ކުށްމަދު އަމާން މުޖުތަމައެއް ބިނާކޮށް ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށްދިނުމާއި ހޭލުންތެރިކުރުވުމުގެ ގޮތުން ނ. ފޮއްދޫގައި ވޯކް އެންޑް ޓޯކް ހަރަކާތެއް ކުރިއަށް ގެންގޮސްފިއެވެ.

މި މަހު 27 ވަނަ ދުވަހު ފޮއްދޫ ޕޮލިސް ޕޯސްޓުން ކުރިއަށްގެންދިޔަ މި ހަރަކާތަކީ ފުލުހުންގެ މަސައްކަތްތައް ތަރުތީބުވެފައިވާގޮތް ރައްޔިތުންނަށް ކިޔައިދީ އަދި ފޮއްދޫ ޕޮލިސް ޕޯސްޓަކީ 2025 ޑިސެމްބަރު ގައި ހުޅުވި ހިދުމަތް ދޭންފަށާވައިވާ ތަނަކަށްވުމާއެކު ޕޮލިސް ޕޯސްޓުގެ ފުލުހުން ރައްޔިތުންނަށް ތައާރަފުވުމާއި މިވަގުތު ރަށުގައި އެންމެ ކަންބޮޑުވުން ހުރި މައްސަލަތައް ދެނެގަނެ އެ ކަންކަން ހައްލުކުރުމުގެ ގޮތުން ރައްޔިތުންނާ ގުޅިގެން މަސައްކަތްކުރުމުގެ ފަލްސަފާއަށް މަސައްކަތްތައް ރާވައި ތަރުތީބުކުރުމާ އަދި ގާނޫނުތަކާއި ގަވާއިދުތަކަށް ރައްޔިތުން އަހުލުވެރިކުރުވައި، ހޭލުންތެރިކުރުވުމަށް ކުރިއަށް ގެންދިޔަ ހަރަކާތެކެވެ.

Ad by Hajj Corporation

މި ހަރަކާތުގައި، ގޭ ބިސީތަކަށް ޒިޔާރަތްކޮށް އެ ފުލުހުން ތައާރަފުވެ އަދި ރައްޔިތުންގެ ހުރި ކަންބޮޑުވުންތައް އޮޅުންފިލުވައި ރައްޔިތުންގެ ހާލުއަހުވާލު އޮޅުންފިލުވާފައިވެއެވެ. އަދި ކުށުގެ ވެށިން ރައްކާތެރިވެތިބުމަށް ކޮންމެ ރައްޔިތަކަށް ވެސް ކުރެވޭނެ ކަންކަމާއި ޒިންމާތައް ކިޔައިދީފައިވެއެވެ. ހާއްސަކޮށް މިހާރު އާންމުވެފައިވާ ސްކޭމްގެ މައްސަލަތަކުން ރައްކާތެރިވެ ތިބުމަށް މައުލޫމާތު ދީފައިވެއެވެ.

އެގޮތުން، މަކަރާއި ހީލަތުން ފައިސާ ހޯދާ މައްސަލަތަކާއި އެފަދަ މައްސަލަތަކުން ރައްކާތެރިވެތިބުމަށް ކުރެވޭނެ ކަންކަން ކިޔައިދީފައިވެއެވެ. އަދި އެފަދަ މީހުން ގެންގުޅޭ އުކުޅުތަކާއި ފިހާރަތަކުން އޮންލައިންކޮށް ވިޔަފާރިކުރާއިރު ސަމާލުކަންދޭންޖެހޭ ކަންކަން ކިޔައިދީފައިވެއެވެ. އަދި ރަށާއި ރައްޔިތުންގެ ރައްކާތެރިކަމަށް ފުލުހުންނާއި ރައްޔިތުން ގުޅިގެން ކުރެވޭނެ ކަންކަމާ ގުޅޭގޮތުން ހިޔާލު ބަދަލުކޮށް ރައްޔިތުންގެ ލަފާ އޮޅުންފިލުވާފައިވެއެވެ.
ގާނޫނުތަކާއި ގަވާއިދުތަކަށް ރައްޔިތުން އަހުލުވެރިކުރުވައި ރަށުގައި ހުރި ކަންބޮޑުވުންތައް ދެނެގަނެ ޒިންމާދާރު ހިދުމަތެއް ރައްޔިތުންނަށް ފޯރުކޮށްދިނުމުގެ ގޮތުން މިފަދަ ހަރަކާތްތައް ފޮއްދޫގައި ކުރިއަށް ގެންދިޔުމަށް ހަމަޖެހިފައިވެއެވެ.