ވެލާނާ އިންޓަނޭޝަނަލް އެއާޕޯޓް (ވީއައިއޭ) ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިސްނަގައިގެން، މޯލްޑިވްސް ބްލަޑް ސާވިސް (އެމްބީއެސް) އާ ގުޅިގެން ކުރިއަށް ގެންދާ ލޭ ހަދިޔާކުރުމުގެ ހާއްސަ ކޭމްޕެއް މިއަދު ފަށައިފިއެވެ.

މިއަދާއި މާދަމާގެ ނިޔަލަށް ކުރިއަށްގެންދާ މި ހަރަކާތް އޮންނާނީ ވެލާނާ އިންޓަނޭޝަނަލް އެއާޕޯޓުގެ އެއާޕޯޓް ރެކްރިއޭޝަން ސެންޓަރު (އޭއާރުސީ) ގައެވެ. މި ކޭމްޕް އިފްތިތާހުކޮށްދެއްވީ އެމްއޭސީއެލްގެ ސީސީއޯ މުހައްމަދު މިހާދުއެވެ. މިއަދުގެ ސެޝަން ކުރިއަށް ދާނީ ހަވީރު 4:00 އާ ހަމައަށެވެ.

Ad by Hajj Corporation

މިއީ ކޮންމެ އަހަރަކުވެސް އެމްއޭސީއެލްގެ މުވައްޒަފުންނަށް އަމާޒުކޮށްގެން ބާއްވަމުން އަންނަ ޕްރޮގްރާމެކެވެ. ނަމަވެސް، އެހެން އަހަރުތަކާ ހިލާފަށް މިއަހަރުގެ ޕްރޮގްރާމް ވަނީ ވަރަށް ބޮޑަށް ފުޅާކޮށްފައެވެ.

އެގޮތުން، އެމްއޭސީއެލްގެ މުވައްޒަފުންގެ އިތުރުން އެއާޕޯޓުގައި މަސައްކަތްކުރާ ދައުލަތުގެ އެކި އިދާރާތަކާއި، މުއައްސަސާތަކާއި، އެއާޕޯޓުގައި ހަރަކާތްތެރިވާ ކުންފުނިތަކުގެ އިތުރުން ރިސޯޓް މުވައްޒަފުންނަށް ވެސް މިހާރު ވަނީ ލޭ ހަދިޔާކުރުމުގެ ފުރުސަތު ހުޅުވާލައިފައެވެ.

 މި ހަރަކާތުގެ މައިގަނޑު މަގްސަދަކީ ތެލެސީމިއާ ކުދިންނަށާއި، ލޭ ބޭނުންވާ އެހެނިހެން ފަރާތްތަކަށް އެހީތެރިކަން ފޯރުކޮށްދިނުމެވެ.

މިދުވަސްވަރު ލޭ ލިބުން ދަތިވެފައިވާތީ އެމްބީއެސް އިން އާންމުންގެ އެހީތެރިކަމަށް އެދިފައިވުމާއެކުކުރިއަށް އޮތް ބަރަކާތްތެރި ރޯދަމަހަކީ ކޮންމެ އަހަރަކުވެސް ލޭ ލިބުމުގައި ދަތިތަކެއް ކުރިމަތިވާ ދުވަސްވަރަކަށް ވާތީ، އެކަމަށް ދުރާލައި ސަމާލުވެ، ލޭގެ ސްޓޮކް އިތުރުކުރުމަށް އެހީތެރިވުމަކީ ވެސް މި ޕްރޮގްރާމްގެ މުހިންމު ބޭނުމެކެވެ.

އެމްއޭސީއެލް އިން ބުނީ މި މަތިވެރި އިންސާނީ ޚިދުމަތުގައި އެއާޕޯޓުގެ ވީހާވެސް ގިނަ މުވައްޒަފުން ބައިވެރިވެ، ލޭ ހަދިޔާކުރުމަކީ އެ ކުންފުނީގެ ވަރަށް ބޮޑު އެދުމެއް ކަމަށެވެ.

އަދި މިފަދަ އިޖުތިމާއީ ކަންކަމުގައި މުވައްޒަފުންގެ ފަރާތުން ލިބޭ އެއްބާރުލުން އެ ކުންފުނިން ފާހަގަކުރެއެވެ.މިއީ އެއާޕޯޓުގައި މަސައްކަތްކުރާ މުވައްޒަފުންގެ މެދުގައި އިންސާނިއްޔަތުކަން އާލާކޮށް، މުޖުތަމައަށް ފައިދާހުރި ކަންކަން ކުރުމަށް އެމްއޭސީއެލް އިން ސިލްސިލާކޮށް ކުރިއަށްގެންދާ ހަރަކާތްތަކުގެ ތެރެއިން ހިންގޭ މުހިންމު ކޭމްޕެކެވެ.