ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ގެ ޑޮމެސްޓިކް އޮޕަރޭޝަންތައް، ކުރީގެ އިންޓަރނޭޝަނަލް ޓަރމިނަލަށް ބަދަލުކުރުމާގުޅިގެން، އެއަރޕޯޓުގެ ޓްރެފިކް ފްލޯއަށް ބަދަލުގެންނަން ނިންމާފައިވާކަމަށް، މޯލްޑިވްސް އެއަރޕޯޓްސް ކޮމްޕެނީ ލިމިޓަޑް (އެމްއޭސީއެލް) އިން ބުނެފިއެވެ.

އެމްއޭސީއެލުން ނެރެފައިވާ ބަޔާނެއްގައި ބުނެފައިވަނީ، 17 ފެބްރުވަރީ 2026 އިން ފެށިގެން ގެންނަން ނިންމާފައިވާ މި ބަދަލުތަކާއެކު، ޑޮމެސްޓިކް ޓަރމިނަލަށް ފަސިންޖަރުން ގޮވައިގެން އަންނަ އުޅަނދުތައް މަޑުކުރުމަށް ހަމަޖެހިފައިވަނީ ކުރީގެ އިންޓަރނޭޗަނަލް ޓަރމިނަލް (ޓަރމިނަލް 2) ކުރިމައްޗަށް ކަމަށެވެ. މި ބަދަލާއެކު ކުރީގެ ޑޮމެސްޓިކް ޓަރމިނަލް ކައިރިއަށް އުޅަނދުތައް މަޑުކުރުމާއި ފަސިންޖަރުން ބޭލުމަކީ މަނާކަމެއް ކަމަށް އެމްއޭސީއެލުން ބުނެފައި ވެއެވެ.

Ad by Hajj Corporation

މީގެ އިތުރުން، ޑޮމެސްޓިކް ޓަރމިނަލުން އަންނަ ފަސިންޖަރުން ޓެކްސީ ހޯދުމަށް ބޭނުންކުރާނީ ޓަރމިނަލް 1 ގެ ޓެކްސީ ކިއު ކަމަށްވެސް އެމްއޭސީއެލުން ބުނެފައި ވެއެވެ. އަދި، މި ބަދަލުތަކާއެކު އެއަރޕޯޓުގެ ބަސް ރޫޓުތަކަށް އެއްވެސް ބަދަލެއް ނާންނާނެ ކަމަށްވެސް އެމްއޭސީއެލުން ބުނެފައި ވެއެވެ.

ވީއައިއޭގެ އައު ޓަރމިނަލްގެ މަސައްކަތް ނިންމާ މިދިޔަ އަހަރުގެ ޖުލައި މަހުގެ 26 ގައި ހުޅުވުމާއެކު، ކުރީގެ އިންޓަރނޭޝަނަލް ޓަރމިނަލްގެ ހުރިހާ ޚިދުމަތެއް އައު ޓަރމިނަލްއަށް ވަނީ ބަދަލުކޮށްފައެވެ.

ރާއްޖޭގައި ޑޮމެސްޓިކް ވައިގެ ދަތުރުތައް ކުރަނީ ތިން އެއާލައިނަކުންނެވެ. އެއީ ގައުމީ އެއާލައިން މޯލްޑިވިއަން އާއި މަންޓާގެ އިތުރުން ވިލާ އެއަރ އިންނެވެ.