ޗައިނާގެ ފުޓްބޯޅަ އިންޑަސްޓްރީގައި ހިނގާފައިވާ މެޗު ފިކްސްކުރުމާއި، ޖޫވާކުޅުމާއި އަދި ކޮރަޕްޝަންގެ މައްސަލަތަކެއް ތަހުގީގު ކުރުމަށްފަހު، އެ ގައުމުގެ 13 ކްލަބަކަށް ބޮޑެތި އަދަބުތަކެއް ދީފިއެވެ. މި ފިޔަވަޅުތަކުގެ ސަބަބުން ކުރިއަށް އޮތް ޗައިނީޒް ސުޕަ ލީގު ސީޒަންގައި ނުވަ ޓީމަކުން ކުޅެން ފަށަން ޖެހޭނީ މައިނަސް ޕޮއިންޓްތަކަކާ އެކުގައެވެ.

އެންމެ ހަރުކަށި އަދަބެއް ދީފައިވަނީ މިދިޔަ ސީޒަނުގެ ރަނަރަޕް ޝަންހާއީ ޝެންހުއާ އަދި ޓިއަންޖިން ޓައިގާސް އަށެވެ. މި ދެ ޓީމުގެ ތެރެއިން ކޮންމެ ޓީމަކުން 10 ޕޮއިންޓް އުނިކުރުމަށް ވަނީ ނިންމާފައެވެ. އަދަބު ދިން ޓީމުތަކުގެ ތެރެއިން ހަތަރު ޓީމެއް މިހާރު ވެސް ވަނީ ޗައިނާގެ ދެވަނަ ޑިވިޝަނަށް ރެލިގޭޓް ވެފައެވެ.

Ad by Hajj Corporation

ޕޮއިންޓް އުނިކުރުމުގެ އިތުރުން، މި 13 ކްލަބް ވަނީ 21،000 ޕައުންޑާއި 104،000 ޕައުންޑާ (200،000 އާއި އެއް މިލިއަން ޔުއާން) ދެމެދުގެ އަދަދުތަކުން ޖޫރިމަނާކޮށްފައެވެ. ޗައިނާގެ ފުޓްބޯޅަ އެސޯސިއޭޝަނުން (ސީއެފްއޭ) ބުނި ގޮތުގައި މި ފިޔަވަޅުތަކަކީ "އިންޑަސްޓްރީގެ އަދަބުވެރިކަން ހިފެހެއްޓުމަށާއި، ފުޓްބޯޅައިގެ މާހައުލު ސާފުކުރުމަށާއި، އަދި އިންސާފުވެރި ވާދަވެރިކަމެއް ދެމެހެއްޓުމަށް" އެޅި ފިޔަވަޅުތަކެކެވެ.

ސީއެފްއޭ އިން ނެރުނު ބަޔާނެއްގައި ބުނެފައިވަނީ، ކްލަބުތަކަށް ދީފައިވާ ޕޮއިންޓް އުނިކުރުމާއި މާލީ އަދަބުތަކަކީ އެ ކްލަބަކުން ހިންގާފައިވާ ނޭދެވޭ މުއާމަލާތްތަކުގެ މިންވަރަށާއި، އޭގެ ބާވަތަށާއި، ސީރިއަސްކަމަށް ބަލައި ދީފައިވާ އަދަބުތަކެއް ކަމަށެވެ. އަދި ކޮރަޕްޝަނާ މެދު ގެންގުޅޭނީ "ޒީރޯ ޓޮލަރެންސް" ސިޔާސަތެއް ކަމަށް ވެސް އެ އިދާރާއިން ވަނީ ބުނެފައެވެ.

މި މައްސަލައިގެ ތަހުގީގާ ގުޅިގެން 2024 ވަނަ އަހަރުގެ ސެޕްޓެމްބަރު މަހު 43 އޮފިޝަލުންނާއި ކުޅުންތެރިން ވަނީ އުމުރަށް ފުޓްބޯޅައިން ސަސްޕެންޑްކޮށްފައެވެ. މީގެ ތެރޭގައި އެވަޓަންގެ ކުރީގެ މިޑްފީލްޑަރު ލީ ޓީ ވެސް ހިމެނެއެވެ. އުމުރުން 48 އަހަރުގެ ލީ ޓީ ވަނީ މެޗު ފިކްސްކުރުމާއި، ރިޝްވަތު ހިފުމާއި، އަދި ކޯޗިންގެ މަތީ މަގާމެއް ހޯދުމަށް ރިޝްވަތު ދިން ކަމަށް އިއުތިރާފުވުމާ ގުޅިގެން މިދިޔަ އަހަރު ޖަލަށް ލާފައެވެ.