން ލިބުނު ފުރުޞަތެއް ކަމުގައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އެސްއީޒެޑްގެ ދަށުން ރާއްޖޭގައި ތަރައްޤީކުރާ އެންމެ ފުރަތަމަ ސަސްޓެއިނަބަލް ޓައުންޝިޕް ޕްރޮޖެކްޓުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

Ad by Hajj Corporation

ވަޒީރު ވިދާޅުވީ މިއީ ހަމައެކަނި ތަރައްޤީގެ މަޝްރޫޢެއް ނޫން ކަމަށާއި، މިއީ ރާއްޖޭގެ ފަތުރުވެރިކަމަށް މުޅިން އައު ބާބެއް ހުޅުވައިދޭނެ މަޝްރޫއެއް ކަމަށެވެ. އަދި މިއީ ދުނިޔޭގެ ފަތުރުވެރިކަމުގެ ބާޒާރުގައި ވާދަވެރިކަން ބޮޑުވެ، ފަތުރުވެރިންގެ އާދަތަކަށް ބޮޑެތި ބަދަލުތަކެއް އަންނަމުންދާ ދަނޑިވަޅެއް ކަމުގައި ވެސް ވިދާޅުވިއެވެ. އެހެންކަމުން އުފެއްދުންތެރި ވިސްނުންތަކަކީ އިޚްތިޔާރެއް ނޫން ކަމަށާއި، އެއީ އިސްތިރާޖީ ގޮތުން ކުރަންޖެހޭ ކަމެއް ކަމުގައި ވިދާޅުވިއެވެ.

މީގެ އިތުރުން ވަޒީރު ވިދާޅުވީ ރާއްޖޭގެ ޤުދުރަތީ ރީތިކަމާއި، އެކަހެރިކަމަކީ އެހެން ތަނަކުން ނުލިބޭނެ ފަދަ ވަސީލަތްތަކެއް ކަމަށްވާއިރު، އައިލާ މަޝްރޫއު ފަދަ އިސްތިރާޖީ ވިސްނުންތަކުން ރާއްޖޭގެ ފަތުރުވެރިކަމުގެ ދާއިރާ ސިންދަފާތު ކުރަންޖެހޭ ކަމަށެވެ. އަދި އައިލާ ފަދަ މަޝްރޫޢުތަކުގެ ސަބަބުން ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ މަންޒިލެއްގެ ބަދަލުގައި، ދިރިއުޅުމަށާއި އިންވެސްޓް ކުރުމަށް އެންމެ އެކަށީގެންވާ ތަނެއްގެ ގޮތުގައި ދުނިޔެއަށް ބަލައިގަންނާނެ ކަމަށް ވެސް ވިދާޅުވިއެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު ވިދާޅުވީ މި މަޝްރޫޢުގެ ސަބަބުން ލައިފްސްޓައިލް، ތަޢުލީމު، ވެލްނަސް އަދި ޞިއްޙީ ދާއިރާއިން ފަތުރުވެރިންނަށް ލިބޭ ތަޖުރިބާ އިތުރަށް ފުރިހަމަވެގެންދާނެ ކަމަށެވެ. އަދި މިއީ ދިގުމުއްދަތުގެ އަގުހުރި މަސައްކަތްތަކެއް ބިނާކުރެވޭނެ ތަނެއްގެ ގޮތުގައި ބަލައިގަތުމަށް ލިބޭ އަގުހުރި ފުރުސަތެއް ކަމުގައު ވެސް ވިދާޅުވިއެވެ.