ދައުލަތުގެ ޙިއްސާވާ ކުންފުނިތަކުގެ (އެސް.އޯ.އީ) ބޯޑު ސަބް-ކޮމިޓީތައް އެކުލަވައިލުމާއި ހިންގުމުގައި އަމަލުކުރާނެ މަގުޗާޓަކާއި، ބޯޑުގެ ކޮމިޓީތަކުގެ ނަމޫނާ ޗާޓަރެއް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީ.ސީ.ބީ) އިން އެކުލަވާލައިފިއެވެ.

މި އިސްލާޙުތަކުގެ މައިގަނޑު މަޤުސަދަކީ، ކުންފުނިތަކުގެ ކޯޕަރޭޓް ގަވަރނަންސް ހަރުދަނާކޮށް، ކޯޕަރޭޓް ގަވަރނަންސް ކޯޑާ އެއްގޮތަށް ކޮމިޓީތައް ހިންގާކަން ކަށަވަރު ކުރުމެވެ.

ޕީސީބީން އެކުލަވާލާފައިވާ ނަމޫނާ ޗާޓަރުގައި ކޮމިޓީތަކުގެ މަސްއޫލިއްޔަތުތަކާއި، ކޮމިޓީ އެކުލެވިގެންވާ ގޮތާއި، ޗެއާރމަންއާއި ސެކްރެޓަރީގެ ދައުރު ސާފުކޮށް ބަޔާންކޮށްފައިވެއެވެ. މީގެ އިތުރުން ކޮމިޓީގެ ކޯރަމް ހަމަކުރުމާއި، ވޯޓުލުމުގެ އުސޫލުތަކާއި، ޔައުމިއްޔާ ބެލެހެއްޓުން ފަދަ އިދާރީ ކަންކަމުގައި އަމަލުކުރާނެ ގޮތްތަކުގެ އިތުރުން، މަސްލަހަތު ފުށުއަރާ ކަންކަމާއި ސިއްރު ހިފެހެއްޓުމާ ގުޅޭ މުހިންމު އުސޫލުތައް މި ޗާޓަރުގައި ހިމަނާފައިވެއެވެ.

މި ޗާޓަރު އެކުލަވައިލާފައިވަނީ އެސްއޯއީތަކުގެ ގަވަރނަންސް ކޯޑުގެ މިންގަނޑުތަކަށާއި ބައިނަލްއަޤުވާމީ އެންމެ ރަނގަޅު އުސޫލުތަކަށް ރިއާޔަތް ކޮށްގެންނެވެ. މީގެ ބޭނުމަކީ، ކުންފުނިތަކުގެ އެތެރޭގެ އިދާރީ ހިންގުން މިހާރަށްވުރެ ހަރުދަނާކޮށް ފަސޭހަ މަގަކަށް ބަދަލު ކުރުމެވެ.

އައު ގައިޑްލައިންގައިވާ ގޮތުން، އޮޑިޓް އެންޑް ރިސްކް ކޮމިޓީއަކީ، ކޮންމެ ކުންފުންޏެއްގައިވެސް އޮތުން މަޖުބޫރު ކޮމިޓީއެކެވެ. އަދި މި ކޮމިޓީ އެކުލަވައިލުމަށް ޕީސީބީގެ ވަކި ހުއްދައެއް ހޯދާކަށް ނުޖެހޭނެއެވެ. ނަމަވެސް، އެހެނިހެން ކޮމިޓީތަކުގެ ޗާޓަރުތައް ކުންފުނީގެ ބޯޑުން ފާސްކުރުމަށްފަހު، ޕީސީބީގެ ހުއްދަ ހޯދުމަށް ހުށަހަޅަން ޖެހެއެވެ. އަދި ކޮމިޓީތަކުގެ މަސައްކަތްތައް ކުރިއަށްދަނީ، ފާސްކޮށްފައިވާ ޗާޓަރުތަކާ އެއްގޮތަށްތޯ ކުންފުނިތަކުން ޤަވާއިދުން މުރާޖަޢާ ކުރަންޖެހޭނެއެވެ.

މި ގައިޑްލައިނަކީ، އެސްއޯއީ ކޯޕަރޭޓް ގަވަރނަންސް ކޯޑަށް އަމަލުކުރުން މަޖުބޫރު ހުރިހާ ކުންފުނިތަކެއްގެ މައްޗަށް ހިންގާނެ އުސޫލެކެވެ. ސަރުކާރު ޙިއްސާވާ އެހެނިހެން ކުންފުނިތަކަށް މި އުސޫލަށް އަމަލުކުރުން މަޖުބޫރު ނޫން ނަމަވެސް، ކުންފުނީގެ ހިންގުން ހަރުދަނާކުރުމަށް މި ނަމޫނާ ޗާޓަރު ބޭނުންކުރުމަށް ޕީސީބީން ވަނީ ބާރުއަޅާފައެވެ.