މާލޭގައި ހުރި ދުވަސްވީ ބަންޑާރަ މިސްކިތް ހުރި ތަނުގައި އާ މިސްކިތެއް ބިނާކުރުމުގެ މަޝްރޫއު ކުރިއަށް ގެންދާނީ ރައްޔިތުންގެ މަޝްވަރާއާއި ލަފާގެ މަތިން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ، އެ މިސްކިތް ތަޅާލުމަށްފަހު އާ މިސްކިތެއް އެޅުމަށް ނިންމުމުން އާންމުންގެ ތެރޭގައި ކަންބޮޑުވުންތަކެއް އުފެދިފައިވާ ދަނޑިވަޅެއްގައެވެ.

Ad by Hajj Corporation

މިނިސްޓަރު ވިދާޅުވީ އެ މިސްކިތް ހުރި ތަނުގައި އާ އިމާރާތެއް އެޅުމަށް ކުރިން ނިންމީ، އެއީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ރަސްމީކޮށް ހިމަނާފައިވާ ތަނަކަށް ނުވާތީ ކަމަށެވެ. ނަމަވެސް، އެ މިސްކިތަކީ ގަރުނަކަށްވުރެ ގިނަ ދުވަސްވީ، ދިވެހި ތާރީހުގެ ގިނަ ހަނދާންތަކަކާ ގުޅިފައިވާ ބިނާއެއް ކަމަށް ބުނެ ގިނަ ބަޔަކު ދަނީ އެތަން ތަޅާލުމާ ދެކޮޅަށް ހިޔާލުފާޅުކޮށް، އެއީ ތާރީހީ ބިނާއެއްގެ ގޮތުގައި ބެހެއްޓުމަށް ގޮވާލަމުންނެވެ.

މާލޭ ބަންޑާރަ މިސްކިތާއި، ޒިކުރާ މިސްކިތް ހުރި ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ މީގެކުރިން ވިދާޅވެފައެވެ. މާލެ ސަރަހައްދުގެ މިސްކިތްތަކުގެ ޖާގަ އިތުރުކޮށް އައު މިސްކިތްތައް އެޅުމުގެ މަސައްކުރަމުންދާއިރު ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރަމަޟާންމަހަށްފަހު ފެށިގެންދާނެކަމަށް ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ ވިދާޅުވެފައެވެ. އެކަމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާކަމަށްވެސް ވަޒީރު ވިދާޅުވިއެވެ.

ހަމައެހެންމެ މާލޭގެ މަޖީދީ މަގުގައި ގިނަ ދުވަސްތަކެއްވަންދެން ވަގުތީ މިސްކިތެއްގެ ގޮތުގައި ބޭނުންކުރަމުންދާ ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށްވެސް އެހީ ހަމަޖެހިފައިވާކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، ޒިކުރާ މިސްކިތް ހުރި ބިމުގައި އަތު މިސްކިތެއް އެޅުމަށްޓަކާ ރަމަޟާންމަހުގެ 27 ވިލޭރޭ ބިންގާ އެޅުމަށް އެހީދެއްވާ ފަރާތުން އެދިފައިވާކަމަށެވެ. އަދި ރަމަޟާން މަސް ނިމުމުން ވަގުތީ މިސްކިތް ތަޅާލައި، އަމަލީ މަސައްކަތް ފެށިގެންދާނެކަމަށް ވަޒީރު ވިދާޅުވިއެވެ. މިއާއެކު މާލޭގައި ހުރި ބޮޑެތި ހުރިހާ މިސްކިތްތަކެއް އައުވެގެންދާނެކަން އިސްލާމީ ކަންތައްތަކާ ބެހޭ ވަޒީރު ފާހަގަކުރެއްވިއެވެ.

މިސްކިތްތައް އެޅުމާއި މަރާމާތުކޮށް، އިސްލާމްދީން ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރައްވަމުންގެންދަވާއިރު، ނިމިދިޔަ އަހަރު 19.4 މިލިޔަން ރުފިޔާ، ރާއްޖޭގެ އެކި ރަށްރަށުގައި ހުރި މިސްކިތްތައް މަރާމާތު ކުރުމަށް ސަރުކާރުން ހޭދަކުރެއްވިއެވެ. އަދި މިއަހަރު 15 މިލިޔަން ރުފިޔާ، މިސްކިތްތައް މަރާމާތު ކުރުމަށް ވަނީ ހަމަޖައްސަވާފައެވެ. މި އަހަރު، ދައުލަތުގެ ބަޖެޓުން ޚަރަދުކޮށްގެން، ރާއްޖޭގެ އިތުރު 10 ރަށެއްގައި އިސްލާމީ މަރުކަޒު އިމާރާތްކުރުމުގެ މަސައްކަތް ފެށޭނެއެވެ.

ރާއްޖޭގެ އެކި ކަންކޮޅުތަކުގައި ސަރުކާރުންނާއި އަމިއްލަ ފަރާތްތަކުގެ ޚަރަދުގައި މިސްކިތް އިމާރާތްކުރުމުގެ މުހިންމު މަސައްކަތްތަކެއް ދަނީ ކުރަމުންނެވެ. މީގެ އިތުރުން ގިނަ މިސްކިތްތަކެއް އާބާތުރަ ފިލުމުގެ މަސައްކަތްވެސް ދަނީ ކުރަމުންނެވެ.
ސަރުކާރުގެ ޚަރަދުގައި ޢިމާރާތްކުރި ބައެއް މިސްކިތްތަކާއި، އަމިއްލަ ފަރާތްތަކާއި ގުޅިގެން ޢިމާރާތްކުރި މިސްކިތްތައް ހިމެނޭހެން މި ރަމަޟާން މަހަށް 15 މިސްކިތެއް މިހާތަނަށް ވަނީ ހުޅުވާފައެވެ. ރޯދަމަސް ނިމޭއިރު ހުޅުވޭ މިސްކިތްތަކުގެ އަދަދު 20އަށް އަރާނެކަަމަށް އިސްލާމީ ކަންތައްތަކާ ބެހޭ ވުޒާރާއިން ބުނެއެވެ.