ރަމަޟާންމަހުގެ ފަހު 10ގައި ބޭންކް އޮފް މޯލްޑިވްސް (ބީއެމްއެލް) އިން ޚިދުމަތް ދޭނީ 2 ދުވަހު ކަމަށް އެ ބޭންކުން ބުނެފިއެވެ.

ބީއެމްއެލްއިން ކުރި އިއުލާނެއްގައި ބުނީ ރަމަޟާންމަހުގެ ފަހު 10ގައި އެ ބޭންކުގެ ބްރާންޗުތައް ހުޅުވާފައި ހުންނާނީ މާރިޗު 11 އަދި 18 ވަނަ ދުވަހު ކަމަށެވެ. އަދި އެ 2 ދުވަހުގެ ހެނދުނު 9:30 އިން 12:30 އަށް ބްރާންޗު ހުޅުވައި ޚިދުމަތް ދޭނެ ކަމަށެވެ.

އެއަށްފަހު، ބޭންކްގެ ބްރާންޗުތައް ބަންދުވި ނަމަވެސް އޮންލައިންކޮށް ހުރިހާ ހިދުމަތެއް ލިބޭނެ ކަމަށް ވެސް ބީއެމްއެލްއިން ވަނީ ބުނެފައެވެ. އަދި ޝައްވާލް މަހުގެ ފުރަތަމަ 7 ދުވަހުގެ މުއްދަތުގައި ބޭންކުގެ ބްރާންޗުތައް ހުޅުވާނީ 9:30 އިން 12:30 އަށް ކަމަށް ވަނީ ބުނެފައެވެ.

ރަމަޟާން މަހު ފަހު ދިހައެއް ބަންދުވުމާއި ގުޅިގެން އާންމުންނަށާއި، ބޭންކުތަކަށް ޚިދުމަތް ދިނުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ވެސް 2 ދުވަހަކު ހުޅުވާނެ ކަމަށް ވަނީ މީގެކުރިން ބުނެފައެވެ.

އެމްއެމްއޭއިން ރަމަޟާން މަހުގެ ފަހު ދިހައެއްގައި ޚިދުމަތް ދިނުމަށް ހަމަޖެހިފައިވަނީ، މާރިޗު މަހު 11 ވަނަ ދުވަހާއި 18 ވަނަ ދުވަހު ހެނދުނު 9:00 އިން މެންދުރުފަހު 01:00 އަށް ކަމަށްވެސްބުނެއެވެ. ރަމަޟާން މަހުގެ ފަހު ދިހައެއް ސަރުކާރު ބަންދު ނަމަވެސް، އެކިއެކި އިދާރާތަކުން ރައްޔިތުންނަށް ކޮންމެހެން ދޭންޖެހޭ ޚިދުމަތްތައް، އެ އިދާރާތަކުން ކަނޑައަޅުއްވާ ގޮތެއްގެ މަތިން ފޯރުކޮށްދިނުމުގެ އިންތިޒާމު ކޮންމެ އަހަރަކުވެސް ދަނީ ކުރައްވަމުންނެވެ.