އިނގިރޭސި ޕްރިމިއާ ލީގުގެ ތަށި ދިފާއުކުރުމަށް މެންޗެސްޓާ ސިޓީން ކުރަމުންދާ މަސައްކަތަށް ބޮޑު ހުރަހެއް ކުރިމަތިވެއްޖެއެވެ. ލަންޑަން ސްޓޭޑިއަމްގައި ރޭ ކުޅުނު މެޗުގައި ވެސްޓް ހޭމް ޔުނައިޓެޑުން ފަހަތުން އަރައި 1-1 އިން ސިޓީ ހިފަހައްޓައި، ރެލިގޭޝަން ޒޯނުން ބޭރަށް ޖެހިލައިފިއެވެ. މިނަތީޖާއާއެކު އެންމެ ފަހުން ސިޓީން ލީގުގައި ކުޅުނު ދެމެޗުންވެސް މޮޅެއްނުލިބި އެއްވަނައިގައި އޮތް އާސެނަލްއަށް ތަށި ހޯދުމަށް ވަނީ ވަރަށްބޮޑަށް މަގުފަހިވެފައެވެ.

އާސެނަލް އިން އެވަަޓަން ބަލިކޮށް ތާވަލުގެ ކުރީގައި އޮތް ފަރަގު ބޮޑުކޮށްފައި ވަނިކޮށް، ސިޓީއަށް މި މެޗުން މޮޅުވެގެން އެ ފަރަގު ހަތް ޕޮއިންޓަށް ކުޑަކުރުމުގެ ފުރުސަތު އޮތެވެ. ނަމަވެސް މި ނަތީޖާއާއެކު، ލީގުގައި ބާކީ އަށް މެޗު އޮތްއިރު ސިޓީ މިހާރު އޮތީ އެއްވަނައިގައި އޮތް އާސެނަލްއަށް ވުރެ ނުވަ ޕޮއިންޓް ފަހަތުގައެވެ.

Ad by Hajj Corporation

މެޗުގެ 31 ވަނަ މިނެޓުގައި ބެނާޑޯ ސިލްވާ ފޮނުވާލި ހުރަހެއް ގޯލުގެ ތެރެއަށް ވަދެ ސިޓީއަށް ކުރިލިބުނެވެ. ނަމަވެސް އޭގެ ހަތަރު މިނެޓު ފަހުން ވެސްޓް ހޭމްއިން ވަނީ ނަތީޖާ އެއްވަރުކޮށްފައެވެ. ޖެރަޑް ބޮވެން ނެގި ކޯނަރެއް ސިޓީގެ ކީޕަރު ޖިއަންލުއިޖީ ޑޮނަރުއްމާއަށް ރަނގަޅަށް ދިފާއު ނުކުރެވުމުގެ ފައިދާ ނަގައި، ކޮންސްޓަންޓިނޯސް މަވްރޮޕާނޯސް ވަނީ ބޮލުން ގޯލުގެ ތެރެއަށް ބޯޅަ ފޮނުވާލާފައެވެ.

މެޗުގެ ދެވަނަ ހާފުގައި ސިޓީން ގިނަ ފުރުސަތުތަކެއް ތަނަވަސްކުރިއެވެ. އެގޮތުން އާލިން ހާލަންޑް ފޮނުވާލި ހަމަލާއަކާއި، ޓިޖާނީ ރެއިންޑާސް ފޮނުވާލި ހިލޭ ޖެހުން ވެސްޓް ހޭމްގެ ކީޕަރު މަޑްސް ހާމަންސަން ވަނީ ހުޝިޔާރުކަމާއެކު ދިފާއުކޮށްފައެވެ. މެޗުގެ އެންމެ ފަހު ސިކުންތުކޮޅުގެ ތެރޭގައި ސިޓީގެ މާކް ގޭހީއަށް ލިބުނު ރަން ފުރުސަތެއްގައި އޭނާ ފޮނުވާލި ބޯޅަ ދިޔައީ ގޯލުގެ ހުރަސް ދަނޑިމަތިން ބޭރަށެވެ.

ތަފާސްހިސާބުތަކަށް ބަލާއިރު، މިއީ މި ސީޒަނުގައި ސިޓީ އެއްވަނައިގައި އޮތް ޓީމަށް ވުރެ ނުވަ ޕޮއިންޓް ފަހަތަށް ޖެހިލި ހަތަރުވަނަ ފަހަރެވެ. މީގެ ކުރިން 30 މެޗަށް ވުރެ ގިނައިން ކުޅެފައިވަނިކޮށް މިފަދަ ބޮޑު ފަރަގަކުން އަރައިގަނެ ލީގު ކާމިޔާބުކުރި ހަމައެކަނި ޓީމަކީ 2013-14 ސީޒަނުގެ ސިޓީއެވެ.

މި ނަތީޖާއާއެކު ވެސްޓް ހޭމް ވަނީ ނޮޓިންހަމް ފޮރެސްޓް ފަހަތަށް ޖައްސާލައި ތާވަލުގެ 17 ވަނައަށް ޖެހިލާފައެވެ. މިއީ މިދިޔަ ޑިސެމްބަރު މަހަށް ފަހު އެ ޓީމު ރެލިގޭޝަން ޒޯނުން ބޭރަށް ޖެހިލި ފުރަތަމަ ފަހަރެވެ. ވެސްޓް ހޭމްގެ ކޯޗު ނޫނޯ އެސްޕިރިޓޯ ސަންޓޯގެ ޓީމުން މުޅި މެޗުގައި ފޮނުވާލީ އެންމެ ހަމަލާއެއް ނަމަވެސް، އެ ހަމަލާ ގޯލަށް ބަދަލުކޮށްލައިގެން މުހިންމު ޕޮއިންޓެއް ވަނީ ހޯދާފައެވެ.