އެފްއޭ ކަޕްގައި ރޭ ކުޅުނު މެޗުގައި ޗެލްސީން އިތުރު ވަގުތުގެ ތެރޭގައި ކާމިޔާބުކުރި ދެ ލަނޑާއެކު، 10 ކުޅުންތެރިންނާއެކު ކުޅުނު ރެކްސްހަމް އަތުން 4-2 އިން މޮޅުވެ މުބާރާތުން ކެޓުމުން ސަލާމަތްވެއްޖެއެވެ. މި މެޗުގައި ޗެލްސީ މޮޅުކޮށްދިނުމުގައި މުހިންމު ދައުރެއް އަދާކުރީ އިތުރު ވަގުތުގައި ލަނޑުތައް ކާމިޔާބުކޮށްދިން އަލެހަންދްރޯ ގަރުނާޗޯ އާއި ޔާއޯ ޕެޑްރޯއެވެ.

މެޗުގެ ފުރިހަމަ ވަގުތު ހަމަވިއިރު ދެ ޓީމު 2-2 އިން އެއްވަރުވެފައި އޮތް ނަމަވެސް، ރެކްސްހަމްގެ ޖޯޖް ޑޮބްސަންއަށް 93 ވަނަ މިނެޓުގައި ދެއްކި ރަތް ކާޑާއެކު އެ ޓީމަށް މެޗުގެ ކޮންޓްރޯލް ގެއްލުނެވެ. މެޗުގެ 17 ވަނަ މިނެޓުގައި ސޭމް ސުމިތު ލަނޑެއް ޖަހައި ރެކްސްހަމްއަށް ކުރިހޯދައިދިން ނަމަވެސް، ހާފް ނިމެން ފަސް މިނެޓަށް ވެފައި ވަނިކޮށް ގަރުނާޗޯ ފޮނުވާލި ހަމަލާއެއް ދިފާއުކުރަން އުޅުމުގެ ތެރޭގައި އާތާ އޮކޮންކްވޯ އަތުން ބައިކޮޅަށް ވަން ލަނޑުން ޗެލްސީން ނަތީޖާ އެއްވަރުކުރިއެވެ.

Ad by Hajj Corporation

ދެވަނަ ހާފުގައި ރެކްސްހަމްއިން އަލުން ކުރިހޯދީ 78 ވަނަ މިނެޓުގައި ކެލަމް ޑޮއިލް ޖެހި ލަނޑުންނެވެ. އެހެންނަމަވެސް، އޭގެ ހަތަރު މިނެޓު ފަހުން ޗެލްސީގެ ޖޯޝް އަޗެމްޕޮންގް ވަނީ ލަނޑެއް ޖަހައި އަލުން ނަތީޖާ އެއްވަރުކޮށްދީފައެވެ. މެޗުގެ ފަހުކޮޅު ޑޮބްސަން ކުރި ނުރައްކާތެރި ފައުލަކާ ގުޅިގެން ވީއޭއާރު ބެލުމަށްފަހު އޭނާއަށް ވަނީ ރަތް ކާޑު ދައްކާފައެވެ.

އިތުރު ވަގުތުގެ ހަވަނަ މިނެޓުގައި ގަރުނާޗޯ ވަނީ ޗެލްސީއަށް ފުރަތަމަ ފަހަރަށް މެޗުގެ ލީޑު ހޯދައިދީފައެވެ. ރެކްސްހަމްގެ ލުވިސް ބްރަންޓް ލަނޑެއް ޖަހައި އުންމީދު އާކުރި ނަމަވެސް، އެ ލަނޑު އޮފްސައިޑް ކަމަށް ނިންމިއެވެ. ޗެލްސީގެ މޮޅު ކަށަވަރުކޮށްދިނީ 125 ވަނަ މިނެޓުގައި ޔާއޯ ޕެޑްރޯ ކާމިޔާބުކުރި ލަނޑުންނެވެ.

ތަފާސްހިސާބުތަކަށް ބަލާއިރު، މިއީ 2015 ވަނަ އަހަރު ބްރެޑްފޯޑް ސިޓީ އަތުން ބަލިވި ފަހުން، ދަށު ޑިވިޝަނެއްގެ ޓީމެއް އަތުން ބަލިނުވެ ޗެލްސީން އެފްއޭ ކަޕްގައި ކުރިއަށްދިޔަ 25 ވަނަ ފަހަރެވެ. ގަރުނާޗޯ މި ސީޒަނުގައި ޗެލްސީއަށް ކުޅުނު ޑޮމެސްޓިކް ކަޕް މެޗުތަކުގައި މިހާތަނަށް ފަސް ލަނޑު ވަނީ ޖަހާފައެވެ.