އިނގިރޭސި ޕްރިމިއާ ލީގުގައި ރޭ ކުޅުނު މެޗުގައި ޖޮއާއޯ ޕެޑްރޯ ކާމިޔާބުކުރި ހެޓްރިކާއެކު، ފަހަތުން އަރައި އެސްޓަން ވިލާ 4-1 އިން ބަލިކޮށް ޗެމްޕިއަންސް ލީގުގެ ޖާގައަކަށް ކުރާ އުންމީދު ޗެލްސީން އާކޮށްފިއެވެ. ވިލާ ޕާކުގައި ކުޅުނު މި މެޗުން މޮޅުވުމާއެކު ޗެލްސީ މިވަނީ ތާވަލުގެ ހަތަރުވަނައިގައި އޮތް ވިލާއާ ތިން ޕޮއިންޓަށް ގާތަށް ޖެހިލާފައެވެ.

މެޗުގެ ކުރީކޮޅު ޑޮގްލަސް ލުއިޒް ލަނޑެއް ޖަހައި ވިލާއަށް ކުރިހޯދައިދިން ނަމަވެސް، ޗެލްސީގެ ބްރެޒިލް ފޯވާޑް ޕެޑްރޯ ވަނީ ފުރަތަމަ ހާފު ނިމުމުގެ ކުރިން ދެ ލަނޑު ޖަހައި މެޗުގެ ނަތީޖާ އަނބުރާލާފައެވެ. ދެވަނަ ހާފު ފެށިގެން މާގިނަ އިރުތަކެއް ނުވަނީސް ކޯލް ޕާމާ ޗެލްސީގެ ތިންވަނަ ލަނޑު ކާމިޔާބުކޮށްދީ ލީޑު ފުޅާކޮށްދިނެވެ.

Ad by Hajj Corporation

މެޗުގެ ފުރަތަމަ ހާފުގައި ވިލާގެ އޮލީ ވަޓްކިންސް ލަނޑެއް ޖެހި ނަމަވެސް، ވީއޭއާރުން ބެލުމަށްފަހު އެއީ އޮފްސައިޑް ލަނޑެއް ކަމަށް ވަނީ ނިންމާފައެވެ. އޭގެ ފަހުން ޕެޑްރޯ އޭނާގެ ހެޓްރިކް ފުރިހަމަކުރުމާއެކު، އުނާއި އެމެރީގެ ޓީމަށް މެޗުގެ ތެރެއަށް އެނބުރި އައުމުގެ ހުރިހާ ދޮރެއް ބަންދުވިއެވެ. ލިއަމް ރޮސީނިއާގެ އިރުޝާދުގެ ދަށުން ކުޅުނު ޗެލްސީން މުޅި މެޗުގައިވެސް ފެނުނީ މާ ރޭވުންތެރި އަދި މޮޅު ކުޅުމެކެވެ.

މި ނަތީޖާއާއެކު ޗެލްސީ ވަނީ ލިވަޕޫލް ފަހަތަށް ޖައްސާލުމަށްފަހު ތާވަލުގެ ފަސްވަނައަށް ޖެހިލާފައެވެ. އަނެއްކޮޅުން، އެންމެ ފަހުން ކުޅުނު ހަތް މެޗުގެ ތެރެއިން އެންމެ މެޗަކުން މޮޅުވެފައިވާ އެސްޓަން ވިލާ އޮތީ ހަތަރުވަނައިގައި ނަމަވެސް، އެ ޓީމުގެ ފޯމު ދަށްވުމުގެ ސަބަބުން ގަދަ ހަތަރެއްގެ ރޭސް މިވަނީ އިތުރަށް ފޯރިގަދަވެފައެވެ.