ފުޓުބޯލައިގެ މައި އިދާރާ ފީފާއިން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އަށް ފޮނުވި ފައިސާއަށް ހިޔާނާތްތެރިވި މައްސަލައިގެ ތުހުމަތުވާ މުހައްމަދު އަގީލް ތައިލޭންޑުގެ ބެންކޮކުން ހައްޔަރުކޮށްފިއެވެ.

ތައިލޭންޑުގެ ބެންކޮކުގެ ފުލުހުން އޭނާ ހައްޔަރުކުރީ ކޮން އިރަކު ކަމެއް ސާފެއް ނޫނެވެ. އެހެން ނަމަވެސް ގއ. ގެމަނަފުށި، ފެހިކުރި، މުހައްމަދު އަގީލް ވިސާއާ ހިލާފުވެގެން ފުލުހުންގެ ބެލުމުގެ ދަށަށް ގެންގޮސްފައިވާކަން ވަނީ ކަށަވަރުކުރެވިފައެވެ.

Ad by Hajj Corporation

އޭނާ ހޯދުމަށް ދިވެހިރާއްޖޭގެ ފުލުހުންގެ ޚިދުމަތުން އިންޓަޕޯލްގައި އެދިގެން ރެޑް ނޯޓިސް ނެރެފައިވުމާއެކު، ތައިލޭންޑުގެ ކަމާބެހޭ އިދާރާއިން އެކަން ދިވެހި ފުލުހުންނަށް އަންގާފައިވާ ކަަމަށް އެ ޚިދުމަތުން ބުނެއެވެ.

ތައިލޭންޑުން އެކަން ފުލުހުންނަށް އަންގާފައިވާތީ، އެނާ އަބުރާ ރާއްޖެ ގެނައުމަށްޓަކައި ކުރަން ޖެހޭ މަސައްކަތް ކުރަމުން އަންނަ ކަމަށް ވެސް މައުލޫމާތު ލިބެއެވެ.

ފީފާއިން އެފްއޭއެމަށް ފޮނުވި ފައިސާ ލޯންޑާކޮށްދިނުމަށް އެހީތެރިވުމުގެ ކުށުގެ ދައުވާ އޭނާއަށް ކޮށްފައިވާއިރު، ޝަރީއަތަށް ހާޒިރު ނުވާތީ ޝަރީއަތުގެ ގިނަ އަޑުއެހުންތަކެއް ވަނީ ކެންސަލްކޮށްފައެވެ.

މަނީ ލޯންޑާ ކޮށްދިނުމުގައި އެހީތެރިވުމުގެ ދައުވާ އުފުލާފައިވަނީ އަމިން އެވެނިއުގެ އެޕާޓްމަންޓް ހޯދައި ލިބިގަތުމަށާއި މަނީ ލޯންޑާކުރުމަށް އެފްއޭއެމްގެ ކުރީގެ ރައީސް ބައްސާމް އަދީލް ޖަލީލަށް އެހީތެރިވެދީފައިވާތީއެވެ.

އެފްއޭއެމްގެ ހިޔާނާތުގެ މައްސަލައިގައި ބައްސާމުގެ މައްޗަށް މިހާތަނަށް 32 އަހަރުގެ ޖަލު ހުކުމެއް ވަނީ އިއްވާފައެވެ.