ޖިންސީ ކުށްތަކުގެ ދައުވާ ސާބިތުވެފައިވަނިކޮށް ޖަލުގައި މަރުވި ޖެފްރީ އެޕްސްޓީންއާ ގުޅުންހުރި، އަލަށް އާންމުކުރި ލިޔެކިޔުންތަކުން ލިތުއޭނިއާގެ މަޝްހޫރު ބައެއް ފަރާތްތަކާ އެކު ކުރެވިފައިވާ މުއާމަލާތްތައް ހާމަވެފައިވާ ކަމަށް އެ ގައުމުގެ މީޑިއާތަކުން ހޯމަ ދުވަހު ރިޕޯޓްކޮށްފިއެވެ. އެ ގައުމުގެ ދައުލަތުގެ މީޑިއާ، އެލް.އާރު.ޓީ އިން ރިޕޯޓްކޮށްފައިވާ ގޮތުގައި، މި ރެކޯޑްތަކުގެ ތެރޭގައި ލިތުއޭނިއާގެ ވިޔަފާރިވެރިޔާ ވަލްޑާސް ޕެޓްރެއިކިސް، މޮޑެލް ޑީޓޭ އަންޓަނައިޓީޓޭ އަދި ވަޔަލިން ކުޅުންތެރިޔާ ޖަސްޓީނާ އައުސްކެލީޓޭއާ ގުޅުންހުރި އީމެއިލްތަކާއި މާލީ މުއާމަލާތްތައް ހިމެނެއެވެ.

ލިތުއޭނިއާގެ ނޫސް އައުޓްލެޓެއް ކަމަށްވާ '15މިނިޓް' އިން ބުނާ ގޮތުގައި، ޕެޓްރެއިކިސް އެޕްސްޓީންއަށް ތައާރަފްކޮށްދިނީ އޭނާގެ އަންހެނުން ސިމޯނާއެވެ. 2017 ވަނަ އަހަރުގެ އީމެއިލަކުން އެނގޭ ގޮތުގައި، ސިމޯނާ ވަނީ އޭނާގެ ފިރިމީހާ ލިތުއޭނިއާގައި ހިންގާ މަޝްރޫއުތައް ފުޅާކުރުމަށް އެޕްސްޓީން އިންވެސްޓްކޮށްފާނެތޯ އަހާފައެވެ. އަދި އެޕްސްޓީން ދިން މާލީ އެހީތެރިކަމުގެ ސަބަބުން އޭނާގެ ދިރިއުޅުން ބަދަލުވެފައިވާ ކަމަށް ވެސް އެ ރިޕޯޓުގައި ބުނެފައިވެއެވެ.

Ad by Hajj Corporation

ވަކިން ހުރި ލިޔެކިޔުންތަކުން އެނގޭ ގޮތުގައި، 2017 ވަނަ އަހަރު ޔޫ.އެސް ވާޖިން އައިލެންޑްސްގައި ހިންގާ، އެޕްސްޓީންއާ ގުޅުންހުރި ފައުންޑޭޝަނަކުން ވަނީ ވިލްނިއަސްގައި ހުންނަ ޕެޓްރެއިކިސްގެ ކުންފުންޏަކަށް 75,000 ޔޫރޯ ފޮނުވާފައެވެ. މީގެ އިތުރުން، އޭނާ އިސްކޮށް ހުންނަ 'ބަލޭޓޯ ޓިއޭޓްރަސް' އަށް 2018 ވަނަ އަހަރުގެ ތެރޭގައި އެކި ފަހަރުމަތިން ޖުމްލަ 28,000 ޑޮލަރު ލިބިފައިވާކަން ރެކޯޑްތަކުން ދައްކައެވެ.

މި މައުލޫމާތުތަކާ ގުޅިގެން ޕެޓްރެއިކިސް ބުނީ އޭނާ އެޕްސްޓީން ދަންނަތާ ގިނަ އަހަރުތަކެއް ވެފައިވާ ކަމަށާއި، އެއީ "އިޖުތިމާއީ އަދި ފަންނީ" ގުޅުމެއް ކަމަށެވެ. އަދި އެ ދުވަސްވަރު އެޕްސްޓީންގެ ޖިނާއީ ހަރަކާތްތަކުގެ އެއްވެސް މައުލޫމާތެއް އޭނާއަށް އެނގިފައި ނުވާ ކަމަށް ވެސް އޭނާ ބުންޏެވެ.

މީގެ އިތުރުން، 2010 ވަނަ އަހަރު އެޕްސްޓީން އާއި މޮޑެލް އަންޓަނައިޓީޓޭއާ ދެމެދު ކުރެވުނު އީމެއިލްތަކުން އެނގޭ ގޮތުގައި، އެ މޮޑެލް ވަނީ ލިތުއޭނިއާގެ ފެޝަން ޑިޒައިނަރެއް އެޕްސްޓީންއަށް ތައާރަފްކޮށްދޭން މަސައްކަތް ކޮށްފައެވެ. އަދި ވަޔަލިން ކުޅުންތެރިޔާ އައުސްކެލީޓޭ ވަނީ އެޕްސްޓީންއާ އަމަލީ ގޮތުން ބައްދަލުކޮށް، އޭނާގެ އާއިލާގެ އެޕާޓްމަންޓް ލޯނު ދެއްކުމަށް ފައިސާގެ އެހީ ހޯދާފައެވެ. ޓެކްސްއަށް މަކަރު ހެދުމުގެ ގޮތުން އޭނާ ނަގުދު ފައިސާއަށް އެދިފައިވާ ކަމަށް ވެސް ރިޕޯޓްތައް ބުނެއެވެ.

މި ފައިލްތަކުން ހާމަވި ގޮތުގައި، ލިތުއޭނިއާގެ އެކި އަންހެނުންގެ ފޮޓޯތަކެއް ވެސް އެޕްސްޓީންގެ އީމެއިލް އެކައުންޓަށް ފޮނުވާފައިވެއެވެ. މި ހާމަކުރުންތަކާ އެކު ލިތުއޭނިއާގެ އާންމުންގެ މެދުގައި ވަނީ ބޮޑު ސަމާލުކަމެއް މިކަމަށް ހުއްޓިފައެވެ.