އައްޑޫސިޓީގެ ގުޅިފައިވާ ރަށްތަކާ އެކަހެރިކޮށް އޮންނަ ހުޅުދުއާއި މީދޫގައި ކައުންސިލް އޮފީސް އިމާރާތްކުރުމުގެ މަސައްކަތްތައް ފަށައިފިއެވެ.

އައްޑޫ ސިޓީ ކައުންސިލް އެކުލެވިގެންވާ ގޮތް ބަދަލުކުރުމަށް މިދިޔަ އަހަރުގެ އޮކްޓޫބަރު މަހުގެ 25 ދުވަހު ނެގި ފެންނަ ނުފެންނަ ވޯޓުގައި އެދެ ރަށުގެ މެޖޯރިޓީ ރައްޔިތުން ވަނީ، ހުޅުދޫއާއި މީދޫގައި ވަކި ކައުންސިލެއް އުފެއްދުމަށް ރައްޔިތުން ވޯޓު ދީފައެވެ.

ރައީސުލްޖުމްހޫރިއްޔާ އިްޔެ އިއްވި ރިޔާސީ ބަޔާނުގައި ވަނީ ރައްޔިތުންގެ ވޯޓާއެކު އަލަށް އުފެދިގެންދާ ދެ ކައުންސިލް ކަމުގައިވާ، އައްޑޫ ހުޅުދޫ އާއި އައްޑޫ މީދޫގައި ކައުންސިލް ހިންގުމަށް ބޭނުންވާ ޖާގަ އިތުރު ކުރުމަށް ކުރަންޖެހޭ މަސައްކަތްތައް ކުރިއަށްދާކަމަށް ވިދާޅުވެފައެވެ. އަދި ދެ ކައުންސިލަށް ބޭނުންވާ އިދާރީ މުވައްޒަފުންނާއި މުނިސިޕަލް ޚިދުމަތް ހަރުދަނާ ކުރުމަށްޓަކައި ބޭނުންވާ މުއައްޒަފުން ހަމަކުރުމަށްޓަކައި ކައުންސިލްގެ މުވައްޒަފުންގެ އޮނިގަނޑަށް ގެންނަންޖެހޭ ބަދަލުތައް ގެނެވި، މުވައްޒަފުން އިތުރު ކުރާނެކަމަށްވެސް ވިދާޅުވިއެވެ.

މިކަމުގެ ބައެއް ތަފްސީލް ޙިއްސާކުރައްވަމުން ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފް ވިދާޅުވެފައި ވަނީ މިކަމާ ގުޅޭ މަސައްކަތްތަކުގައި ވުޒާރާގެ ޓީމެއް އެ ރަށްރަށަށް ގޮސް، ކައުންސިލް އިދާރާ އެކުލަވާލުމާ ގުޅޭ މަސައްކަތްތައް މިހާރު ކުރަމުންދާކަމަށެވެ. އާ ކައުންސިލްތައް އޭޕްރިލް މަހު އިންތިޚާބު ކުރާއިރު، އެކަމަށް ބޭނުންވާ އުމްރާނީ ވަސީލަތްތަކާއި މުވައްޒަފުންވެސް ނަގާނެކަމަށް ވިދާޅުވިއެވެ.

ވަޒީރު ވިދާޅުވީ ސަރުކާރުން މިހާރު ފަށާފައިވާ ކައުންސިލްގެ އައު އިމާރާތުގެ މަސައްކަތުގެދަށުން 55 ކައުންސިލްގެ މަސައްކަތް އަހަރުގެ މެދުތެރޭ ނިންމާނެކަމަށެވެ. މިހާތަނަށް 6 ކައުންސިލްގެ މަސައްކަތް ނިމިފައިވާކަމަށް ވަޒީރު ވިދާޅުވިއެވެ.

Ad by Hajj Corporation