އިތުރު 31 ރަށަށް މިމަހު އެމްބިއުލާންސް ފޮނުވާނެކަމަށް، ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޞިއްޙަތާބެހޭ ވަޒީރު ޢަބްދުﷲ ނާޡިމް އިބްރާޙީމް ވިދާޅުވެއްޖެއެވެ.

މި ބައްދަލުވުމުގައި ވާހަކަދައްކަވަމުން ، ޞިއްޙީ މަރުކަޒުތަކާއި ހޮސްޕިޓަލްތަކުގެ ވަސީލަތްތައް ހަމަކުރުމަށް ގިނަ މަސައްކަތްތަކެއް ކުރަމުން އަންނަކަމަށް ވަޒީރު ވިދާޅުވިއެވެ.

އެގޮތުން އެންމެ އިސްކަމެއްދޭ މަސައްކަތެއްގެ ގޮތުގައި އެމްބިއުލާންސް ހަމަކުރުމުގެ މަސައްކަތް ކުރަމުން އަންނައިރު، މިހާތަނަށް ބޮޑު ކުރިއެރުމެއް ލިބިފައިވާކަމަށް ވަޒީރު ވިދާޅުވިއެވެ.

މިދިޔަ މަހު 56 ރަށަކަށް އެމްބިއުލާންސް ފޮނުވާފައިވެއެވެ. އަދި މިމަހުގެ ތެރޭގައި 2 ބުރަކަށް ބަހާލައިގެން އެމްބިއުލާންސް ރަށްރަށަށް ފޮނުވާނެއެވެ. މީގެއިތުރުން، ބޮޑެތި އާބާދީތަކަށް އަމާޒުކޮށް ޕެރަމެޑިކް އެމްބިއުލާންސްތަކެއް ހޯދަމުން އަންނަކަމަށާއި، އެ އެމްބިއުލާންސްތައްވެސް އަންނަ މަހުގެ ތެރޭގައި ލިބޭނެކަމަށް ވަޒީރު ވިދާޅުވިއެވެ.

Ad by Hajj Corporation

ޞިއްޙީ ދާއިރާގެ ތަރައްޤީއަށް ސަރުކާރުން ކުރަމުން އަންނަ މަސައްކަތްތަކަށް އަލިއަޅުވާލައްވަމުން، ހެލްތު ސެންޓަރުތަކުގެ ޢުމްރާނީ ތަރައްޤީއާއި ވަސީލަތްތައް ހޯދުމުގެ 170 މަސައްކަތެއް ކުރިއަށްދާކަން ވަޒީރު ފާހަގަކުރެއްވިއެވެ. އެގޮތުން ޞިއްޙީ ޚިދުމަތްދޭ މަރުކަޒުތަކުގެ ވަސީލަތްތައް ހަމަކުރުމާއި ހަލާކުވެފައިވާ ވަސީލަތްތައް ހޯދުން ހިމެނޭހެން، 190 މިލިއަން ރުފިޔާގެ ތަކެތި ހޯދުމުގެ މަސައްކަތް އެސްޓީއޯ އާއި ގުޅިގެން ސަރުކާރުން ދަނީ ކުރިއަށްގެންދަމުންނެވެ.

މީގެ އިތުރުން އެމްބިއުލާންސްތަކަށް ދިމާވާ މައްސަލަ އަވަހަށް ޙައްލުކުރުމަށްޓަކައި، މަރާމާތުގެ މަސައްކަތް ގެންދިއުމަށްވެސް ދިގު މުއްދަތަށް ބަޔަކާ ހަވާލުކުރުމުގެ މަސައްކަތް ކުރަމުންދާކަމަށް ޞިއްޙަތާބެހޭ ވަޒީރު އަބްދުﷲ ނާޡިމް އިބްރާހީމް ވިދާޅުވިއެވެ. ވަޒީރު ވިދާޅުވީ މަރާމާތުކުރުމުގެ ޚިދުމަތް ބައެއް ރަށްރަށުން ނުލިބޭތީ ދިމާވާ ގޮންޖެހުންތަކަށް، މިކަމުން ޙައްލު ލިބޭނެކަމަށެވެ.